İctimai-siyasi ədəbiyyat üzrə alim-biblioqraf, əməkdar mədəniyyət işçisi, yorulmaz tədqiqatçı, qələm adamı Fazil Məmmədov yazdığı və tərtib etdiyi yeni kitablarla oxuculara qiymətli töhfələr verir.
F.Məmmədovun tərtibçiliyi ilə "Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin biblioqrafik göstəricisi" adlı kitab çap olunub. Qeyd edək ki, 3 cildlik nəşr 7 kitabdan ibarətdir. Nəşr 2016-cı ildə "Yazıçı" nəşriyyatında işıq üzü görüb.
Kitabların giriş hissəsində tərtibçi müəllif Fazil Məmmədov yazır: "Biblioqrafik sənət abidəsi ümummilli lider Heydər Əliyevin anadan olmasının şanlı 90 illiyi yubileyinə, əbədiyaşar əziz və parlaq xatirəsinə ithaf olunur".
Geniş və məzmunlu biblioqrafik nəşr olan "Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin biblioqrafik göstəricisi" böyük tarixi əhəmiyyətə malik olan cildliklərdir.
Bildirək ki, nəşrin I cildinin I kitabının anatasiyasında tərtibçi-müəllif bildirir ki, oxuculara təqdim olunan ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin əlifba göstəricisi ulu öndərin əsərlərinin 45 cildliyinin materialları əsasında tərtib olunub. Burada da vurğulanır ki, "Əlifba göstəricisi" üç kitabdan ibarətdir. Onun birinci kitabına sərlövhələri "A"-dan "X"-yə kimi olan hərflərlə başlayan əsərlər, sənədlər və materiallar daxil edilib. Biblioqrafik göstəricinin birinci cildi 110 adda əsas və köməkçi göstərici ilə təmin olunub.
I kitabın ikinci cildinin anatasiyasında isə qeyd edilir: "Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin əlifba göstəricisi"nin birinci cildinin ikinci kitabında ulu öndərin əsərləri Azərbaycan əlifbası sırası ilə düzülüb. "Əlifba göstəricisi"nin ikinci kitabına bütün 45 cildlik nəşr üzrə sərlövhələri "İ" hərfindən "Ş" hərfinə kimi olan hərflərlə başlayan əsərlər və sənədlər tam şəkildə daxil olub.
"Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin əlifba göstəricisi"nin birinci kitabının üçüncü cildində isə "Əlifba göstəricisi"nin "Ş" hərfindən "Z" hərfinə kimi olan hərflə başlayan əsərlər və sənədlər tam şəkildə öz əksini tapıb.
Biblioqrafik göstəricinin birinci cildinin birinci və ikinci kitabında olduğu kimi, burada da hər bir hərf üzrə uyğun mövzulara dair bölmələr və yarımbölmələr ayrıca verilib. Üçüncü kitabda bununla yanaşı, bütövlükdə birinci cildə aid 7 adda çoxşaxəli köməkçi göstəricilər də əlavə olunub.
Nəşrin ikinci cildinin birinci kitabının anatasiyasında yazılır: "Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin əlifba göstəricisi" ilk dəfə nəşr olunur. "Mövzu göstəricisi" ulu öndərin zəngin elmi-nəzəri sərvətini özündə bütövlükdə əks etdirən 45 cildlik nəşr üzrə tərtib olunub.
"Mövzu göstəricisi"nin başlıca vəzifəsi müasir oxucunun və gələcək nəsillərin ümummilli liderin əvəzsiz ideya sərvətinə daha yaxşı və daha dərindən yiyələnməsinə yetərli köməklik göstərməkdən ibarətdir".
İkinci cildin ikinci kitabı başlıqları "İ"-dən "Z"-yə kimi olan hərflərə aid mövzuları özündə əks etdirir: "Bu mövzularda oxuculara dahi rəhbərin əsərləri üzrə minlərlə mənbə haqqında səhih məlumat verilir".
Üçüncü cildin birinci kitabında isə Heydər Əliyevin böyük, mənalı, ibrətamiz və təkrarsız həyatından səhifələr, dildən-dilə, eldən-elə gəzən aforizm siqlətli müdrik kəlamları, məsləhətləri, nəsihətləri, sərrast deyimləri və əsərlərindən sitatlar göstəricisi ulu öndərin "Müstəqilliyimiz əbədidir" nəşrinin əhatə etdiyi 45 cild əsasında tərtib olunub.
Mətn göstəricisində "Müstəqilliyimiz əbədidir" çoxcildliyinə daxil edilmiş əsərlərdən və sənədlərdən qeyd olunan mövzulara dair seçilmiş mətnlər oxuculara 4 adda çoxşaxəli və 216 adda vahid bölmədə və yarımbölmədə təqdim olunub.
"Ümummilli lider Heydər Əliyevin "Müstəqilliyimiz əbədidir" çoxcildliyinə daxil edilmiş əsərlərinin və sənədlərin biblioqrafik göstəricisi" adlı kitabının üçüncü cildinin ikinci kitabı da böyük əhəmiyyətə malikdir. Bu nəşrə 100-ə qədər bölmə və 4 adda çoxşaxəli mövzu göstəricisi əlavə olunub.
Hesab edirik ki, belə dəyərli nəşrlər bütün nəsillər üçün örnəkdir. Fazil müəllimin böyük zəhmətlə ərsəyə gətirdiyi bu nəşrlər həm bu günümüz, həm də gələcək nəsillərimiz üçün dəyərli istinad xəzinəsidir.
İradə SARIYEVA
