Unudulmaz xalq şairi Söhrab Tahirin 90 illiyi ilə əlaqədar keçirilən tədbirlərin birində alovlu çıxışı ilə hər kəsi təəccübləndirən məktəblinin çıxışından sonra onun kimliyilə bağlı marağımıza cavab olaraq Nizami rayonunun Mərkəzi Kitabxanasının direktoru Sevil Əliyeva bildirdi ki, 2008-ci ildə Bakı şəhərində dünyaya gələn İbrahim Əhmədovu elə-belə yerə "balaca aktyor" adlandırmırlar:
"Bakı şəhəri Nizami rayonundakı 12 nömrəli tam orta məktəbin 3-cü sinif şagirdidir. Bacısı Zeynəb də onun kimi bədii qiraətçi kimi tanınıb 3-cü sinifdə oxuduğu zaman"...
Balaca aktyorun söylədiyi şeirlər sanki gözlərində xallı kəpənəyə dönüb uçur, səsi ləpələnir, dalğalanırdı.
Dili topuq vuran, sözləri hecalayan günlərdən şeir söyləməyə başlayıb. Alovlu səsi ilə göyləri yandıran Mikayıl Mirzənin bədii qiraətinin onun könlünə körpəlikdən yol saldığını deyirlər. Hərəkətləri ilə səsini eyni nota kökləyəndə bacısı Zeynəb ondakı bu məharəti və istedadı görüb anası Aidə xanımın yanına qaçaraq "xəbərçilik" edib:
- Ana, qardaşım hazırca aktyordu! Bax, elə bil ki, Mikayıl Mirzədi ey!
Anası hələ sözləri düz-əməlli deyə bilməyən bu balaca artistin səsinin dalğalarında, uşaq təbəssümlü simasında sanki böyüklərə xas əzəmət və qürur görəndə kövrəlib də...
İlk dəfə ondakı bu qabiliyyəti 2014-cü ildə, oxuduğu məktəbdə keçirilən "Son zəng"də hiss ediblər. Bundan sonra məktəbdə keçirilən bütün tədbirlərdə balaca aktyor səhnənin sahibinə çevrilib.
28 aprel 2015-ci il tarixində (birinci sinifdə oxuyarkən) YAP-ın təşkilatçılığı ilə dahi şəxsiyyət, ulu öndər Heydər Əliyevə həsr edilən şeir müsabiqəsinə qatılıb. Xalq şairi Zəlimxan Yaqubun ümummilli liderə həsr etdiyi şeiri söyləməklə İbrahim Əhmədov müsabiqənin qaliblərindən biri kimi mükafatlandırılıb, diploma layiq görülüb.
İstedadı onu ulduz kimi parlatdıqca evdə, məktəbdə və dostları arasında İbrahimin gələcəkdə məşhur aktyorlardan biri olacağını, kino ulduzuna çevriləcəyini söyləyiblər. Bu onun sözə sevgisini, səsə məhəbbətini birə-on artırıb. Buna görə də 2-ci sinifdə oxuyanda Nizami rayonundakı Uşaq-Gənclər Yaradıcılıq Mərkəzində fəaliyyət göstərən dram dərnəyinə üzv yazılır. İbrahimin istedadını və qeyri-adi qabiliyyətini görən mərkəzin direktoru Lalə Qəti və müəlliməsi Xanım Novruzqızı onunla ciddi məşğul olmağa başlayır.
İbrahim M.F.Axundzadə adına Milli Kitabxanada, Üzeyir bəy Hacıbəylinin və Cəfər Cabbarlının ev muzeylərində, Muzey Mərkəzində, C.Naxçıvanski adına hərbi liseydə, televiziya kanallarındakı bir sıra uşaq verilişlərində, radioda dəfələrlə şeir söyləyib, tamaşaçı və dinləyici məhəbbəti qazanıb.
2015-ci il noyabrın 15-də Bakı Şəhər Baş Təhsil İdarəsinin keçirdiyi "Azərbaycan folkloru" xalq yaradıcılığı festivalına (şeir üzrə nominasiyası üzrə) qatılıb və Nizami rayonu uzrə seçim turunun qalibi olub. Növbəti seçim turlarını da müvəffəqiyyətlə keçərək, 2016-ci il martın 15-də başa çatan festivalın şeir nominasiyası üzrə yeganə qalibi olub.
Çox erkən yaşlarından səhnəni peşəkar sənətkarlarla bölüşən balaca aktyor, bədii qiraətçi İbrahim Əhmədovun uğurlu çıxışları yalnız yuxarıda sadaladıqlarımız deyil. O, 15 aprel 2016-cı il tarixində "Səni tərənnüm edirəm, Azərbaycan" adlı şeir müsabiqəsinin rayon turunu keçərək, 1-4-cü sinif şagirdləri arasında rayon uzrə birinci yerin qalibi olub.
Nizami rayon Mərkəzi Kitabxanasının fəal oxucularından sayılan İbrahim Əhmədov burada keçirilən mədəni-kütləvi tədbirlərdə də iştirakdan qalmayıb. Bununla bərabər sinif rəhbəri Mehriban Hüseynova deyir ki, İbrahim dərslərində də əlaçıdır. Ona görə də mədəni tədbirlərdə iştirakında onun ən yaxın köməkçisi və məsləhətvericilərindən biridir.
İbrahimin sevimli şairləri az deyil. Onların arasında və sırasında Mikayıl Müşfiq, Səməd Vurğun, Bəxtiyar Vahabzadə, Xəlil Rza Ulutürk, Məmməd Araz, Zəlimxan Yaqub, Nəriman Həsənzadə, Vahid Əziz kimi xalqımızın söz ustadlarının adları var.
Arzularının qanadlarında erkən yaşlarından pərvazlanan balaca aktyor Prezident İlham Əliyevin qarşısında şeir söyləməyi özünün ən ülvi diləklərindən sayır. Gözəl arzudur, qovuşarsan, İbrahim bala!
Məhəmməd NƏRİMANOĞLU
