Bu günlərdə qəzetimizin elektron poçtuna Elman Qaraşov adlı, özünü aşıq kimi təqdim edən bir şəxs tərəfindən "Bakı-Xəbər" qəzetinin baş redaktoru Aydın Quliyevin ünvanına məktub gəlib. Əvvəlcədən qeyd edək ki, redaksiyamıza gələn hər bir məktuba, müraciətə çox həssaslıqla yanaşır və onu cavablandırmağa çalışırıq. E.Qaraşovun da məktubunu cavabsız buraxmaq istəmirik.
Qayıdaq E.Qaraşovun məktubuna. E.Qaraşov qəzetimizin baş redaktoruna üz tutaraq qəzetimizdə aşıq sənətinin sıx-sıx təbliğ olunmasına, Azərbaycan Aşıqlar Birliyinin tədbirlərinin işıqlandırılmasına qarşı çıxaraq bildirir ki, Azərbaycan mədəniyyəti ancaq aşıq sənətindən ibarət deyil, mədəniyyətin başqa sahələri də işıqlandırılmalıdır. Əvvəla E.Qaraşov bizim qəzeti ciddi izləyən oxucudursa, onda bilməlidir ki, İradə Sarıyeva qəzetin saylarında mədəniyyətin müxtəlif sahələrini işıqlandıran mövzular təqdim edir və bu mövzuların sırasında, təbii olaraq, aşıq sənətinə də yer ayırır. E.Qaraşov yazır: "Hörmətli Aydın müəllim! Qəzetinizdə mədəniyyətimizə böyük yer verirsiniz. Buna görə sizə sağ olun deyirəm. Amma nədənsə ən çox da aşıqlardan yazırsınız. Bu pis olmasa da, mədəniyyətimiz təkcə aşıqlar deyil. Özü də aşıqlardan da yazanda gərək ancaq tərif yolunu getməyəsiniz. Bir baxın hər nömrənizdə müxbiriniz İradə Sarıyeva aşıqlardan yazır. Elə bil ki, bu ölkənin bütün problemləri həll olunub, bircə bu aşıqların çal-çağırına ehtiyacımız var. Bəlkə elə qəzetinizin redaktorluğunu verəsiniz İ.Sarıyevaya və adını da dəyişib "Aşıqlar" qoyasınız. O ki aşıqlardan yazırsınız, onda buradakı çatmayanlardan da yazın".
Dəyərli oxucular, E.Qaraşovun yazısından bu sitatı verməkdə məqsədimiz bu adamın hansı düşüncədə olduğunu sizə çatdırmaqdır. "Bakı-Xəbər" qəzeti ölkə çapında tanınan, sayılıb-seçilən, ictimai rəyə təsir etməyi bacaran bir qəzet kimi ictimai-siyasi proseslərə, mədəniyyət hadisələrinə yer ayırır. Azərbaycan aşıq sənəti Azərbaycan dövlətinin himayəsi, qayğısı altında olan bir sənətdir. Bildiyimiz kimi, Azərbaycan dövləti aşıq sənətinə xüsusi qayğı göstərir. O da məlumdur ki, "Bakı-Xəbər" dövlət siyasətinə, dövlətçilik, azərbaycançılıq prinsiplərinə sadiqdir. Bundan sonra da bu yolda işini davam etdirəcək.
Məktub müəllifinin diqqətinə onu da çatdıraq ki, "Bakı-Xəbər" qəzetinin adının dəyişib "Aşıqlar" qoyulmasına ehtiyac yoxdur. Özünü saz təəssübkeşi, bəzən aşıq kimi təqdim edən E.Qaraşov özü belə bir qəzet açsın və istədiyini tənqid etsin, əgər bacarığı varsa...
Qəzetimiz aşıq sənətinə töhfələr verən, dövlətimizə, dövlətçiliyimizə bağlı olan, istedadlı, dəyərli insanlara hər zaman səhifələrində yer ayırır.
E.Qaraşov əməkdaşımızdan tanınmış gənc solo saz ifaçısı aşıq Xanlar Məhərrəmovun oğlu Azər Xanlaroğlu haqqında hansı səbəbdən yazmadığını soruşur. Məktub müəllifinin nəzərinə çatdıraq ki, qəzetimizdə Azər Xanlaroğlunun səhhəti ilə bağlı bir neçə yazı gedib. Biz onlardan 4 fevral tarixində çap olunmuş "Ağır xəstəliyə düçar olmuş 33 yaşlı istedadlı aşıq indi hamıdan kömək gözləyir...", 12 fevral tarixində işıq üzü görən "33 yaşlı gənc aşıq "Hepatit B"-yə qalib gəlmək arzusundadır" və başqa yazıları göstərə bilərik. Bunu Azər də, qohumları da, gənc solo saz ifaçının dostları, yaxınları, bizi mütəmadi izləyən dəyərli oxucularımız da bilir.
Məktub müəllifini əməkdaşımız İ.Sarıyevanın Azərbaycan Aşıqlar Birliyi ilə əməkdaşlıq etməsi narahat edir. Deyir ki, İ.Sarıyeva hər gün Birliyə gedib-gəlir: "Mənim bildiyim qədər də onu Aşıqlar Birliyinə doğmalaşdıran orada mətbuat xidmətinin rəhbəri çalışan yaxın qohumu Musa Nəbioğludur. O nəyi məsləhət görsə, İradə xanım da ancaq onu yazır. Hələ deyirlər ki, aşıqlardan yazdığı hər yazını əvvəlcə ona göstərib sonra da qəzetə verir. Nəticədə də çox zaman yanlış məlumatlar çatdırır sizə".
Tamamilə ağ yalandır. Birincisi, Musa Nəbioğlu İradə Sarıyevanın nəinki yaxın qohumu, heç uzaq qohumu da deyil. Eyni rayondan olsalar da, birmənalı olaraq qohumluq əlaqələrinə malik deyil.
Məktub müəllifi qəzetimizin əməkdaşı ilə bərabər Birlik katibi Altay Məmmədlini də o ki, var tənqid atəşinə tutub. Özü də yalan və iftiralarla. Yazır ki, Birlik katibi Altay Məmmədli onu Birliyə dəvət edib, lakin o, ünvanı tapa bilməyib (?).
Aşıqlar Birliyini ünvansızlıqda ittiham edən E.Qaraşovun özü redaksiyamıza ünvanladığı elektron məktubda nə öz ünvanını yazıb, nə də əlaqə telefonlarını. Siz deyin, belə bir adamın hansısa qurumu, təşkilatı ünvansızlıqda ittiham etməyə haqqı varmı? Özün ünvanını yazmalısan ki, başqasından da bunu uma biləsən. Tutalım biz E.Qaraşovu redaksiyamıza dəvət etməli olduq, bəs onu necə tapmalıyıq?
Məktub redaksiyamıza daxil olduqdan sonra E.Qaraşovun şəxsiyyəti ilə bağlı geniş araşdırma apardıq. Aşıqlar Birliyinə müraciət edərək Birlik üzvləri sırasında belə bir aşığın olub-olmadığı ilə maraqlandıq. Birlikdən bizə verilən məlumata görə, Birlik üzvləri arasında belə bir aşıq olmayıb və yoxdur. E.Qaraşovu aşıqlardan da sorduq, nə ustad aşıqlar, nə də gənclər belə bir adda aşıq tanımadıqlarını bildirdilər...
Bu araşdırmalar nəticəsində bəlli oldu ki, ümumiyyətlə E.Qaraşov hansısa qarayaxmaçının saxta imzasına daha çox oxşayır. Cəsarəti çatıb öz imzası ilə fikir bildirə bilməyənlərin isə bir adı var-saxtakar!
Xəbər xidməti
