Son illər aşıq sənətinə göstərilən dövlət qayğısı bəhrəsini verməkdədir. Aşıq sənətinin inkişafına göstərilən diqqət nəticəsində gənclərin bu sahəyə kütləvi maraq göstərməsi təqdirəlayiqdir. Azərbaycan dövlətinin ozan-aşıq sənəti ilə bağlı siyasətini Azərbaycan Aşıqlar Birliyi (AAB) həyata keçirir. Onu da qeyd edək ki, AAB fəaliyyətində gənclərə xüsusi yer ayırır və onlara diqqət-qayğı göstərir.
Bildiyimiz kimi, AAB-da indiyə qədər gənc aşıqlarla bağlı bir neçə layihə həyata keçirilib və bu layihələrin də hər biri aşıq sənətinin təbliği, tərənnümü ilə bağlı olub.
AAB-ın növbəti layihəsi "Misri" - gənc aşıqların səs incisi" adlı audio diskin təqdimatı idi.
Sentyabrın 5-də Rəşid Behbudov adına Dövlət Mahnı Teatrında Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının və Azərbaycan Aşıqlar Birliyinin təşkilatçılığı ilə "Misri" - gənc aşıqların səs incisi" adlı audio diskin təqdimatı yaddaqalan oldu. Azərbaycanın müxtəlif bölgələrini təmsil edən gənc aşıqlar, solo saz ifaçıları, saz qruplarının ifası həqiqətən də dinləyicilərin ürəyini ovsunladı.
Qeyd edək ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə ərsəyə gələn "Misri" - gənc aşıqların səs incisi" audio diskində 15-35 yaşarası 30 aşığın ifası yer alıb.
Audio diskin təqdimat mərasimini açan Azərbaycan Aşıqlar Birliyinin sədri, əməkdar elm xadimi, dövlət mükafatı laureatı, professor Məhərrəm Qasımlı bildirdi ki, ənənələrə bağlı olan ozan-aşıq sənəti bu gün özünün yeni dövrünü yaşayır. O qeyd etdi ki, aşıq sənətinin həyatında yeni bir mərhələ başlanıb. AAB sədri vurğuladı ki, aşıq sənətinə böyük dövlət dəstəyi və qayğısı var və bunun da əsasını Heydər Əliyev qoyub: "Müasir Azərbaycan aşıq sənəti özünün sənət həyatında yeni bir mərhələyə qədəm qoyub. Bu sənətə güclü dövlət qayğısı var. Deyim ki, ulu öndər Heydər Əliyevin ölkəmizdə müəyyənləşdirdiyi humanitar mədəniyyət strategiyası və bu strategiyanın ölkə başçısı İlham Əliyev tərəfindən uğurla davam etdirilməsini xüsusi qeyd etmək lazımdır. Bütün bunlarla yanaşı, aşıq sənətinin UNESCO səviyyəsinə qaldırılması, milli musiqimizə və ümumiyyətlə muğam və aşıq sənətinə Heydər Əliyev Fondunun prezidenti Mehriban xanım Əliyeva tərəfindən göstərilən diqqət və qayğını da qeyd etməliyik".
M.Qasımlının bildirdiyinə görə, "Misri" - gənc aşıqların səs incisi" audio diski Azərbaycan Aşıqlar Birliyinin gənclərlə bağlı həyata keçirilən layihələrindən biridir. O dedi ki, qarşıda sazsevərləri saysız layihələr, maraqlı tədbirlər gözləyir: "Bizim indiyə qədər bir sıra uğurlu layihələrimiz olub. Bilirsiniz ki, qədimdən aşıq sənəti ustad-şəyird ənənəsi üzərində pərvəriş tapıb. Bölgələrimizdə də, Bakıda da çoxlu istedadlı gənc var. Həyata keçirdiyimiz layihələr sırasına gənc aşıqlar üçün ustad dərslərinin keçirilməsi, aşıq sənəti ilə bağlı konfrans və tədbirlərin düzənlənməsi və s. aiddir. Birliyin katibləri Məhəmmədəli Məşədiyev və Altay Məmmədli bölgələrdə gənc aşıqların seçilməsində, onlara ustad dərsləri keçilməsində xüsusi iştirak ediblər. Bu gün Naxçıvandan Lerikə qədər, Şamaxıdan Balakənə qədər hər yerdə aşıq sənətinə maraq geniş vüsət alıb. Biz bu dəfə ilk olaraq ən qədim musiqi alətlərimizdən olan qopuzun əkiz qardaşı tamburu da konsertə daxil etdik. Bugünkü konsertdə Balakəndən dəvət etdiyimiz tambur ifaçısı Əfqan Rəhmanov da çıxış edir. Tambur müasir Azərbaycan sazının babasıdır. Biz onu yaşatmalıyıq, təbliğ etməliyik. Aşıq sənəti ilə bağlı görəcəyimiz işlər çoxdur. Sağlıq olsun".
AAB sədri aşıq sənətinin inkişafına dəstək olan, əmək sərf edən hər bir insana öz təşəkkürünü bildirdi.
Professor M.Qasımlı qeyd etdi ki, audio diskdə repertuarı yer alan gənc ifaçıların xeyli hissəsi gecədə iştirak edir.
Onu da vurğulayaq ki, layihənin həyata keçirilməsində məqsəd aşıq sənətinin böyük mənəvi dəyər olaraq qorunub saxlanması və bu sənətin bölgələrdə geniş şəkildə yayılmasını təşkil etməkdən ibarətdir.
Birlik sədrinin çıxışı başa çatdıqdan sonra aparıcı Zöhrə Xəlili səhnəyə "Misri" qrupunu dəvət etdi. "Misri" qrupu sazda Üzeyir Hacıbəyovun "Koroğlu" operasından üverturanı ifa etdilər. Onların ardınca isə səhnəyə gənc və istedadlı xanım aşıq Gözəl Kəlbəcərli dəvət edildi. Gözəl xanım "Aran gözəlləməsi" havasını təqdim etdi.
Aparıcı səhnəyə gənc aşıq Şəhriyar Laçını çağırdı, Şəhriyar "Ruhani" havası ilə tamaşaçıların ruhunu oxşadı.
Borçalı aşıq mühitinin tanınmış gənc nümayəndəsi Ramin Qarayevin təqdim etdiyi "Çıldır gözəlləməsi" klassik saz havalarından biridir. Gənc xanım aşıq Xatirə Gülməmmədli isə "Osmanlı divanisi" ilə tamaşaçıları salamladı.
Aparıcı səhnəyə gənc aşıq Babək Şakirlini dəvət etdi. Şirvan aşıq mühitinin görkəmli simalarından olan aşıq Şakir Hacıyevin nəvəsi olan Babək "Şirvan müxəmməsi"ni, Ağstafa aşıq mühitinin tanınmış gənc aşığı İlqar Qələmçəli "Hicran Kərəmi" (solo), əməkdar mədəniyyət işçisi Gülarə Azaflının rəhbərlik etdiyi "Çeşmə" folklor qrupu "Gödəkdonu", gənc aşıq Rza İslamoğlu "Oynaq şəşəngi" (solo), Məharət Habiloğlu və Elçin Rəşidoğlu "Pənah gözəlləməsi" havalarını təqdim etdilər.
Sonra isə səhnəyə balakənli gənc tambur ifaçısı (haylaçı) Əfqan Rəhmənov dəvət edildi. Əfqan qədim musiqi alətində olduqca maraqlı ifa nümayiş etdirdi.
Göyçə aşıq mühitinin tanınmış xanım nümayəndəsi aşıq Rəfiqə Göyçəli "Orta Sarıtel", Lerikdən olan gənc aşıq Emil Nurlu "Kərəm gözəlləməsi", Məhsəti Cabbarlı "Azaflı sənəti", Samir Cəlaloğlu "Hüseyni", Əfsanə Kərimli "Şəqayi gəraylı", Elvin Mehmanlı "Baş Sarıtel" havalarını sazsevərlərə təqdim etdilər.
Səhnədə "Laçın" qrupunun ifası da unudulmaz oldu.
Hər şeyin başlanğıcı olduğu kimi, son da olur. "Misri" - gənc aşıqların səs incisi" audio diskinin təqdimat mərasiminə həsr edilən gecəyə Tovuz aşıq mühitinin tanınmış gənc nümayəndələri - aşıq Elməddin Məmmədli və aşıq Şəhriyar Qaraxanlının ifası ilə yekun vuruldu. Gənc aşıqlar tamaşaçılara "Cığalı müxəmməs" havasını təqdim etdilər.
İradə SARIYEVA
