Əməkdar elm xadimi, professor, Azərbaycan Aşıqlar Birliyinin sədri Məhərrəm Qasımlı həm də bir şair kimi geniş oxucu kütləsinə yaxşı tanışdır. Şeirlərini Orxan Paşa imzasıyla yazan Məhərrəm müəllimin poetik yaradıcılıq nümunələri respublikamızda dövrü mətbuatda, ədəbi məcmuələrdə işıq üzü görüb, kitabları nəşr olunub.
Azərbaycan Aşıqlar Birliyinin mətbuat xidmətinin rəhbəri, əməkdar mədəniyyət işçisi Musa Nəbioğlunun "Bakı-Xəbər"ə verdiyi məlumata görə, bu günlərdə Orxan Paşanın yeni şeirlər kitabı qonşu Gürcüstanda gürcü dilində işıq üzü görüb. M.Nəbioğlu bildirib ki, Tiflisin nüfuzlu "Universal" nəşriyyatında nəfis tərtibatla çap olunan kitabda yer alan şeirləri gürcü dilinə Avto Çxaidze və Mirzə Məmmədoğlu tərcümə edib. Kitabın redaktoru isə Almaz Maşovdur. Gürcü oxucusu bu kitab vasitəsilə şairin yaradıcılığında seçmələrdən ibarət olan 65 şeirlə tanış olacaq.
İnanırıq ki, Orxan Paşanın gürcü oxucusu ilə bu görüşü uğurlu olacaq, gələcəkdə bu ölkədə yeni kitablarının nəşrinə vəsilə olacaq.
Yeri gəlmişkən qeyd edək ki, kitabın tərcüməçilərindən biri olan Mirzə Məmmədoğlu Tiflisdə yaşayır və Gürcüstan-Azərbaycan ədəbi əlaqələri sahəsində böyük xidmətləri var. Azərbaycanın bir sıra görkəmli mütəfəkkirlərinin, şair və yazıçılarının əsərlərinin gürcü dilində nəşrində böyük zəhmət çəkib.
İradə SARIYEVA
