Görkəmli şair-dramaturq Ramiq Muxtarı ağır cərrahi əməliyyatdan sonra xəstəxanada ziyarət etdik...

Tarix: 04.08.2016 / 02:01
Bölmə: Mədəniyyət

"Heydər Əliyevin şəxsi göstərişi ilə "Dünya azərbaycanlılarının birlik nəğməsi"nin mətnini də mən yazmışam..."

Həqiqət budur ki, insan qədərdən qaça bilmir. Nə qədər yayınmaq istəsə də alınmır, bəxtinə nə yazılıbsa, o da baş verir. Dünən ayaq üstə gördüyün, duzlu-məzəli söhbətlərindən doymadığın bir qələm adamını bu gün xəstəxanada görəndə adam məətəl qalır. Sorağı gəlib redaksiyamıza çatdı ki, tanınmış şair-dramaturq, Prezident təqaüdçüsü, Gürcüstan Respublikasının ali "Şərəf" medalına layiq görülən, Rəsul Rza adına Beynəlxalq Mükafat laureatı, "Bakı-Xəbər"in dəyərli dostu Ramiq Muxtar akademik Mirqasımov adına Respublika Kliniki Xəstəxanasında ayağından əməliyyat keçirib. Bu xəbər bizi hədsiz məyus etdi.

Ramiq Muxtar kimi səmimi, mehriban, dəyərli insanın, ziyalının xəstəxanaya düşməsi həqiqətən də kədərlidir. R.Muxtara baş çəkmək üçün xəstəxanaya yollandım. Həyat eşqi ilə ağrı-acıya, dərd-məlala meydan oxuyan şairi xəstəxanada yataqda görmək ağır oldu...

"Bakı-Xəbər"in onu yad etməsi Ramiq Muxtarı xeyli duyğulandırdı. Dedim ki, ay şair, xoş gördük, olmasın azar, niyə naxoşlamısınız? Cavab verdi ki, 4 ildir şəkər xəstəliyindən əziyyət çəkir, bunun nəticəsində də ayaq barmaqları qanqrena verib, barmağının birini kəsiblər: "Əsəb məni bu vəziyyətə saldı. 4 ildir nə gecəm var, nə gündüzüm. İndi də bu vəziyyət yaranıb. Gördüyünüz kimi xəstəxanadayam. Artıq barmağımın birini kəsiblər. Həkimim çox dəyərli, bacarıqlı, işinin ustası olan cərrah, professor Fariz Camalovdur. Həkimdən yerdən göyə qədər razıyam. Çox dəyərli həkimdir, gözəl mütəxəssisdir".

Dörd övladı olan R.Muxtar xoşbəxt atadır desək yanılmarıq. Balaları xəstə atalarının başına pərvanə kimi dolanır. Demək şair ömrü hədər yaşamayıb, qeyrətli övladlar yetişdirib cəmiyyətə bəxş edib. O valideyn xoşbəxtdir ki, onun qayğısına qalan övladları var.

Ramiq müəllim ədəbi ictimaiyyətdə kifayət qədər tanınan, qiymətləndirilən qələm adamıdır. Onun yaradıcılığına, fəaliyyətinə ölkə başçısı cənab İlham Əliyevin verdiyi dəyər göz önündədir. R.Muxtar bir neçə il əvvəl Prezident təqaüdünə layiq görülüb.

R.Muxtarın dövlətə, dövlətçiliyə sadiqliyi haqqında çox sözlər demək olar. Müstəqil Azərbaycanın şan-şöhrəti onun poeziyasında obraza çevrilib. Şairin "Bakı-Tiflis-Ceyhan" şeirində bunları görmək olar.

Böyük Turan elinə

Uzanır qızıl kəmər.

Aralıq dənizinə

Qan verir mavi Xəzər.

Azərbaycan ədəbiyyatına öz dəst-xətti ilə xidmət edən R.Muxtar Azərbaycanın mərhum prezidenti Heydər Əliyevlə bağlı silsilə xatirələr yazıb və o xatirələr, söhbətlər yerli mətbuatda dərc edilib.

Ramiq müəllimlə görüşümüzdə şair Heydər Əliyevlə çoxsaylı görüşlərindən danışdı. Bildirdi ki, o görüşlər, söhbətlər olduqca maraqlı, dəyərli, qiymətli idi. Heydər Əliyevin hər tövsiyəsi, hər sözünün xalqın, dövlətin işıqlı gələcəyi ilə bağlı olduğunu qeyd edən şair dedi ki, unudulmaz Heydər Əliyev onun yaradıcılığına böyük təkan verib. R.Muxtar dedi ki, seçilmiş əsərlərinin II cildini çapa hazırlayır. Kitabda Heydər Əliyevlə, Qara Qarayev və şairin gənclik dostu bəstəkar Nəriman Məmmədovla bağlı bədii nümunələr yer alacaq: "Xəstəxanaya düşənə qədər bir povest üzərində işləyirdim -"Mənim oyaq yuxularım". Onu da ikinci cildə salmaq fikrindəyəm. Mən saysız mahnı mətni yazmışam, əksər mətnlərin bəstəkarı isə Nəriman Məmmədovdur. Nəriman bilirsiniz necə gözəl insan idi. Ürəyi körpə uşaq ürəyi kimi idi, bu dünyaya saf gəldi, saf da getdi... Bir gün Nəriman mənə dedi ki, Ramiq, Sevdaya bir mahnı yazaq. Sevda Nəriman müəllimin ikinci həyat yoldaşı idi.

Heç bilmirdim məhəbbətin dadını,

Çəkməyirdim, gözəl, sənin adını,

Verdin mənə ürəyinin odunu.

Qəlbim yanır, söndür qarla, yağışla,

Bir günahım varsa, gülüm, bağışla.

Bax bu mahnı onda yarandı. Çox gözəl təsir bağışladı dinləyicilərə. Mənim sözlərimə 120-dən artıq mahnı bəstələnib. Nəriman Məmmədovla mənim çox sıx yaradıcılıq əlaqələrim olub, elə mahnılarımız var ki, hələ onlar səsləndirilməyib. Nərimanın qızına deyirəm ki, o notları saxlasın, xəstəxanadan çıxandan sonra onları bir yerə toplayıb qaydasına salacağam...

Bilirsiniz, son illər respublikamızda keçirilən hərbi-vətənpərvərlik mövzusundakı müsabiqələrdə şeirlərimə bəstələnmiş mahnılar 8 dəfə birinci mükafata layiq görülüb. 2001-ci ildə Dünya Azərbaycanlılarının I Qurultayı keçirildi. Heydər Əliyev məni yanına çağırıb dedi ki, bir həftə sonra Bakıda Dünya Azərbaycanlılarının Birinci Qurultayı keçiriləcək. Həmin qurultay üçün bir birlik nəğməsi yazılmalıdır. Sənin mahnı mətnlərin çox xoşuma gəlir. Ümummilli liderimiz Heydər Əliyevin şəxsi göstərişi ilə "Dünya azərbaycanlılarının birlik nəğməsi"nin mətnini yazdım... Heydər Əliyev unudulmaz şəxsiyyət, dahi siyasi xadimdir. Onunla hər bir görüş yadımdadır".

R.Muxtar vətənə bağlı şairdir. Onun şeirlərində tariximizin dərin qatları açılır.

Oğuz baba

Uzun illər

Dəvəsilə duz daşımış

Bu mahaldan o mahala.

Nicat vermiş, həyat

vermiş insanlara

Bu minvalla.

Kim deyir ki,

Ömürdən pay ola bilməz?

Yorğun babam duz

ömrünü misqal-misqal

Düz paylamış insanlara.

Şair R.Muxtar dövlət müstəqilliyimizin ilk illərində Azərbaycanın başı üzərində dolaşan qara buludların çəkilib getməsini arzu edirdi. O bunu məşhur bir mahnı mətni ilə ifadə edirdi...

Qara bulud, çəkil get,

Yanar günəş mənimdir.

Azərbaycan vətənim,

Müstəqil dövlətimdir.

Müstəqil vətənimdir.

Ramiq müəllimdən soruşdum ki, gənclik dostunuz kim idi?

Cavab verdi ki: "Lap gənclik dostum böyük şairimiz, istiqlal mücahidi Xəlil Rza olub. Cavanlıqdan Xəlilin ömrünün sonuna qədər dostluq etmişik. Bunu Firəngiz xanım da təsdiqləyər. Bir dəfə Xəlillə Firəngiz xanım yanıma gəldi ki, səninlə söhbətimiz var. Dedilər ki, oğulları Rzaya toy edirlər, ailələri mənim tamada olmağımla bağlı qərara gəliblər. Əvvəl etiraz etdim ki, məclisdə bizim ağsaqqal yazıçılarımız İsa Muğanna, Hüseyn Abbaszadə olacaq, qoyun onlardan biri olsun. Cavab verdilər ki, sən olmalısan. Toyu mən idarə etdim, inanın ki, o qədər maraqlı, şən toy keçdi. Xəlillə çox doğma idik. Başqa gənclik dostum Nəriman Həsənzadə olub. 1995-ci ildən sonra isə rəhmətlik Qabillə yaxın dost olduq. Xatirələr çoxdur...".

Xəlil Rza ilə dostluğu o qədər səmimi, qırılmaz olub ki, şair həmkarının vəfatından təsirlənərək, ömrünü xalqımızın azadlığı uğrunda mübarizəyə həsr etmiş böyük ədibin ölümü ilə əlaqədar "Ölməz Xəlil" şeirini yazıb:

Diktor bacım, təkzib elə

Söylədiyin bəd xəbəri,

Öz səhvini özün düzəlt!

Nurla açaq al səhəri.

- Nə söylədin, Xəlil öldü?

Ola bilməz,

O günəşdir, mənim bacım,

Asanlıqla sönə bilməz.

"Çıx baxtımın yollarına" mahnısı çox məşhurdur. Bu mahnının da mətnini Ramiq Muxtar yazıb:

Gözlərində gözüm qaldı,

Ürəyimdə sözüm qaldı.

Durna kimi uçub getdin,

Təkcə mənə dözüm qaldı.

Bax açılan qollarıma,

Çıx baxtımın yollarına.

Ramiq müəllim xəstəxanada olsa da, könlü sözdən ayrı düşməyib. Deyir ki, sağalan kimi yaradıcılığını davam etdirəcək. Axı onun yolunu indi neçə yarımçıq əsər gözləyir.

Şair bildirdi ki, heç vaxt stol arxasında oturub şeir yazmayıb, şeirləri yollarda, istirahətdə, çöldə-bayırda yaranıb: "Heç vaxt özümü şeir yazmağa məcbur etməmişəm və heç vaxt da masa arxasında oturub şeir yazmamışam. Lap elə yatdığım yerdə, yaxud getdiyim yerdə şeir yaranıb onu götürüb yazmışam. Bir də görürsən ki, hansısa bir xalq mahnısı məni tutub, onun havasında şeir yazmışam. Məqalə və dramaturji əsərləri, nəsr nümunələrini, təbii ki, yazı masası arxasında yazmışam".

Qeyd edək ki, R.Muxtar 1942-ci il sentyabrın 5-də Naxçıvan şəhərində ziyalı ailəsində anadan olub. 11 yaşından bədii yaradıcılıqla məşğul olub, şeirləri dövri mətbuatda tez-tez çap olunub. "Üfüqlər qızaranda", "Əlvida, köhnə dünya", "Doğma səmanın ulduzları" və digər pyesləri Bakı, İrəvan, Naxçıvan, Qazax Dövlət Dram teatrlarında uğurla tamaşaya qoyulub. R.Muxtarın "Seçilmiş əsərləri"nin birinci cildi çapdan çıxıb. Onun "Müdirin aqibəti", "Əgər sevirsənsə", "Şəhərli kürəkən", "Qıl körpü" pyesləri də olduqca maraqlı əsərlərdir.

R.Muxtar akademik Mirqasımov adına Respublika Kliniki Xəstəxanasının cərrahiyyə şöbəsində müalicə alır. Şairlə ayrılarkən dedi ki, ola bilsin, cərrah o biri barmaqlarını da kəssin.

Orada olarkən şairə dost-tanış münasibətinin şahidi oldum. Səhhətində yaranmış problemlə əlaqədar olaraq şairə tez-tez zənglər gəlir, ondan hal-əhval tuturdular: "Mənə xəstəxanada yaxşı baxırlar. Həkimimdən də, diqqət göstərən hər kəsdən də razılıq edirəm".

Şairlə ayrılmaq zamanı gəlir, onunla sağollaşıb deyirəm ki, şair, tez sağalıb ayağa durun, neçə şeir vurğunu şeirlərinizi gözləyir". Təbəssümlə əl edir. Gözlərində ümid görürəm, hiss edirəm ki, şair xəstəliyin kürəyini yerə vurmağa hazırlaşır. Təki elə olsun, bizim dost itirən vaxtımız deyil!

İradə SARIYEVA

DİGƏR XƏBƏRLƏR

Tarix: 14.08.2026 / 14:03

Əfsanədən gerçəkliyə uzanan 5 minillik tarix - Troya

Tarix: 13.08.2026 / 22:41

Macarıstanda Yupiterə həsr olunmuş qurbangah aşkarlandı

Tarix: 13.08.2026 / 18:49

Müharibə aparan ölkələrə "Avroviziya” qadağası - Təşkilatçılar qərar verdi...

Tarix: 13.08.2026 / 16:00

Məşhur rejissorların teatr premyeraları və əfsanəvi tamaşaları Bakı Beynəlxalq İncəsənət Festivalında nümayiş olunacaq

Tarix: 11.08.2026 / 12:34

Pianonun düymələrində saxlanmış bir Vətən: Züleyxa Abdullayevanın səsi insanlara bu cür çatır

Tarix: 10.08.2026 / 12:48

Yunus Oğuz – Tarixi romanın müasir nəfəsi

Tarix: 09.08.2026 / 11:50

50 illik yubileyidir, yoxsa bu da yeni zarafatıdır...

Tarix: 07.08.2026 / 12:34

Türkiyənin UNESCO-nun Dünya İrsinin İlkin Siyahısına daxil edilən unikal tarixi abidəsi - Kadıkalesi

Tarix: 06.08.2026 / 22:08

Azərbaycan Mədəniyyəti sosial platforması Yayfest-də uğurla çıxış edib...

Tarix: 05.08.2026 / 20:10

Rayon teatrlarında direktorlar və müavinlər seçilir, ya təyin edilir...

Tarix: 05.08.2026 / 14:15

Musiqi terapevti soydaşımızdan Türkiyədə unudulmaz sənət gecəsi...

Tarix: 04.08.2026 / 20:47

Xarici sərmayiçilər kinomuza 12 milyon dolları necə yatırıb?...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 13.08.2026 / 21:44

Ərdoğan “Məkkə sazişi”nin arxasındakı sirri açdı - Ekspertlər şübhə ilə baxır...

Tarix: 13.08.2026 / 20:16

Avropa Birliyinin Naxçıvan dəmir yollarında marağının görünən və görünməyən tərəfləri...

Tarix: 13.08.2026 / 15:30

İrəvanda Azərbaycan təbii qazına qarşı ikitərəfli kampaniya başladı...

Azərbaycanda vətəndaş cəmiyyətinin inkişafında rəqəmsallaşma və innovasiyalar ön plana çıxır