1 Aprel Gülüş günüdür

Tarix: 01.04.2016 / 02:18
Bölmə: Mədəniyyət

Çayçı Səfər çay dəmləməkdə məşhur idi. Bir gün camaata çay paylayanda ona xəbər çatdırırlar ki, bəs, rayonda yaşayan anası ölüb. Səfər kişi təzəcə dəmlədiyi çayı çaynikdə qoyub, tələsik rayona yola düşür. Anasını torpağa tapşırır, qırxını da verib, qayıdır şəhərə.

İşə çıxan kimi bir nəfər çayxanaya gəlir ki, "Səfər kişi, mənə çay ver". Səfər kişi fikirli-fikirli çay süzüb verir müştəriyə. Müştəri çaydan bir qurtum içir, dodağını büzür:

- Bu çay dəm almayıb ki!

Çayçı dillənir:

- A kişi, deyirsən yəni qırx gün bundan əvvəl dəmlənən çay hələ dəm almayıb? Yalan niyə danışırsan, hə?

Tələsik iş

Qasım kişi dərzi idi. Amma sifarişləri həddindən artıq gecikdirdiyi üçün ona "Uzunçu Qasım" deyirdilər. Günlərin bir günü Qurban adlı cavan oğlan Qasım kişiyə parça gətirir ki, ona bir kostyum tiksin. Bir ay gözləyir, iki ay gözləyir, kostyum hazır olmur. Dərzi elə hey deyir "darıxma". Yenə bir-iki ay keçir, dərzidən xəbər çıxmır. Nəhayət, Qurbanı əsgərliyə çağırırlar, gedir. Əsgəri xidməti başa vurub qayıdandan sonra yadına düşür ki, dərzi Qasıma kostyum tikmək üçün parça vermişdi. Odur ki, Qasım kişinin yanına gəlib soruşur:

- A kişi, sənə parça vermişdim kostyum tikəsən, nə oldu?

Dərzi deyir:

- Tikmişəm, a bala! Təkcə ilgəyi ilə düyməsi qalıb. Onları da tikim, gəl, apar.

Qurban bir aydan sonra gəlir ki, nə oldu, a kişi?!

Dərzi Qasım dillənir:

- İlgəyini açmışam, düyməsi qalıb. Bir neçə gündən sonra gəl, kostyumu apar.

Bir neçə gündən sonra Qurban yenə gəlir ki, Qasım kişi nə oldu?

Dərzi deyir:

- Sap çürük olduğundan qırılır, düymələri tikə bilmirəm, qoy sağlam sap tapım, düymələri tikim.

Qurbanın ağlına nə gəlirsə, Qasım kişidən soruşur:

- A kişi, artıq parçanın rəngi də yadımdan çıxıb. Tikdiyin kostyumu bir göstər görüm...

Dərzi parçanı necə almışdısa, eləcə də qəzetə bükülü şəkildə çıxarıb göstərir.

Qurban hirslənir:

- Qasım kişi, hanı bəs kostyum? Aradan üç il keçib...

Qasım kişi parçanı onun qarşısına atıb dillənir:

- Bilirsən nə var? Mənim tələsik işlə aram yoxdur. Apar, Həsən dərzi tiksin...

Kəs səsini

- Qurban müəllim, neçə ildir vəzifədəsiniz?

- A bala, institutu bitirən kimi neftbazanın müdiri oldum. Səkkiz il orada işləyəndən sonra zavod direktoru vəzifəsinə keçdim. Düz beş ildən sonra fabrik direktoru təyin olundum. Dörd ildən sonra çörək sexi açdım, beş il də xalqa çörək verdim. Gördüyün kimi, indiki vəzifəm də nazir kimi bir şeydir...

- Müəllim, incimə ha, adamın kimdir?

- Kəs səsini, cüvəllağı! Bir də elə suallar vermə!

Prinsip

Bir kişi millət vəkilinin yanına şikayətə gəlir:

- Düz on ildir altı qoyunumu oğurlayıblar, teleqram vurmadığım, şikayət etmədiyim yer qalmayıb, oğruları tapa bilmirlər.

Millət vəkili soruşur:

- Haralara yazmısan, a kişi?

- Kremldən tutmuş, xarici ölkələrin səfirliklərinə qədər hər yerə! Budur, bu da yazışmaların surətləri!

Millət vəkili sənədlərə baxıb heyrətlənir:

- A kişi, sən ki, bunlara iyirmi qoyunun pulunu xərcləmisən, elə gedib qoyun alaydın da...

Kişi dillənir:

- Bəs, prinsip? Heç bilirsən "prinsip" nədir, bacıoğlu?..

Əzrayılın yadından çıxıb

Teatrda səksən yeddi yaşında, üzündən nur yağan, qocaman bir aktyor çalışırdı. Cavan sənətkarların hamısı onu sevirdi, o da daim gənclərlə birlikdə olur, söhbət edir, gülüb-danışırdı. Kişi bircə gün məşqə gəlməyəndə hamı narahatlıq keçirirdi ki, görəsən nə olub. Qocaman sənətkar yeri gələndə teatrın bütün aktyorları ilə zarafatlaşırdı, aktyorlar da hərdən ona "sataşırdılar". Hamı onun çox yaşamağının sirrini öyrənmək istəyirdi. Heç demə, qocaman aktyor ağzından qaçırmış imiş ki, otuz yeddinci ildə tutulub, beş il türmədə yatıb. Odur ki, səksən yeddi yaşlı aktyorun uzun yaşamağının sirrini kim soruşsa, sənətçi dostları deyirlər:

- Bilirsiniz, otuz yeddidə tutulanların çoxu türmədə ölüb. Əzrayıl elə bilir ki, bu kişi də ölüb gedib. Sonra türmə dağıdılıb, tutulanların siyahısı itib. Beləliklə, bu kişi Əzrayılın yadından birdəfəlik çıxıb...

Dayoğlunun söhbəti

İki qızım vardı, üçüncüsü də oldu. Sevindiyimdən atılıb-düşürdüm. Fikirləşirdim, üç-dörd yaşı olanda saçına lent bağlayacağıq. Əlindən tutub şəhəri gəzdirəcəyik. Bir-birindən gözəl paltarlar alıb geydirəcəyik. Oxşayacağıq, bağrımıza basacağıq. Axı, qız uşağı qəşəng olur, şeytan olur.

Sevincim çox çəkmədi. Dost-tanışlar qızım olduğunu biləndə yerbəyerdən dilləndilər:

- Nə olar qız olanda, canın sağ olsun...

- Ürəyini sıxma, qız da övladdır...

- Heç olmamaqdansa, qız yaxşıdır...

Hətta belə ifadə də işlətdilər: "Başın sağ olsun"! Sanki faciə baş vermişdi. Daha bu "dost-tanışlar" bilmədilər ki, onlardan fərqli olaraq mənim fikrim başqadır. Oğlan uşağını görməyə gözüm yoxdur. Bilirsiniz niyə? Evdə bir kişi olar!

Nəşriyyatda

Cavan oğlan nəşriyyata gəlib nəsr şöbəsinin müdiri ilə görüşdü. Əyləşəndən sonra sıxıla-sıxıla soruşdu:

- Bağışlayın, sizdə böyük əsərlərin çap vəziyyəti necədir?

- "Böyük əsərlər" deyəndə hansı janrları nəzərdə tutursunuz?

- Məsələn, povest, roman...

- Çətindir! Hər adamın povestini, romanını çap etmirik.

- Bəs şeir, hekayə necə?

- Yaxşı şeir, hekayə olanda qəbul edirik. Amma qəbul etmək hələ çap olunacağına söz vermək demək deyil. Yəqin nə isə yazıb gətirmisiniz?

- Yox, yox!

- Üzr istəyirəm, siz indiyədək bir şey yazmısınız?

- Yaxşı ki, heç nə yazmamışam...

Məhkəmə üçün xasiyyətnamə

"Bizim şöbə müdiri son dərəcə ləyaqətli və təmiz adamdır. İşinin öhdəsindən bacarıqla gəlir. Ona görə də yanına təşrif gətirənlər həmişə ona hörmət-izzət göstərirlər. Kim ki, ona hörmət-izzət göstərir, öz işi də düzəlir, başqalarının işini də düzəldir.

Çatışmayan bircə cəhəti var: yanına gələnlərdən nəsə bir hədiyyə istəyir. Dili belə öyrəşib. İndi neynək, allah hərəyə bir xasiyyət verib...

Onun rüşvət almasına qətiyyən inanmayın. Şöbə müdirini verin kollektivin ixtiyarına, kimdən nə alıbsa, qaytaraq sahibinə. Daha o cür gözəl insanı tutub salmayın dama. Dünyanın malı dünyada qalacaq. Hər şeyə görə adamı tutmazlar"...

Yaltağın deyimlərindən

Allah sizi başımızın üstündən əskik eləməsin, rəis!

Siz kəsən başa sorğu-sual olmamalıdır...

Ayağınızın tozu ola bilmərəm...

Balalarımın başını kəssəniz, "of" demərəm!

Həmişə ağsaqqalımsınız...

Başımı hansı səmtə kəssəniz, qanı o səmtə axacaq...

Və sair və ilaxir.

Yaltaqlar yeni deyimlər axtarırlar...

Bu yaxınlarda bir filmə baxdım. Filmdə personajlardan biri o birinə deyir:

- Bəsdir it kimi yaltaqlandın!

O biri cavab verir:

- Mən it deyiləm!

- Səndə itlərdə olan bütün xüsusiyyətlər var, sədaqətdən başqa...

Kim necə danışırdı?

Zəlimxan Yaqub:

(Şair)

"Enli kürəkli, hündür boylu, lopabığlı, çatmaqaş, lay divar, ağır oturan, batman gələn, yerişindən yer titrəyən, nəfəsi göyləri qarsılayan, şax yerişli, şux duruşlu, sərrast addımlı, aydın fikirli, dolu xəzinəli, qaynar sinəli, incə qafiyəli, kövrək deyimli, həssas düşüncəli bir yazıçıydı Süleyman Rəhimov"!

"Təbiət insanın müəllimi və ustadıdır. Çiçəyə baxırsan, açılırsan. Gülə baxırsan, gözəlləşirsən. Qayaya baxırsan, sərtləşirsən. Palıda baxırsan, güclənirsən. Dərəyə baxırsan, dərinləşirsən. Dağlara baxırsan, ucalırsan. Göylərə baxırsan, genişlənirsən. Çeşməyə baxırsan, durulursan. Dənizə baxırsan, dalğalanırsan. Çaya baxırsan, ləngərlənirsən..."

Zeynəb Xanlarova:

(Müğənni)

"Mən bəziləri kimi döyüləm eyyy! Qapıdan bura gələnə kimi yarım saat keçir. Biriynən salamlaşıram, biriynən qucaqlaşıb öpüşürəm, biriynən görüşürəm. Mən hamını sevirəm, hamı da məni sevir. Adım-sanım var. Adamıq də... Yoxsa onun kimi? Özünü elə çəkir, elə bil alçaq dağları bu yaradıb! Adama deyərlər, bapbalaca vəzifən var də... Kişi onu oradan qovsaydı, nə olardı! Canımı qurban edərdim o kişiyə! Eləmir də... Eləmir!!! Nə tikan çıxardı ürəyimizdən"!

Bəxtiyar Vahabzadə:

(Şair)

"İlahi, bu fikri necə də gözəl deyib, sözü necə oynadıb? Bundan gözəl necə demək olar, mən inana bilmirəm. Bu insanın dili deyil, bu artıq, Allahın dilidir! Şair Allahın dili ilə danışır!

Mən onun şeirlərini oxudum, dəhşətə gəldim. Əllərimnən başımı tutdum. İnsanda nə qədər güc olarmış pərvərdigarə"!

Mirmahmud Fəttayev:

(Sabiq millət vəkili)

"Hörmətli sədr! Mən sizi heç vaxt dəstəkləməmişəm. Heç seçiləndə də dəstək verməmişəm. Amma bu gün bircə düz söz danışdınız, ona görə sizi dəstəkləyirəm. Gələcəkdə dəstəkləyəcəyimə söz vermirəm".

Xeyrəddin QOCA

DİGƏR XƏBƏRLƏR

Tarix: 14.08.2026 / 14:03

Əfsanədən gerçəkliyə uzanan 5 minillik tarix - Troya

Tarix: 13.08.2026 / 22:41

Macarıstanda Yupiterə həsr olunmuş qurbangah aşkarlandı

Tarix: 13.08.2026 / 18:49

Müharibə aparan ölkələrə "Avroviziya” qadağası - Təşkilatçılar qərar verdi...

Tarix: 13.08.2026 / 16:00

Məşhur rejissorların teatr premyeraları və əfsanəvi tamaşaları Bakı Beynəlxalq İncəsənət Festivalında nümayiş olunacaq

Tarix: 11.08.2026 / 12:34

Pianonun düymələrində saxlanmış bir Vətən: Züleyxa Abdullayevanın səsi insanlara bu cür çatır

Tarix: 10.08.2026 / 12:48

Yunus Oğuz – Tarixi romanın müasir nəfəsi

Tarix: 09.08.2026 / 11:50

50 illik yubileyidir, yoxsa bu da yeni zarafatıdır...

Tarix: 07.08.2026 / 12:34

Türkiyənin UNESCO-nun Dünya İrsinin İlkin Siyahısına daxil edilən unikal tarixi abidəsi - Kadıkalesi

Tarix: 06.08.2026 / 22:08

Azərbaycan Mədəniyyəti sosial platforması Yayfest-də uğurla çıxış edib...

Tarix: 05.08.2026 / 20:10

Rayon teatrlarında direktorlar və müavinlər seçilir, ya təyin edilir...

Tarix: 05.08.2026 / 14:15

Musiqi terapevti soydaşımızdan Türkiyədə unudulmaz sənət gecəsi...

Tarix: 04.08.2026 / 20:47

Xarici sərmayiçilər kinomuza 12 milyon dolları necə yatırıb?...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 13.08.2026 / 21:44

Ərdoğan “Məkkə sazişi”nin arxasındakı sirri açdı - Ekspertlər şübhə ilə baxır...

Tarix: 13.08.2026 / 20:16

Avropa Birliyinin Naxçıvan dəmir yollarında marağının görünən və görünməyən tərəfləri...

Tarix: 13.08.2026 / 15:30

İrəvanda Azərbaycan təbii qazına qarşı ikitərəfli kampaniya başladı...

Azərbaycanda vətəndaş cəmiyyətinin inkişafında rəqəmsallaşma və innovasiyalar ön plana çıxır