Ağır xəstəliyə düçar olmuş 33 yaşlı istedadlı aşıq indi hamıdan kömək gözləyir...

Azərbaycan aşıq sənətinin inkişafında xüsusi xidmətləri olan aşıq Xanlar Məhərrəmovun oğlu, müasir dövrümüzdə görkəmli saz solo ifaçılarından biri kimi tanınan aşıq Azər Xanlaroğlunun səhhətində ciddi problem yaranıb. Qeyd edək ki, 33 yaşlı gənc aşıq Azər Xanlaroğlu hazırda 1 saylı Şəhər Klinik Xəstəxanasına yerləşdirilib.
Bu barədə "Bakı-Xəbər"ə Azər Xanlaroğlunun bacısı oğlu Süleyman Məmmədli məlumat verib. S.Məmmədli bizimlə söhbətində bildirdi ki, millət vəkili Qənirə Paşayevanın köməkliyi ilə aşıq Azər 1 saylı Şəhər Klinik Xəstəxanasına yerləşdirilib: "Aşıq Azərin vəziyyəti ağırdır, ürəkaçan deyil. Qənirə xanımın köməkliyi ilə dayım artıq xəstəxanaya yerləşdirilib, reanimasiya şöbəsindədir. Müalicə dövlət hesabına həyata keçirilir".
S.Məmmədli onu da bildirdi ki, A.Xanlaroğlunun müalicəsi ilə əlaqədar müvafiq qurumlara müraciət hazırlanacaq.
Qeyd edək ki, 33 yaşlı məşhur aşıq 3 ildir "Hepatit B" xəstəliyindən əziyyət çəkir. Aşığın yaxın dostu şair Ehtiram İlham yerli mətbuata açıqlamasında Azərin xəstəliyinin artıq son həddə çatdığını bildirib: "Aşıq Azər Xanlaroğlu bu gün bir neçə xəstəliklə çarpışır. "Hepatit B" xəstəliyindən də əziyyət çəkən aşığın ayaqları şişdiyi üçün yerindən tərpənə bilmir.
Yataqdan qalxa bilmədiyi, ayaq üstə durmaq mümkün olmadığı üçün məclislərdə iştirak edə bilmir, maddi sıxıntı çəkir. Xəstəliyinin müalicəsi mümkündür, amma maddi vəziyyət buna imkan vermir. Buradan saza, sözə qiymət verən insanlara səslənirəm ki, Azəri xilas edək, Allah uzaq eləsin, onu itirə bilərik...".
Şair Ehtiram İlham qeyd edib ki, Azərin səhhəti ilə bağlı narahat olan, kömək əli uzatmaq istəyən xeyli sayda insan var və onlar aşıq Azərin müalicəsi üçün hesab nömrəsi vasitəsilə yardım edə bilər.
Onu da vurğulayaq ki, aşıq Azərin müalicəsi üçün bir neçə gün əvvəl "Bank Respublika"da hesab açılıb. Qeyd edək ki, hesaba MİLLİ ÖN terminalları vasitəsilə istənilən yerdə ödəniş etmək mümkündür. MİLLİ ÖN vasitəsilə ödəniş etmək üçün "Bank Respublika"nın kodu - 380194401151751001, şəxsiyyət vəsiqəsinin seriya nömrəsi - 14040620.
İnanırıq ki, əlaqədar qurumlar, eləcə də Mədəniyyət və Turizm Nazirliyi, Səhiyyə Nazirliyi aşıq Azərin səhhətində yaranan ciddi problemə biganə qalmayacaq.
Allah kömək olsun!
İradə SARIYEVA