2015-ci ilin 21 oktyabr tarixində Macarıstanın Budapeşt şəhərində Womex-Dünya Musiqisi Exposunun açılış mərasimi keçirilib.
Tədbirdə ölkəmizi Mədəniyyət və Turizm Nazirliyinin Mədəniyyət müəssisələri və xalq yaradıcılığı şöbəsinin Muzey işi və mədəniyyət sərvətlərinə nəzarət sektorunun aparıcı məsləhətçisi Nərgiz Abdullayeva və "Natiq" Ritm Qrupunun musiqiçiləri təmsil edir. Expo-da Mədəniyyət və Turizm Nazirliyinin təşkilatçılığı ilə Azərbaycan musiqisinə və milli musiqi alətlərinə həsr olunmuş sərgi böyük marağa səbəb olub. 1994-cü ildən bu günədək bu tədbirdə ölkəmizdən Baba Mahmudoğlu, Zabit Nəbizadə, Qoçaq Əsgərov, Mənsum İbrahimov, "Quba" və "Qarabağ" ansamblları, caz ifaçısı Elçin Şirinov iştirak ediblər.
Bu il Expo çərçivəsində Azərbaycan pavilyonu fərqli tərtibatla tamaşaçıların böyük marağına səbəb olub. Gələn qonaqlara Azərbaycanın milli musiqisinin təbliği məqsədilə kitablar, CD disklər paylanır, xüsusi hazırlanmış Azərbaycan loqosu ilə USB-lər və müxtəlif rəngli çətirlər hədiyyə olunur.
Cari ilin 22 oktyabr tarixində Womex çərçivəsində keçirilən konsertlər sırasında Müpa adlı konsert salonunda "Natiq" Ritm Qrupunun solo konserti təşkil olunub. Konsertə böyük tamaşaçı kütləsi gəlib və musiqiçilərin çıxışı maraqla izlənib. Konsertdən sonra "Natiq" Ritm Qrupu tədbirə qatılan dünya musiqi festivallarına və bir sıra Expolara dəvət alıb.
23 oktyabr tarixində sərgi zamanı Azərbaycan pavilyonunda qonaqlar üçün "Happy hour" adlı tədbir keçirilib. Tədbirdə Azərbaycan mətbəxinin təbliği məqsədilə paxlava, milli şərablar və s. təqdim edilib.
Bildiririk ki, tədbir oktyabr ayının 25-dək davam edəcək.
Gülnaz ÇƏLƏBİYEVA
