Almaniyanın Frankfurt-Mayn şəhərində keçiriləcək dünyanın ən nüfuzlu Beynəlxalq Kitab Sərgisində Mədəniyyət və Turizm Nazirliyi təmsil olunacaq. Bu barədə Mədəniyyət və Turizm Nazirliyi məlumat yayıb. Məlumata görə, 14-18 oktyabr 2015-ci il tarixdə Almaniyanın Frankfurt-Mayn şəhərində dünyanın ən nüfuzlu Beynəlxalq Kitab Sərgisi keçiriləcək. Sərgidə ölkəmizi mədəniyyət və turizm nazirinin birinci müavini Vaqif Əliyevin rəhbərlik etdiyi nümayəndə heyəti təmsil edəcək.
Azərbaycan Respublikası Mədəniyyət və Turizm Nazirliyi hər il xarici ölkələrdə keçirilən beynəlxalq kitab sərgilərinin iştirakçısı olur, Azərbaycan nəşrlərini dünyada təmsil və təbliğ edir.
Beynəlxalq sərgilər sırasında Frankfurt Kitab Sərgisi özünün nüfuzu, iştirakçı və ziyarətçilərin sayının çoxluğu, dünyanın müxtəlif kitab mədəniyyətlərinin görüşü baxımından əlamətdardır. Hər il təşkil olunan bu sərgiyə, demək olar ki, bütün ölkələrdən iştirakçılar gəlir.
İndiyə kimi bu sərgidə nazirliyin xəttilə ölkəmiz bir neçə dəfə təmsil olunub və hər zaman Azərbaycan stendi, Azərbaycan kitabları istər əcnəbilərin, istərsə də xaricdə yaşayan türkdilli xalqların geniş marağına səbəb olub, çoxlu sayda ziyarətçi cəlb edib.
Keçiriləcək sərgidə 60 kv.m. ərazidə, xüsusi dizaynlı stendlə təmsil olunmağımız, Azərbaycan Respublikasının Prezidenti cənab İlham Əliyevin Sərəncamına əsasən "Kitabi-Dədə Qorqud"un alman alimi Fridrix fon Dits tərəfindən ilk tərcüməsi, nəşri və dünya elm aləminə tanıdılmasının 200 illiyi ilə bağlı müvafiq tədbirin keçirilməsi, kitab və digər nəşr məhsullarının, Azərbaycan yazıçıları ilə görüşlərin, kitab təqdimatlarının təşkili mədəniyyətimizin təbliğatı baxımından uğurlu imkan yaradır.
