Son illər Azərbaycanda kitabxana sisteminin müasir standartlara uyğun qurulması işinə başlanıb. Demək olar ki, həm paytaxtda, həm də bölgələrdə kitabxana sistemi yenidən qurulub, maddi-texniki bazasının gücləndirilməsi həyata keçirilib.
Bu gün, Bakıda olduğu kimi, rayon və kənd kitabxanaları da həm kitablarla, həm də texniki vəsaitlə təmin edilib, əksəriyyəti təmir edilərək oxucuların ixtiyarına verilib. Mədəniyyət və Turizm Nazirliyindən verilən xəbərə görə, nazirliyin tapşırığına əsasən, regionlarda yeni avtomatlaşdırılmış kitabxana sistemi olan ALİSA proqramının tətbiqi ilə bağlı Milli Kitabxanada 10 günlük treninqlər təşkil olunub. Onu da qeyd edək ki, avqustun 24-də bu qəbildən beşinci treninq başlanıb. Xızı, Şabran, Şamaxı, Ağsu, İsmayıllı, Yardımlı, Balakən, Lənkəran, Nərimanov, Səbail və Xətai Mərkəzləşdirilmiş Kitabxana Sistemlərinin mütəxəssisləri treninqdə həm MARC 21 formatını öyrənəcək, həm də ALİSA-da iş vərdişlərini mənimsəyəcək. Milli Kitabxananın direktoru, professor Kərim Tahirov iştirakçılarla görüşündə treninqin "Ultra Technologies" şirkətinin mütəxəssisləri ilə birgə aparıldığını diqqətə çatdırıb. O, iştirakçıları 10 gün müddətində treninqdən maksimum bəhrələnməyə çağırıb.
Dinləyicilər Milli Kitabxananın iş prosesi ilə də yaxından tanış olacaq, kitabxanada olan yeni iş üsulları, yeni xidmət növlərini əyani izləyəcək. Treninqin sonunda iştirakçılara müvafiq sertifikatlar veriləcək.
Avqustun 21-də Milli Kitabxanada ALİSA proqramının test rejimi ilə işləyən Səbail, Nərimanov və Xətai rayon MKS-ləri üçün monitorinq keçirilib. Monitorinqdə Milli Kitabxananın direktoru Kərim Tahirov, direktor müavini Elçin Musayev, kitabxananın əməkdaşları, "Ultra Technologies" şirkətinin işçisi Sərxan Məmmədov və MKS-lərin bu proqramla işləyən mütəxəssisləri iştirak ediblər. Onu da vurğulayaq ki, Milli Kitabxananın direktoru ALİSA proqramının üstünlüklərindən danışıb, Milli Kitabxananın bazasının bütün şəhər, region, hətta kənd kitabxanaları üçün əlçatan olacağını qeyd edib. Monitorinq zamanı məlum olub ki, proqramın ilkin variantında mövcud olan nöqsanlar tam aradan qaldırılıb. Kəhnə bazada olan materialların yeni məlumat bazasına köçürülməsi işi həyata keçiriləcək və bütün kitabxanalar ALİSA proqramının tam, təkmilləşdirilmiş yeni variantı ilə işləyəcək.
Tədbirdə o da qeyd olunub ki, respublikanın şəhər və rayon MKS-lərinin 50 faizdən çoxu yeni proqram və yeni format üzrə treninqlərdən keçib və sentyabrın 10-dan başlayaraq bütün MKS-lərdə ALİSA proqramı tətbiq olunacaq.
Leyla QARAXANLI
