Məlum olduğu kimi, Azərbaycan Yazıçılar Birliyi (AYB) 21 nəfərə mənzil verib. Mənzil alan AYB üzvlərinin adları artıq açıqlanıb. Şair Dəyanət Osmanlı, dramaturq Elçin Hüseynbəyli, şair Elxan Zal, yazar Ülviyyə Heydərova, gənc şair Ulucay Akif, Vaqif Əlixanlı, Aləmzər Sadıqqızı, Narıngül Nadir, Gülxani Pənah və başqaları ev alanlar sırasındadır.
AYB-nin mənzil bölgüsündən bir sıra yazarlar narazı qalsa da, bunu təqdir edənlər də yox deyil. Mənzil alanlar, təbii ki, çox sevinirlər. Ev onların ümid yeri, sığınacağıdır.
AYB üzvlərinə mənzil verilməsini təqdir edənlər sırasında millət vəkili, tanınmış yazıçı Aqil Abbas da var. O, mətbuata açıqlamasında yazıçılara dövlət tərəfindən ev verilməsinə çox sevindiyini bildirib: "Kimliyindən asılı olmayaraq, Allah ev alanların hamısına o evlərdə toy etməyi nəsib etsin, xoş günlər keçirsinlər. Hər halda yazıçıları qiymətləndiriblərsə, bundan gözəl nə ola bilər axı?! 20 nəfərin ev aldığı deyilir. 20 nəfər Yazıçılar Birliyinin bir faizi deməkdir. Anlayıram, yazıçılar arasında da pisi-yaxşısı var. Amma dövlət onu sevindirirsə, niyə narazı olmalıyıq?"
Deputat deyib ki, ev alanlar arasında gənc yazıçı Ulucay Akifin də ad var: "Ulucay Akifə ev verilməsindən gözəl nə ola bilərdi? Akif Səmədin oğluna ev verilməsinin nəyi pisdir axı? Adam gəncdir, nənəsinin evində qalır. Doğrudan Ulucay xəbərini eşidəndə çox sevindim. İstedadlı oğlandır, atası Akif də istedadlı şair, yaxın dostlarımdan idi. Yazırlar, birinin filan qədər evi var, digərinin filan şeyi var. Hə, nə olsun? Allah xoş söz deyənlərdən razı olsun, tənqid edənlərə də kömək etsin".
AYB-nin mənzillə təmin etdiyi 21 nəfərdən biri də şair, jurnalist, AYB üzvü (1996), AYB-nin İdarə Heyətinin üzvü Dəyanət Osmanlıdır.
Dəyanət Osmanlı: "İnsan bir-birinin yaxşı gününə sevinməyi bacarmalıdır"
"Narazılar həmişə ədalətsizlikdən danışırlar. Amma özlərinin fikirlərində nə dərəcədə haqlı-haqsız olduqlarını bilmirlər. İnsan bir-birinin yaxşı gününə sevinməyi bacarmalıdır. 30-40 il dözüb ev alan yazıçı həmkarlarına kin-küdurət, qarğış yazanlar mənəvi cəhətdən kasad adamlardı. O qarğışlar başlarında çatlar, inşallah. Onlar heç zaman yaxşı nəsə düşünə, yaza və xeyirxah münasibət sərgiləyə, böyük-kiçik yeri bilməzlər. O çamurçuların səviyyəsinə enmək istəmirəm. Amma yerlərini tanıtdıram: Adları "it dəftəri" nə də layiq deyil. AYB həmişə imkanlarına görə və bəzən imkandan daha artıq səviyyədə üzvlərinin sosial durumunu yaxşılaşdırmağa çalışıb. Anar müəllim isə sədrliyi dönəmində yazarlara, xüsusən də gənclərə çox böyük qayğı göstərib. Ancaq təəssüf ki, bəzən xeyirxahlığı müqabilində haqsız hücumlar görüb. Yenə də böyük humanistlik edərək onları bağışlayıb, hətta mükafat, ev, təqaüd almalarına kömək edib. Nə qədər evsizləri, imkansızları sevindirib, eyni zamanda, Birliyin nüfuzunu da qoruyub saxlayıb, bu göz qabağındadır". Bunu "Bakı-Xəbər"ə açıqlamasında Dəyanət Osmanlı deyib.
D.Osmanlının sözlərinə görə, uzun illər növbədə olan yazarlara bu günlərdə evlərin paylanması da növbəti xeyirxah addımdır: "Əlbəttə, hamını eyni vaxtda evlə təmin etmək mümkün deyil. Mən başqa həmkarlarımıza da sevinməyi arzu edirəm. Ümidvaram ki, bu da zamanında gerçəkləşər".
D.Osmanlı əlavə etdi ki, elələri də var, cəmi bir neçə ildir AYB üzvüdür, ortaya bir səviyyəli əsər qoymayıb, üstəlik növbəsi də yoxdur, amma hansısa haqdan danışır. "Məlumatı dəqiqləşdirmədən 30-40 illik üzvlüyü, sosial ehtiyacı olan, tanınmış yazaların ünvanına hədyanlar söyləyirlər. Belələri həm yazıçılar mühitini qarışdırmaq istəyir, həm də sosial media vasitəsilə cəmiyyətə neqativ ötürürlər. Onları öyrədib meydana salanlar var, yoxsa ki, ədəbiyyatda nə işləri, rolları ola bilər?!" - deyə D.Osmanlı qeyd etdi.
Ülviyyə Heydərova: "Anar müəllim olmasaydı, heç bu mənzillər də olmayacaqdı"
Yazıçı-darmaturq Ülviyyə Heydərova da "Bakı-Xəbər"ə açıqlamasında sevincini ifadə etdi. "2016-cı ildə "Kirayə arzular" adında avtobioqrafik romana başlamışdım. Bu, kirayə qaldığım evlər və otaq yoldaşlarım haqqında idi. O vaxt sayca onuncu evdə idim, indi on dördüncü evdəyəm. Həm işlər çox oldu, həm də düzü, həvəsdən düşdüm. Adətən mən yazının finalını öncədən bilirəm deyə, rahat yazıram. Bircə "Kirayə arzular"ın finalını bilmədiyimə görə əsəri yarımçıq saxladım. Əzizlərim, dünən "Kirayə arzular"ın gözəl finalı oldu. Azərbaycan Yazıçılar Birliyi bəzi üzvlərini, o cümlədən də məni - 24 ildir kirayələrdə arzularla yaşayan insanı birotaqlı mənzillə təmin etdi. Kirayə evlərdə nə qədər qızdırıcı olsa belə insan içində isinmir. Çünki orda təkcə bədənin yox, ruhun da üşüyür. Xalq yazıçısı Anara nə qədər təşəkkür etsəm azdır. Ona bir ömür minnətdaram! Çünki o mənim 24 illik həsrətimə son qoydu. Ömrümdə ikinci dəfə idi ki, sevincdən ağlayırdım. Bir Şuşa işğaldan azad olanda, bir də evlə bağlı xəbəri eşidəndə. Çünki hər ikisini illərlə arzulamışam. Hətta dostlarım, doğmalarım da bu xəbəri eşidəndə göz yaşlarını saxlaya bilmədilər.
Ev xəbərini eşidəndə əziz dostum Günel Eminlini düşündüm, onun ruhunun nə qədər şad olduğunu hiss edirəm. Eminesko elə mən qədər bu evi arzulayırdı. Bax, indi sağ olsaydı, səhər açılandan yüz dəfə zəng edərdi, tort alıb bizə gələrdi...
Əziz dostlar, tam əminliklə bilirəm ki, mənim sevincim sizin də sevincinizdir. Bayaqdan bu sevincin şahidi oluram. Bilirəm ki, əlacınız olsa, məni təbrik etmək üçün sabah yeni evimə gələrsiniz. Amma bunun üçün bir qədər (ya bir il, ya iki il) səbr eləməli olacaqsınız. Əvvəla bina hələ təhvil verilməyib. İkincisi, mənzil təmirsiz veriləcək. Təmir qiymətlərinin nə qədər yüksək olduğunu bilirsiniz. Deyirlər, evlənənlə ev tikənin işini allah düzəldir. Allah mənə də kömək olar...
Müasir Azərbaycan ədəbiyyatının istedadlı nümayəndələrindən olan, "Ulduz" jurnalının əməkdaşı Təranə Vahidin və tərcüməçi, uzun illərdir iki övladı ilə kirayələrdə qalan Sevil Gültənin siyahıda olmamasına çox təəssüfləndim. İnanıram ki, onların da mənzil problemi qısa zamanda həll olunacaq. Özüm də daxil, mənzillə təmin olunanlara qısa zamanda sağ-salamat evlərini təmir edib yaşamalarını arzulayıram!"-deyə Ü.Heydərova bildirdi.
Ü.Heydərova sonda bir daha Azərbaycan Yazıçılar Birliyinin sədri, Xalq yazıçısı Anara minnətdarlığını bildirdi: "Anar müəllim olmasaydı, heç bu mənzillər də olmayacaqdı. Onu da qeyd edim ki, Anar müəllim yazıçıları ən çox mənzillə təmin edən AYB sədridir".
İradə SARIYEVA
