Şahbaz Xuduoğlu: "Təkərli Kitab dükanı"nın Bakı Beynəlxalq Kitab sərgisində təqdimatına icazə verilməsə, "Qanun" nəşriyyatı olaraq bu sərgidə iştirakdan imtina edəcəyik"
Mədəniyyət Nazirliyinin təşkilatçılığı ilə IX Bakı Beynəlxalq Kitab Sərgisi keçiriləcək. 11-15 noyabr tarixlərində keçiriləcək beynəlxalq sərgidə "Qanun" nəşriyyatının direktoru Şahbaz Xuduoğlu məşhur "Təkərli kitab dükanı"nı təqdim etmək istəyir, lakin Mədəniyyət Nazirliyi buna razılıq vermir. Bu barədə Ş.Xuduoğlu Feysbuk səhifəsində məlumat verib.
"Təkərli kitab dükanı"nı Bakı Beynəlxalq Kitab sərgisində təqdimatını etmək istəyirik. Mədəniyyət Nazirliyi icazə vermir. "Təkərli kitab dükanı" sosial layihədir, öz hesabımıza başa gəlib. Kənar bir qəpik dəstək olmayıb. Oxucuların təşəkkürü, uşaqların sevinən baxışlarından başqa heç kimdən heç nə gözləmirik...
Məqsədimiz regionlara, kəndlərə gedib kitabı təbliğ etməkdir. Bu, Vətənimizə, insanımıza, mədəniyyətimizə və dövlətimizə sevgidən irəli gəlir.
Bakı Beynəlxalq Kitab Sərgisində 74m² yer üçün biz 12 min manat pul ödəmişik. "Təkərli kitab dükanı"nın təqdimatını da salonda yox, həyətdə, parkinq yerində etmək istəyirik.
Amma Mədəniyyət Nazirliyi buna icazə vermir. Bu elə Fatmayidə Mədəniyyət evinin müdirinin davranışına bənzəyir..." - deyə Ş.Xuduoğlu qeyd edib.
"Qanun" nəşriyyatının "Təkərli kitab dükanı"nın təqdimatına Mədəniyyət Nazirliyi niyə icazə verməyib? Nazirlik icazə verməməsinə səbəb kimi nəyi göstərib? Əslində bu çox maraqlı layihədir, nəyi əsas gətirib icazə vermədilər?
Bu sualları həm Mədəniyyət Nazirliyinə, həm də "Qanun" nəşriyyatının rəhbəri Şahbaz Xuduoğluna ünvanladıq.
Mədəniyyət Nazirliyindən bildirdilər ki, sorğunuz qeydə alınıb və aidiyyəti şöbə tərəfindən cavablandırılacaq.
"Nazirlik əsas gətirir ki, bizim orada bu layihənin təqdimatını keçirməyimizə Ekspo Mərkəzi icazə vermir"
Ş.Xuduoğlu "Bakı-Xəbər"ə "Nazirlik əsas gətirir ki, bizim orada bu layihənin ("Təkərli kitab dükanı"nın) təqdimatını keçirməyimizə Ekspo Mərkəzi icazə vermir. Mən noyabrın 7-də nazirlikdə məsul şəxslərlə görüşdüm, dəvət etmişdilər. Onlar deyirlər ki, Ekspo Mərkəzi icazə vermir. Mən də dedim ki, Ekspo Mərkəzi necə icazə verməyə bilər? Bu mümkün deyil? Bu nazirliyin tədbiridir. Biz bir salonu götürürük və orada bir tədbir keçiririk. Bizim maşınlar da salonun qabağına parking yerində dayanırlar. Mən gəlib park yerində "Təkərli kitab dükanı"ı təqdim etmək istəyirəm, nazirlik də bunu istəməlidir" - deyən Ş.Xuduoğlu qeyd etdi ki, indiyə qədər belə bir layihə olmayıb və bu çox maraqlı layihədir. Bu layihə ilə bağlı Türkiyə Kültür Bakanlığından ona zəng edildiyini deyən Ş.Xuduoğlunun sözlərinə görə, onu bu işə görə təbrik ediblər və layihəni dəstəklədiklərini, bəyəndiklərini bildiriblər: "Dedilər ki, nə gözəl layihədir, Türkiyədə də belə bir layihə həyata keçirmək istərdik. Çox müsbət reaksiyalar var. Mən eyni reaksiyanı Mədəniyyət Nazirliyindən də gözləyirəm ki, bu layihəni dəstəkləsin, həmçinin də təqdimatının keçirilməsinə şərait yaratsın. Gələcəkdə "Təkərli kitab dükanı"nın sayını artırmaq olar. Bu layihəni təqdim etmək lazımdır, onun qarısını almaq lazım deyil. Bu, Mədəniyyət Nazirliyinin birbaşa işidir ki, bunu təbliğ və təqdim etsin, ona mane olmasın".
"Danışıqlar nəticə verməsə və təqdimatı keçirə bilməsəniz hansı addımlar atmaq fikrindəsiniz?"-deyə Ş.Xuduoğlundan soruşduqda onun cavabı belə oldu: "Əgər "Təkərli Kitab dükanı"nın Bakı Beynəlxalq Kitab sərgisində təqdimatına icazə verilməsə "Qanun" nəşriyyatı olaraq bu sərgidə iştirakdan imtina edəcəyik. Ümumiyyətlə bu sərgiyə qatılmayacağıq. Hazırda sərgiyə hazırlıq gedir, amma müraciətimizə yenə müsbət cavab verilməsə biz iştirak etməyəcəyik.
Bakı Beynəlxalq Kitab Sərgisində layihənin təqdimatı alınmasa biz ayrıca bir kitab sərgisi keçirəcəyik, orada həm də "Təkərli Kitab Dükanı"nın təqdimatını təşkil edəcəyik. Biz hazırda alternativ yer axtarışındayıq, o yer bəlli olan kimi bu barədə açıqlama verəcəyik" - deyə Ş.Xuduoğlu qeyd etdi.
Yazı çapa hazırlanana qədər Mədəniyyət Nazirliyindən sorğumuza cavab verilmədiyi üçün onu mətndə işıqlandıra bilmədik, nazirlik nə zaman cavab verərsə, qurumun da mövqeyini təqdim edəcəyik.
İradə SARIYEVA
