16/06/2019 17:28
728 x 90

Yeni iqtisadi modelə keçid – Bir il əvvəl Prezidentin vədi ümumi komanda hədəfinə çevrildi...

“Bu modelin də rüşeymləri ondan ibarətdir ki...”

img

Azərbaycanda yeni iqtisadi modelə keçid artıq reallaşmaq üzrədir. Xatırladaq ki, bunun ilk anonsunu bir müddət əvvəl Bakının Kürdəxanı qəsəbəsində məcburi köçkün ailələri üçün yeni yaşayış kompleksinin açılışında Prezident İlham Əliyev vermişdi: “Seçkilər ərəfəsində bildirmişdim ki, biz yeni iqtisadi modelə keçid edəcəyik, bütün sosial məsələlərin həllinə çalışacağıq. Yəni ciddi islahatların, iqtisadi və sosial sahədə islahatların anonsu prezident seçkiləri ərəfəsində verilmişdir. Seçkilərdən sonra ciddi islahatlara start verildi. Bu islahatlar çoxşaxəlidir.

Verdiyim qərarlar, imzaladığım sərəncamlar həyatımızın hər bir sahəsinə müsbət təsir göstərəcək. Ölkəmiz yeniləşir, müasirləşir. Biz yeni iqtisadi model üzərində işləyirik və elə etməliyik ki, ölkə iqtisadiyyatı bundan sonra da dayanıqlı şəkildə inkişaf etsin. Biz bütün dövrlərdə, hətta böhranlı illərdə də sosial məsələlərə böyük diqqət göstərmişik. 2015-2016-cı illərdə dünyada baş vermiş iqtisadi böhran bütün ölkələrə təsir etmişdir, o cümlədən bizə. Təsəvvür edin, bizim gəlirlərimiz 3-4 dəfə azaldı. Yəni faizlərlə ölçülmürdü, dəfələrlə ölçülürdü. Bu, hər bir ölkə üçün böyük imtahandır, böyük sınaqdır. Əlbəttə ki, görülən operativ tədbirlər nəticəsində biz o böhranın fəsadlarını minimum səviyyəyə endirə bildik və ondan sonra ciddi addımlar ataraq iqtisadi sabitliyi qoruya bildik, inkişaf templərinə qədəm qoyduq”.

Ölkə başçısının bu çıxışından sonra Azərbaycan Prezidentinin ictimai-siyasi məsələlər üzrə köməkçisi Əli Həsənov yeni iqtisadi modelin nədən ibarət olduğu ilə bağlı məlumat verib. O bildirib ki, yeni model bazar iqtisadiyyatı prinsipləri əsasında hazırlanır və sahibkarlara daha yaxşı şəraitin yaradılmasını nəzərdə tutur. Prezidentin köməkçisi onu da bildirib ki, yeni iqtisadi model həyata keçirilən islahatların davamıdır.

Ə.Həsənovun sözlərinə görə, iqtisadi sahədə həyata keçirilən islahatlar artıq başlanğıc mərhələsində öz effektini verib. Bunun ən bariz nümunəsi vergi və gömrük daxilolmalarındakı artımdır.

Prezidentin köməkçisi sosial islahatlardan da danışıb və bunun davamlı proses olduğunu deyib.

Ə.Həsənov əlavə edib ki, yeni sosial-iqtisadi islahat paketi xalq tərəfindən də dəstəklənir. Bunu Fransanın "Opinion Way" şirkətinin keçirdiyi sorğunun nəticələri də göstərir.

Prezidentin köməkçisi anons edib ki, bütün sahələrdə islahatlar davamlı olacaq. Dövlət artan imkanlarını vətəndaşların rifahına yönəldəcək.

Yeni iqtisadi modelə keçid daha hansı üstünlükləri vəd edir?

  • Tahir Mirkişili: “Aparılan islahatlar və yeni modelə keçid həm vətəndaşların mənafeyinə xidmət edir, həm iqtisadiyyatı gücləndirir, həm də insanların gələcəyə inamını artırır”

Millət vəkili Tahir Mirkişili “Bakı-Xəbər”ə açıqlamasında bildirdi ki, dünyada ən yeni və uğurlu iqtisadi model kimi sosialyönümlü bazar iqtisadiyyatı modeli sayılır: “Bu modelin də rüşeymləri ondan ibarətdir ki, bazar iqtisadiyyatının bir çox hallarda həll edə bilmədiyi sosial məsələlər dövlətin müdaxiləsi və tənzimləməsi ilə öz həllini tapır. Yəni vətəndaşların xeyrinə həll edilir. Dünyada gedən prosesləri də yaxından izləsəniz görərsiniz ki, insanlarda daha çox sosial qayğıya  ehtiyac dövlətlərin rolunu da getdikcə dəyişməkdədir. Azərbaycanda həyata keçirilən iqtisadi islahatların əsas məqsədlərindən biri məhz sosialyönümlü bazar iqtisadiyyatı modelinin tapılmasına yönəlib. Bunun da iki mühüm səbəbi və nəticəsi var. Əsas səbəb ondan ibarətdir ki, sosialyönümlü iqtisadiyyatı qurmaq üçün dövlət iqtisadi cəhətdən çox güclü olmalıdır, vətəndaş dövlətə inanmalıdır, eyni zamanda, iqtisadi resurs və potensial kifayət qədər olmalıdır. Biz son iki ayın nəticəsinə baxsaq görərik ki, iqtisadiyyatımız böyüyür və inkişaf edir. Ümumdaxili məhsul 3 faiz , qeyri-neft sənayesi 15 faiz  artıb. Ölkəmiz turizmdən iki milyard dollardan çox gəlir əldə edib, inflyasiya isə cəmi iki faiz təşkil edib. Yəni neft sektoru ilə yanaşı, qeyri-neft sektoru və alternativ gəlir mənbələri də artıb. Bu da islahatların aparılmasında mühüm sayılan faktordur. Fransanın “Opinion Way” şirkətinin apardığı son rəy sorğusu da göstərdi ki,  respondentlərin 90 faizi cənab Prezidentin həyata keçirdiyi islahatları dəstəkləyir. Bu onu deməyə əsas verir ki, aparılan islahatlar və yeni modelə keçid həm vətəndaşların mənafeyinə xidmət edir, həm iqtisadiyyatı gücləndirir, həm də insanların gələcəyə inamını artırır.  Sadaladığım üç məsələ yeni iqtisadi modelin başlıca hədəfləridir. Bunun nəticəsində iqtisadiyyat daha dayanıqlı olur, xarici təsir faktorları minimuma endirilir və sonda vətəndaşlarımızın rifahı daha da yaxşılaşır”.

Məhəmmədəli QƏRİBLİ

Son xəbərlər