Nüsrət İbrahimli: “İlkin mənzil bazarında ucuzlaşma onunla bağlıdır ki…”
Son zamanlar daşınmaz əmlak bazarında qiymətlərdə dəyişiklik yaşanır. Ötən illərdən fərqli olaraq, bu il köhnə mənzillərin qiyməti qalxıb. Yeni tikililərin isə qiyməti ucuzlaşıb.
Ev alqı-satqısı ilə məşğul olan maklerlər bildirirlər ki, son zamanlar alıcılar köhnə tikililərdən mənzil almağa üstünlük verirlər. Təbii ki, alıcı marağı hansı sahədə üstünlük təşkil edirsə, qiymət artımı da həmin sahədə özünü göstərər. Yeni tikililərin qiymətinə gəlincə isə, maklerlər qeyd edirlər ki, burada mənzil almağa yerli vətəndaşlar deyil, daha çox xaricilər üstünlük verirlər. Bu da say baxımından azlıq təşkil etdiyi üçün, yeni tikilən mənzillərin satış qiymətinə təsir edir.
Daşınmaz əmlak məsələləri üzrə ekspert Nüsrət İbrahimli bizimlə söhbətində qeyd etdi ki, Bakıda ay ərzində təkrar mənzillərin qiyməti bahalaşıb, yeni mənzillərin qiyməti isə ucuzlaşıb. Onun sözlərinə görə, təkrar mənzil bazarında qiymətlərdə 1.13 faiz, il ərzində isə 5.81 faiz artım olub: “İlkin mənzil bazarında isə qiymətlər ay ərzində 3 faiz azalıb, lakin il ərzində 5.68 faiz artım olub. İlkin mənzil bazarında ucuzlaşma onunla bağlıdır ki, bu mənzillərin qiyməti indiyə kimi kifayət qədər qalxıb və artıq ucuzlaşmağa başlayır".
Həmsöhbətimiz onu da vurğuladı ki, paytaxt Bakıda vətəndaşların mənzil almağa güclü tələbatı var: “Bir tərəfdən əhalinin real gəlirləri mənzil bazarının tələbləri ilə üst-üstə düşmür, digər tərəfdən isə zahirən paytaxtda tikinti gözümüzə çox görünsə də, əslində, onun həcmi olduqca azdır”
N.İbrahimlinin fikrincə, mənzil tikintisinin həcmini azaldan daha bir neçə səbəb var: “Bu səbəblərdən biri ölkədə tikinti aparan şirkətlərin tam qaz, işıq, su, kanalizasiya təminatına cavab verməməsidir. Bəzən elə olur ki, şirkətlər belə tələblərə cavab vermədikləri üçün tikinti aparmaqdan yayınırlar”.
Ekspert onu da qeyd etdi ki, həyət evlərinin qiymətində bahalaşma yaşanır. Onun sözlərinə görə, həyət və bağ evlərinin qiymətində ay ərzində 4.75 faiz, il ərzində 2.18 faiz artım olub: “Artım mövsümi xarakter daşıyır. Yay mövsümü yaxınlaşdıqca, həyət və bağ evlərinə tələbat artır”.
Günel CƏLİLOVA
