Əli Əlirzayev: “Hər il olduğu kimi, əhalinin gəlirləri inflyasiyanı üstələyir və beləliklə, bu, bilavasitə insanların yaşayış səviyyəsinə müsbət təsir göstərir”
Asiya İnkişaf Bankı (ADB) Azərbaycanda inflasiyanın hansı səviyyədə olacağı barədə məlumat yayıb. Açıqlanan məlumatda qeyd olunur ki, 2019-cu ildə Azərbaycanda inflyasiya 4 faiz, 2020-ci ildə isə 5 faiz səviyyəsində olacaq.
Bankın ekspertləri cari ildə Azərbaycandakı 4 faizlik inflyasiyanı əməkhaqlarının artırılması nəticəsində daxili tələbatın da artımı ilə əlaqələndirirlər. Bunun da nəticəsində 2020-ci ildə inflyasiya səviyyəsi 5 faizədək artacaq.
Qeyd edək ki, ölkədəki inflyasiyanın 2017-ci ildə 12,9 faizdən 2018-ci ildə 2,3 faizədək, baza inflyasiyanın isə 1,8 faizədək azalmasının neftin bahalaşması sayəsində və sərt monetar-kredit siyasəti vasitəsilə əldə edildiyi göstərilir. Bu da mübadilə məzənnəsini sabitləşdirməklə istehlak bazarında qiymət artımını minimum səviyyədə saxlayıb.
Xaricdən idxal olunan ərzaq məhsullarının qiymətlərində azalma nəticəsində daxili bazardakı ərzağın bahalaşması 2017-ci ildəki 16,4 faizdən 1,7 faizədək, digər məhsulların bahalaşması 11,6 faizdən 2,6 faizədək, xidmətlərin bahalaşması da 9,3 faizdən 2,7 faizədək azalıb.
2019-cu ildə Azərbaycanda inflyasiyanın 4, 2020-ci ildə 5 faiz səviyyəsində olacağı barədə proqnoza iqtisadçının fikirlərini öyrəndik.
Məsələ ilə bağlı fikir bildirən iqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, beynəlxalq təşkilatlar özlərinə məxsus hesablama ilə inflyasiyanın hansı səviyyədə olacağı barədə məlumat yayırlar: “Asiya İnkişaf Bankının nümayəndələri bildirirlər ki, 2019-cu ildə Azərbaycanda inflyasiya 4, 2020-ci ildə 5 faiz səviyyəsində olacaq. Ancaq digər beynəlxalq təşkilatlar, eyni zamanda, yerli mütəxəssislər isə fərqli düşüncədədirlər. Onların fikrincə, 2019-cu ildə ölkədə inflyasiya 2, 2020-ci ildə 2,5 faiz səviyyəsində olacaq. Əksər beynəlxalq təşkilatların da Azərbaycanda inflyasiya barəsindəki proqnozları hökumətin proqnozları ilə üst-üstə düşür”.
Həmsöhbətimizin sözlərinə görə, qarşıya qoyulmuş məqsədlərdən biri də ölkədə inflyasiyanın 2-2,5 faiz səviyyəsində olmasıdır: “Nəzərə almaq lazımdır ki, son zamanlar əhalinin gəlirləri artıb, inflyasiya 2-2,5 faiz təşkil edib. Bu isə əhalinin gəlirlərinin qiymət artımını 4 dəfə üstələdiyini göstərir. Beləliklə, hər il olduğu kimi, əhalinin gəlirləri inflyasiyanı üstələyir və beləliklə bu, bilavasitə insanların yaşayış səviyyəsinə müsbət təsir göstərir”.
Günel CƏLİLOVA
