Vüqar Bayramov: “Sözügedən güzəştlər daha çox insanın işlə təmin olunmasına müsbət təsir göstərəcək”
Azərbaycanın Vergilər Nazirliyi yerli istehsalın stimullaşdırılması üzrə yeni təkliflər hazırlayıb.
Vergilər Nazirliyinin Vergi siyasəti və strateji araşdırmalar departamentinin baş direktoru Samirə Musayevanın sözlərinə görə, yeni vergi güzəştləri növbəti üç il üçün nəzərdə tutulub: “Təkliflərdə, Bakı, Sumqayıt, Xırdalan şəhərləri və Abşeron rayonu istisna olmaqla, ixracyönümlü məhsulların istehsalı ilə məşğul olan yerli ixracatçılar üçün vergi güzəştlərinin tətbiqi, həmçinin, özəlləşdirilmiş dövlət əmlakına vergi azadolmaları nəzərdə tutulur”.
S.Musayevanın fikrincə, strateji yol xəritələrində müəyyən edilmiş tədbirlərin icrası məqsədilə kiçik və orta sahibkarlıq subyektlərinin üzləşdiyi problemlərlə yaxından tanış olmaq, vergi qanunvericiliyinin və inzibatçılığının təkmilləşdirilməsi istiqamətində sahibkarların rəy və təkliflərini müzakirə etmək üçün sahibkarlıq subyektləri ilə silsilə görüşlər keçirilib.
Eyni zamanda, ötən dövr ərzində pərakəndə ticarət və ictimai-iaşə fəaliyyəti ilə məşğul olan vergi ödəyiciləri tərəfindən malların təqdim edilməsi üzrə nağdsız əməliyyatlara vergi güzəştlərinin tətbiqi və vergi ödəyicilərində keçirilmiş vergi nəzarəti tədbirləri nəticəsində onlara hesablanmış vergi və maliyyə sanksiyalarının ödəmə müddətindən tez ödənilməsinə görə maliyyə sanksiyaları üzrə güzəştlərin tətbiqi mexanizmləri işlənib hazırlanıb.
Maraqlıdır, ixracyönümlü məhsulların istehsalı ilə məşğul olan yerli ixracatçılar üçün vergi güzəştlərinin tətbiqi bu sahənin inkişafına nə kimi müsbət təsir göstərəcək? Ümumən ekspertlər bunu necə dəyərləndirirlər?
Məsələyə münasibət bildirən iqtisadçı-ekspert Vüqar Bayramov buna müsbət prizmadan yanaşdı. Onun fikrincə, bu, yerli istehsala stimul verəcək: “Nəzərə almaq lazımdır ki, Azərbaycanda yerli istehsalın təşviq edilməsi çox vacibdir. Xüsusən də ixracyönümlü yerli istehsalın təşviq edilməsinə ehtiyac var. Məsələ ondadır ki, hələ də ölkə iqtisadiyyatında neft sektorunun çəkisi yüksək olaraq qalır. Qeyri-neft sektorunun inkişaf etdirilməsi baxımından bir sıra işlər görülməlidir. Onlardan biri də vergi güzəştlərinin tətbiqidir. Ona görə də bu sahədə müəyyən güzəştlərin tətbiq edilməsi inkişafa təkan verəcək. Nəticə etibarilə bu, qeyri-neft sektorunun ixrac imkanlarının genişlənməsinə öz təsirini göstərəcək. Yaranan yeni imkanlar ona gətirib çıxaracaq ki, bu sahədə çalışan sahibkarlar daha çox məhsul ixrac etmək imkanına malik olacaqlar. Bu baxımdan hesab edirəm ki, belə təşviqedici fəaliyyətlər, birmənalı şəkildə, sahibkarların ixrac imkanlarını artıracaq. Bu isə ümumilikdə ölkənin qeyri-neft ixracatının artırılması baxımından vacibdir. Çünki təşviq bir tərəfdən sahibkara vəsaitə qənaət etmək və xərclərini azaltmaq imkanlarını verir. Nəticədə sahibkar daha az xərc çəkməklə məhsul istehsalını həyata keçirir. Digər tərəfdən də bu, daha əlverişli mühitdə və daha böyük dövlət dəstəyi ilə istehsal prosesinin təşkil edilməsi deməkdir. Bütün bunlar həm də rəqabətli istehsalın təşkil edilməsidir ki, bu da nəticə etibarilə ixrac imkanlarını artırır. Bununla yanaşı, sözügedən güzəştlər daha çox insanın işlə təmin olunmasına müsbət təsir göstərəcək. Xüsusən də bölgələrdə sahibkarlığın inkişafı baxımından bunun müsbət əhəmiyyəti var. Ona görə də bu kimi tədbirlər, birmənalı şəkildə, sahibkarların ixrac imkanlarının artmasına və bütövlükdə qeyri-neft sektorunun inkişafına xidmət edən faktorlardan biridir”.
Vidadi ORDAHALLI
