Vahid Əhmədov: “Buna nail ola bilsək, insanların aylıq məvacibləri, iş yerləri olacaq və ələbaxımlıq aradan qaldırılacaq”
“Yaxın 6-7 il ərzində ünvanlı sosial yardımın ləğv edilməsi nəzərdə tutulur. Bununla bağlı ünvanlı sosial yardımlar alan ailələr üçün özünüməşğulluq proqramlarının icrasına başlanıb. Ötən il özünüməşğulluq sisteminə keçidlə bağlı proqramların icrasına 6 milyon manat ayrılmışdı və bu proqramların icrası 8 minə yaxın insanı əhatə edib”. Bunu əmək və əhalinin sosial müdafiəsi naziri Səlim Müslümov Milli Məclisin Əmək və sosial siyasət komitəsinin iclasında “Sosial təminatı və müdafiəni həyata keçirən müvafiq icra hakimiyyəti orqanının 2018-ci il büdcəsi haqqında” qanun layihəsinin müzakirəsi zamanı deyib.
Nazir bildirib ki, növbəti ildə isə özünüməşğulluq sisteminin inkişaf etdirilməsi və daha geniş əhali təbəqəsini əhatə etmək məqsədilə 35,6 milyon manat vəsaitin ayrılması nəzərdə tutulur: “Biz bu yolla ailə tərkibində əmək qabiliyyəti olan insanları özünüməşğulluq sisteminin tətbiqi ilə hamını işlə təmin etməyi qarşımıza məqsəd qoymuşuq. Bu yolla ailə tərkibində əmək qabiliyyəti olan insanları işlə təmin etməklə vətəndaşlara ünvanlı sosial yardım sistemini aradan qaldırmış olacağıq. Bu proses təqribən 6-7 il davam edəcək. Ondan sonra Azərbaycanda ailədə əmək qabiliyyəti olan şəxs işsiz qalmayacaq. Bu proses tam başa çatdıqdan sonra ünvanlı sosial yardım ləğv ediləcək. Sadəcə, ailədə əmək qabiliyyəti olmayanlara dövlət yardımı veriləcək. Belə ailələrə dövlət yaşayış minimumdan yuxarı miqdarda orta bir məbləğ müəyyənləşdirərək yardım verəcək”.
O da məlumdur ki, sosial məsuliyyəti olan bütün dövlətlərdə sosial yardım anlayışı var. Dövlət öz üzərinə müəyyən öhdəliklər götürərək ehtiyacı olanlara müəyyən yardımlar edir. Burada söhbət təkcə işsizlərdən getmir. Elə insanlar var ki, əmək qabiliyyətli deyil. İstənilən inkişaf etmiş ölkədə belə, bu kateqoriyadan olan insanlar var. Ancaq o da məlum məsələdir ki, bəzi hallarda işsizlərə verilən ünvanlı sosial yardım insanlarda ələbaxımlıq formalaşdırır. Nəticədə o cür insanlar işləməkdə maraqlı olmur və yaxud da iş yerini gizlədirlər. Bəzən də həqiqi yardıma ehtiyacı olan kənarda qalır, ehtiyacı olmayan bundan istifadə edir. Bütün bunların fonunda, ekspertlər bir neçə ilə ünvanlı sosial yardımın ləğv edilməsinə necə yanaşır? Sözügedən məsələni dəyərləndirən millət vəkili Vahid Əhmədov buna müsbət prizmadan yanaşır. O bunu bir sıra arqumentlərlə əsaslandırdı: “Hesab edirəm ki, bununla bağlı aparılan siyasət düzgündür. Çünki ünvanlı sosial yardım insanlarda ələbaxımlıq yaradır. O üzdən, bu cür yanaşma tamamilə doğru fikirdir. Birincisi, ünvanlı sosial yardım insanlarda ələbaxımlıq yaradır. Onlar gözləyirlər ki, dövlətdən 5-10 manat alıb dolanacaqlar və s. Bunun nəticəsində işləməkdə maraqlı olmurlar. Yəni ünvanlı sosial yardım həm də insanlarda işləmək həvəsini yox edir. Bilirsiniz, insanlara iş yerləri açmaq, onlara normal məvacib vermək lazımdır ki, elə problemlər yaranmasın. İkincisi, dövlət başçısı tərəfindən xüsusi sərəncam imzalanıb. Sərəncama əsasən, Əmək və Əhalinin Sosial Müdafiəsi Nazirliyinə təxminən 6 milyona yaxın vəsait ayrılıb ki, yerlərdə özünəməşğulluğu təşkil etsinlər. Həmçinin, insanların seçimindən asılı olaraq onlara istər kənd təsərrüfatı, istər biznes, istərsə də digər sahələrdə şərait yaradırlar ki, istədikləri bir işlə məşğul ola bilsinlər və ünvanlı sosial yardım ehtiyacından azad olsunlar. Səlim Müslümovun da dediyi kimi, çalışırıq ki, bu məsələni 6-7 il ərzində başa çatdıraq. Çünki bu vacib məsələdir. Buna nail ola bilsək, insanların aylıq məvacibləri, iş yerləri olacaq və ələbaxımlıq aradan qaldırılacaq. Dünya təcrübəsində də belə hallar mövcuddur. Məlumatıma görə, artıq proqramın icrasına başlanıb və Göyçay, Ucar və digər bölgələrdə belə məşğulluq sahələri yaradılır. Dövlətin apardığı siyasət çox düzgün siyasətdir”.
Vidadi ORDAHALLI
