Osman Gündüz: “Dünyada yetərincə innovasiyası olan nəhəng şirkət var, onların Azərbaycana gəlib öz təcrübəsini nümayiş etdirməsi bizim üçün əhəmiyyətlidir”
“Azərbaycanın iddiası 2025-ci ildə Ümumdünya Sərgisinə evsahibliyi etməkdir”. Bunu noyabrın 14-də Parisdə Bakının Beynəlxalq Sərgilər Bürosunun 2025-ci ildə keçiriləcək Ümumdünya Sərgisinə namizəd şəhər olması münasibətilə təşkil edilən qəbulda çıxışı zamanı Azərbaycanın Birinci vitse-prezidenti Mehriban Əliyeva deyib.
O çıxışı zamanı qeyd edib ki, Azərbaycan hökuməti adından Bakının 2025-ci ildə keçiriləcək Ümumdünya Sərgisinə evsahibliyi etmək üçün namizədliyini təqdim etmək mənim üçün böyük şərəfdir: “Azərbaycan 2000-ci ildən “Expo” hərəkatının fəal üzvüdür. Bizim pavilyonlarımız son üç sərgidə - 2015-ci ildə pavilyonumuzu üç milyondan çox insanın ziyarət etdiyi Milanda, 2016-cı ildə Antalyada və 2017-ci ildə Astanada mükafatlar qazanıb. Beynəlxalq Sərgilər Bürosunun işinə sadə töhfəmizin bu cür qiymətləndirilməsindən qürur duyuruq.
Ümumdünya Sərgisi bütün mədəniyyətlərə bərabərlik və hörmət prinsipinə əsaslanan müxtəlifliyi sərgiləmək üçün bir platformadır. Bu sərgilər qlobal müzakirələr və əməkdaşlıq üçün bütün beynəlxalq ictimaiyyəti nadir bir məkanda bir araya gətirir. Buna görə də əminəm ki, Azərbaycan bu universal platformaya evsahibliyi etmək üçün ən yaxşı məkanlardan biridir”.
M.Əliyeva qeyd edib ki, Azərbaycan yüksələn xətlə inkişaf edən dövlətdir və indi ölkəmizin iddiası 2025-ci ildə Ümumdünya Sərgisinə evsahibliyi etmək və bütün dünyanı qəbul etmək hüququnu qazanmaqdır: “Bizim “İnsan kapitalının inkişaf etdirilməsi, daha yaxşı gələcəyin qurulması” mövzusu həqiqətən hamını narahat edən bir məsələdir. Bu mövzu dövrümüzün əsas çağırışını – texnologiyanın və artan bağlılığın bəşəriyyətə təsirini əhatə edir. “Bakı Expo - 2025” sərgisində düşünürük ki, texnologiyadan daha uzağa baxmaq, diqqətimizi rəhbərlərdən sıravi vətəndaşlara yönəldərək iqtisadiyyatların, cəmiyyətlərin və yaradıcılığın aparıcı qüvvəsi olan insanlar üzərində cəmləşdirmək mühüm əhəmiyyət kəsb edəcək”.
Azərbaycanın “Expo - 2025” sərgisinə evsahibliyi etməsi üçün namizədliyinin irəli sürülməsinə fikir bildirən Multimedia Mərkəzinin direktoru Osman Gündüz “Bakı-Xəbər”ə açıqlamasında qeyd etdi ki, dünya ölkələrinin Azərbaycana gəlməsi təcrübə mübadiləsi baxımından bir platformadır: “Dünya əhəmiyyətli sərgiyə Azərbaycanın evsahibliyi etməsi ölkənin tanıtımı baxımından müsbətdir. Nəzərə almaq lazımdır ki, sərgi baş tutarsa, ölkəmizə xeyli nümayəndə gələcək. Sərgidə təmsil olunan xarici ölkələrin şirkərləri özləri ilə yeniliklər gətirirlər. Dünyada yetərincə innovasiyası olan nəhəng şirkət var. O şirkətlərin Azərbaycana gəlib öz təcrübəsini nümayiş etdirməsi bizim üçün əhəmiyyətlidir”.
Həmsöhbətimiz onu da vurğuladı ki, Azərbaycanda fəaliyyət göstərən şirkətlər üçün belə bir sərginin Azərbaycanda keçirilməsi yeni imkanların açılması, əlaqələrin qurulması deməkdir.
O.Gündüzün fikrincə, 2025-ci ildə Ümumdünya Sərgisinə evsahibliyi edərsə, Azərbaycanla bağlı dünyada normal informasiya mühitinin formalaşması üçün müsbət hal olar: “Eyni zamanda, “Bakı Expo - 2025” sərgisi Azərbaycanda innovasiyaların inkişafı üçün bir imkan ola bilər. Hesab edirəm ki, bu sərginin ölkəmizə xeyli dərəcədə faydası ola bilər. Öncədən buna hazırlıq görülməlidir ki, daha çox fayda əldə edə bilək. Qeyd olunan tədbirə təkcə turizm nöqteyi- nəzərindən yanaşmaq olmaz. Azərbaycan cəmiyyətinin, biznes və vətəndaş cəmiyyətlərinin yeni əlaqələr qurması baxımından bir platformadır”.
Günel CƏLİLOVA
