Müşfiq Ələsgərli: “Bildiyim qədər, xarici ölkələrin ən azı 70-ə yaxın kütləvi informasiya vasitəsində adıçəkilən məsələyə yer ayırıblar”
Oktyabrın 15-dən etibarən paytaxtımızda ikinci Bakı Şopinq Festivalı keçirilir. Festival noyabrın 25-nə qədər davam edəcək. Qeyd edək ki, Azərbaycan Prezidenti İlham Əliyev Bakı şəhərində keçiriləcək ticarət festivalı ("shopping festival") ilə bağlı əlavə tədbirlər haqqında Sərəncam imzalayıb. Sərəncamda qeyd olunur ki, Azərbaycanda turizmin inkişafı istiqamətində görülən işlərin davamı olaraq, ticarət festivalının təşkili məqsədilə Azərbaycanın 2017-ci il dövlət büdcəsində nəzərdə tutulmuş Azərbaycan Prezidentinin ehtiyat fondundan Mədəniyyət və Turizm Nazirliyinə bir milyon manat ayrılsın.
Məlum olduğu kimi, ilk ticarət festivalı aprel-may ayları ərzində keçirilib. Birinci festival uğurla yekunlaşıb. İlk festival haqqında beynəlxalq media və diplomatik-siyasi dairələrin təmsilçiləri öz fikirlərini bölüşmüşdülər.
İlk festival haqqında ümumilikdə 54 ölkədə TV, radio, onlayn media, sosial şəbəkələr və internet televiziyası vasitəsilə məlumatlar yayılıb. Xüsusi olaraq sosial şəbəkələrdə festival barədə informasiyaları milyonlarla insan izləyib. Bunlardan daha çoxu Rusiya, Səudiyyə Ərəbistanı, Ukrayna, Qazaxıstan, Belarus, Gürcüstan, Birləşmiş Ərəb Əmirlikləri, Oman və Qətərdə qeydə alınıb.
Birinci Şopinq Festivalından fərqli olaraq ikinci ticarət bayramının sədası daha çox yayılmağa başladı.
Dünyanın dörd bir tərəfində Bakıda keçirilən Şopinq Festivalına reaksiya verildi. İstər beynəlxalq media, istərsə də diplomatic-siyasi dairələr Şopinq Festivalı haqqında fikirlərlərini ictimaiyyətə çatdırdılar. Artıq ölkəmizdə gerçəkləşən festival beynəlxalq və yerli medianın geniş müzakirə mövzusuna çevrilib. Bakı Şopinq Festivalının marketinqi, dünya mediasında işıqlandırılması və təbliğatı sevindiricidir.
İkinci Şopinq Festivalının davam etdiyi müddət ərzində dünya mediası və diplomatik-siyasi dairələrin festivala reaksiyasını necə qiymətləndirmək olar?
Jurnalistlərin Həmkarlar İttifaqının sədri, Mətbuat Şurasının sədr müavini Müşfiq Ələsgərli “Bakı-Xəbər”ə açıqlamasında qeyd etdi ki, Şopinq Festivalı ənənəsi Azərbaycan, ümumiyyətlə, yerləşdiyimiz region üçün yeni bir ənənədir: “Bəllidir ki, bu festival Bakıdan öncə Dubay və İstanbulda keçirilib, çox böyük effekt verib. Hazırda ölkəmizdə keçirilir. Şopinq Festivalının çox böyük şərtləri var. O şərtlərdən biri ölkədə ictimai sabitliyin olmasıdır. Alıcıların, turistlərin təhlükəsizliyinə təminat verilməsi kimi şərtləri var. Bu səbəbdən də bir çox ölkələr öz daxilində Şopinq Festivalını keçirə bilmir”.
Həmsöhbətimizin sözlərinə görə, Bakıda birinci Şopinq Festivalının nəticələri müsbət olduğu üçün, ikinci ticarət bayramı hazırda keçirilir: “Çox güman ki, Şopinq Festivalı ənənə halını alacaq. Hər il Azərbaycanda ticarət bayramı keçiriləcək. Beləliklə, ölkəyə gələcək turistlərin sayının artmasında Şopinq Festivalının rolu danılmaz olacaq”.
M.Ələsgərli onu da vurğuladı ki, Azərbaycanda keçirilən Şopinq Festivalı regionda ilk dəfə ənənənin tətbiq olunması və ciddi effekt verməsi baxımından kifayət qədər diqqət mərkəzindədir. Qonşu ölkələrlə yanaşı, dünya mediasında Şopinq Festivalına ciddi yer ayrılır: “Hansısa ölkənin mediasında Bakı Şopinq Festivalına yer ayrıldığı ərəfədə kəmiyyət dəyişikliyi hiss olunur. Demək olar ki, hər gün xarici ölkələrin mediasında Bakıda keçirilən ticarət bayramı haqqında məlumatlar verilir. Bildiyim qədər, xarici ölkələrin ən azı 70-ə yaxın kütləvi informasiya vasitəsində adıçəkilən məsələyə yer ayırıblar. Ərəb, rus, türk, İsrail, Hindistan, Pakistan, Böyük Britaniya və digər ölkələrin mediasında Azərbaycanda keçirilən Şopinq Festivalı ilə bağlı məqalələr dərc olunur. Festivalın müsbət yönlərinin təqdir olunması haqqında materiallar yayımlanır”.
Həmsöhbətimiz qeyd etdi ki, Şopinq Festivalının keçirilməsi ilə məşğul olan Mədəniyyət və Turizm Nazirliyi və nazirliyin nəzdində olan Azərbaycan Konqreslər Bürosu kifayət qədər yaxşı fəaliyyət göstərirlər. Şopinq Festivalının təbliğatının yüksək səviyyədə aparılması onların öz işlərini peşəkar səviyyədə icra etməsi ilə bağlıdır.
Günel CƏLİLOVA
