Əli Əlirzayev: “Mebel, içki, geyim sənayesində artımın qeydə alınması yerli istehsala tələbatın artması ilə bağlıdır”
2017-ci ilin yanvar-oktyabr aylarında Azərbaycanda 32 milyard manatlıq sənaye məhsulu istehsal edilib. Dövlət Statistika Komitəsinin yaydığı məlumata əsasən, sənayenin qeyri-neft sektorunda məhsul istehsalı 3,4 faiz artıb. Sənaye məhsulunun 70 faizi mədənçıxarma sektorunda, 24,8 faizi emal sektorunda, 4,4 faizi elektrik enerjisi, qaz və buxar istehsalı, bölüşdürülməsi və təchizatı sektorunda, 0,8 faizi isə su təchizatı, tullantıların təmizlənməsi və emalı sektorunda istehsal olunub.
Emal sektorunda qida məhsullarının istehsalı 0,9 faiz, içkilərin istehsalı 24,7 faiz, toxuculuq sənayesi məhsullarının istehsalı 68,4 faiz, geyim istehsalı 36,2 faiz, ağacın emalı və ağacdan məmulatların istehsalı 46 faiz, kimya sənayesi məhsullarının istehsalı 20,7 faiz, əczaçılıq məhsullarının istehsalı 2,4 dəfə, rezin və plastik kütlə məmulatlarının istehsalı 89,1 faiz, tikinti materiallarının istehsalı 28,8 faiz, kompyuter və elektron məhsulların istehsalı 30,5 faiz, elektrik avadanlıqlarının istehsalı 59,9 faiz, maşın və avadanlıqların istehsalı 23,6 faiz, sair nəqliyyat vasitələrinin istehsalı 19,1 faiz, mebel istehsalı 14,1 faiz artıb.
İçki, geyim və mebel istehsalının artması barədə fikir bildirən iqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, qeyri-neft sektorunun bir sıra sahələrində istehsalın artması gözlənilən idi: “Mebel sənayesində artımın qeydə alınması yerli istehsala tələbatın artması ilə bağlıdır. Mebel istehsalı hazırda inkişaf dövrunu yaşayır. Əhali artıq xarici mebel axtarışında deyil. Mebel istehsalının artmasının səbəblərindən biri də ustaların əhalinin istədiyi zövqdə, dizaynda mebel yığa bilməsidir.
Onu da deyim ki, xarici mebelə tələbatın azalması səbəblərindən biri qiymətlə bağlıdır. Xarici istehsal mebellərin qiyməti olduqca bahadır. Belə olanda istehlakçı münasib qiymətə və onun zövqünü oxşayan mebel almış olur”.
İçki istehsalının artmasının səbəbinə gəlincə, iqtisadçı bildirdi ki, bu, xaricdən gələn işkilərin həcminin azalması ilə bağlıdır. Həmçinin, xarici ölkələrin istehsal etdiyi içkiyə meyl əvvəlki səviyyədə deyil: “Ölkəmizə gələn turistlər daha çox yerli malla tanış olmaq istəyirlər. Adətən turistlər hansı ölkəyə gedirlərsə, oranın özünəməxsus içkisindən istifadə edirlər”.
Həmsöhbətimizin sözlərinə görə, geyim istehsalının artması qeyri-neft sektorunun inkişaf etməsi ilə bağlıdır.
Günel CƏLİLOVA
