Rəsul Cahangirli: “Ən başlıcası, bölgələrdə emal sənayesinin inkişafı baxımından bunun əhəmiyyəti böyükdür”
Azərbaycanın müxtəlif ərazilərində sənaye zonaları yaradılır. Sumqayıt, Balaxanı, Qaradağ, Mingəçevir və Pirallahıda sənaye parkları və Neftçala, Hacıqabul və Masallıda sənaye məhəllələri yaradılır. Gələcəkdə ölkənin digər ərazilərində də sənaye zonalarının yaradılması istiqamətində işlərin görülməsi nəzərdə tutulur. Bununla yanaşı, sənaye parkları və məhəllələrinin yaradılması klaster kimi sənaye-innovativ subyektlərin yaradılması üçün zəmin yaradır.
İqtisadiyyat nazirinin müavini Niyazi Səfərov bildirib ki, Azərbaycanda sənaye zonalarının yaradılması uğurla davam etdirilir. Ümumilikdə, 5 sənaye parkı və 3 sənaye məhəlləsi üzrə 35 rezident və iştirakçı qeydiyyata alınıb. Yaxın zamanlarda onların fəaliyyətə başlayacağı gözlənir. Təkcə Sumqayıt kimya sənaye parkında 12 rezidentin 1 milyard 400 milyon dollar həcmində yatırım etməsi nəzərdə tutulur. Neftçala sənaye məhəlləsində fəaliyyət göstərəcək Azərbaycan-İran birgə avtomobil müəssisəsinin isə yaxın vaxtlarda açılışı planlaşdırılır. Müəssisədə “Xodro”, “Pejo” və “Reno” markalı avtomobillər istehsal olunacaq. Masallı və Hacıqabul sənaye məhəllələrində də işlər sürətlə davam etdirilir.
Nazir müavininin sözlərinə görə, rezidentlərə bir sıra imtiyazlar verilə bilər. Ümumilikdə, bütün bunlar iqtisadiyyatın inkişafına nə kimi töhfə verəcək? Məsələyə münasibət bildirən ekspert Rəsul Cahangirlinin sözlərinə görə, bu, sənayenin bütün ölkə boyu inkişaf etməsinə müsbət təsir göstərəcək: “Məsələ ondadır ki, nəinki ölkə paytaxtında, o cümlədən bölgələrdə sənayenin inkişafı ilə bağlı ciddi işlər görülür. Sənaye zonaları, sənaye parkları, sənaye məhəllələri yaradılır. Xüsusən də regionlarda sənaye məhəllələrinin və rezidentlərinin yaradılması daha məqsədəuyğundur. Hansı ki, bu istiqamətdə sistemli iş gedir. Bu, işsizliyin azalmasına, məşğulluğun artmasına şərait yaradacaq. Ən başlıcası, bölgələrdə emal sənayesinin inkişafı baxımından bunun əhəmiyyəti böyükdür. Bütün bunlarla yanaşı, sənaye rezidentlərinə imtiyazların verilməsi iş adamlarında stimul yaradacaq. Digər tərəfdən, o sahələrə daha çox üstünlük verilməlidir ki, qarşılıqlı müqayisədə daha ucuz xammal cəlb etmək mümkün olsun. Həmin sahədə ixtisaslı kadr potensialı mövcud olsun. Eyni zamanda, istehsal olunan məhsulun xarici bazarlara çıxarılma imkanlarına da diqqət yetirmək lazımdır. Hazırda Azərbaycan məhsulları MDB ölkələri arasında daha çox tanınır. Bu sahədə böyük nailiyyətlər əldə etmək üçün hədəf kimi Avropa bazarlarının götürülməsi daha məqsədəuyğundur. Burada hədəf bazarların spesifik xüsusiyyətlərinin öyrənilməsi, beynəlxalq standartların tətbiq olunmasının önə çəkilməsidir. Söhbət ikimərhələli inkişafdan gedir: daxili bazarda özünü doğrultmaq və xarici bazara çıxmaq. Təbii ki, burada investisiyaların cəlb olunması məsələsi öndə durur. Bu mənada, sənaye sektorunda böyük inkişafa nail olmaq üçün gömrük, vergi alətləri vasitəsilə müxtəlif stimullaşdırıcı tədbirlər görmək lazımdır”.
Vidadi ORDAHALLI
