Zakir Əhmədov: “Hesab edirəm ki, bazarda təklif artdıqca, yağın qiyməti daha çox ucuzlaşa bilər”
Məlum olduğu kimi, kərə yağının qiymətində müşahidə olunan bahalaşma ilə əlaqədar olaraq hökumət bir sıra addımlar atmalı oldu. Belə ki, Nazirlər Kabineti “Azərbaycan Respublikasının ərazisinə gətirilən mallar üzrə gömrük idxal rüsumlarının dərəcələri”nə dəyişiklik edərək, kərə yağı və süddən hazırlanmış digər yağlar üçün tətbiq edilən gömrük idxal rüsumlarını bu malların gömrük dəyərinin 5 faizi həcmində müəyyənləşdirib. İndiyədək bu dərəcə 15 faiz idi. Beləliklə, rüsumlar 3 dəfə azaldılıb.
Dövlət Gömrük Komitəsinin Maliyyə-Tarif və Valyuta Nəzarəti Baş İdarəsinin rəisi Mirqasım Vahabov da bildirib ki, Azərbaycana idxal edilən kərə yağı üçün tətbiq edilən gömrük idxal rüsumlarının 3 dəfə azaldılması bu məhsulun pərakəndə satış qiymətinə də təsirsiz ötüşməyəcək: “İndiyə qədər Azərbaycana idxal edilən kərə yağı və süddən hazırlanmış digər yağlar üçün tətbiq edilən gömrük idxal rüsumları bu malların gömrük dəyərinin 15%-i həcmində olub. Qərara əsasən, kərə yağı və süddən hazırlanmış digər yağlar üçün tətbiq edilən gömrük idxal rüsumları bu malların gömrük dəyərinin 5%-i həcmində müəyyənləşib. Beləliklə, rüsumlar 10% və ya 3 dəfə azaldılıb. Bununla bağlı ölkə başçısının xüsusi tapşırığı var idi və hökumət dərhal müvafiq addım atdı”.
Ümumilikdə, bütün bunlar, yəni rüsumların azaldılması pərakəndə satış qiymətlərinə də təsir edəcək. Zamanla bu özünü göstərəcək.
Məsələyə münasibət bildirən ekspert Zakir Əhmədovun fikrincə, rüsumların azaldılması müsbət haldır: “Sözügedən addım bu və ya digər dərəcədə qiymətlərə təsir edəcək. Bəziləri soruşur ki, niyə bu, bazara tez təsir etmir? Məsələ ondadır ki, kərə yağının bir hissəsi bundan əvvəl idxal olunub. İndiki dövrdə sahibkarlar məhsulu ucuzlaşdırsalar, ziyana gedəcəklər. Ona görə ki, bununla bağlı bir sıra ödənişlər ediblər. Belə olan halda, sahibkarlar zərərə düşər. Ancaq qərardan sonra idxal olunan kərə yağının qiymətində ucuzlaşma özünü göstərəcək. Sadəcə, buna zaman lazımdır. Kərə yağının qiymətinin ucuzlaşması qaneedici səviyyədə olmasa, o zaman idxal rüsumlarının həcmi bir az da aşağı salına bilər. Təbii ki, bütün bunlar dünya bazarında gedən proseslərdən asılı olacaq. Nəzərə almaq lazımdır ki, Azərbaycan kərə yağına olan tələbatı yerli istehsal hesabına tam təmin edə bilmir. Bu baxımdan dünyada kərə yağının qiymətinin dəyişməsi birbaşa bu və ya digər formada bazara öz təsirini göstərir. Ona görə də bütün bu amillər nəzərə alınmalıdır. Hesab edirəm ki, bazarda təklif artdıqca, yağın qiyməti daha çox ucuzlaşa bilər”.
Vidadi ORDAHALLI
