Pərviz Heydərov: “Qeyri-neft sektorunda cəlbediciliyi artırmaq, investisiya mühitini, vergi, gömrük rüsumu və sərmayənin qoyuluşu şərtlərini olduqca əlverişli etmək lazımdır”
Məlum olduğu kimi, bir neçə gün öncə Azərbaycanda iki milyard ton neft hasil olunması münasibətilə təntənəli mərasim keçirilib. Prezident İlham Əliyev mərasimdə iştirak edib. Dövlət başçısı mərasimdə çıxışı zamanı bir sıra məsələlərə toxunub. O cümlədən, yerli və xarici sərmayədarların Azərbaycana yatırım etməsi ilə bağlı fikir bildirib. Prezident çıxışı zamanı bunları qeyd edib: “Azərbaycanın timsalında, eyni zamanda, göstərilir ki, dövlət və xarici sərmayədarlar birlikdə necə iş qurmalıdırlar? Bu iş hansı prinsiplər əsasında qurulmalıdır? Burada da Azərbaycan bir nümunədir”.
Dövlət və xarici sərmayədarlar birlikdə necə iş qurmalıdırlar? Bu işin hansı prinsiplər əsasında qurulmasını aydınlaşdırmaq məqsədilə İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərova müraciət etdik. O, “Bakı-Xəbər”ə açıqlamasında bildirdi ki, indiyə qədər Azərbaycan iqtisadiyyatına investisiya ən çox neft sektoruna yatırılıb: “Əsrin Müqaviləsi” ilə başlayan bu proses uzun illər ərzində davam edib və ölkə iqtisadiyyatının birtərəfli inkişaf etməsinin səbəbi məhz neft sektoruna yatırılan xarici investisiyalarla bağlıdır. Hazırda isə Azərbaycan hökuməti qeyri-neft sektorunun inkişafını əsas götürüb və bunu prioritet seçib. Bu istiqamətdə çox böyük addımlar atılır. O cümlədən, “Strateji Yol Xəritəsi” qəbul olunub, bir sıra normativ sənədlər imzalanıb, ölkənin ixrac potensialının qeyri-neft sektoru məhsulları hesabına genişləndirilməsi istiqamətində çox böyük işlər görülür. Ancaq bundan sonra istər dövlət, istərsə də xarici yatırımlar qeyri-neft sektoruna qoyulacaq. Bu isə elə də asan məsələ deyil. Neft sektoru elə bir sahədir ki, burada əsas etibarilə xammal hasil olunur. Neft heç bir emala ehtiyacı olmadan ölkədən kənara - dünya bazarına çıxarıla bilir. Amma qeyri-neft sektoru isə elə bir sahədir ki, burada rəqabət şərtləri daha sərtdir. Qoyulan yatırımın müqabilində əldə olunan nəticə dünya bazarında öz rəqabətqabiliyyətliliyi ilə seçilməlidir. Ona görə də bu sahədə daha çox çeşid görmək tələb olunur. Qeyri-neft sektorunda cəlbediciliyi artırmaq, investisiya mühitini, vergi, gömrük rüsumu və sərmayənin qoyuluşu şərtlərini olduqca əlverişli etmək lazımdır. Bu sahədə hazırda hökumət tərəfindən müvafiq işlər görülür. Son illər ərzində isə neftin qiymətinin düşməsi ilə bağlı ölkə iqtisadiyyatına yatırılan investisiyaların həcmi təbii olaraq azalmışdı. Bunu təbii qarşılamaq lazımdır. Ölkə başçısı dəfələrlə öz çıxışında bildirib ki, özəl strukturlar tərəfindən yatırılan investisiyaların həcminin artırılmasına nail olmaq lazımdır. Hazırda ölkənin investisiya siyasətində prioritet özəl strukturlar tərəfindən iqtisadiyyata qoyulan yatırımların həcminin inkişaf etdirilməsidir. Prezident İlham Əliyev iki milyard ton neft hasil olunması münasibətilə keçirilən təntənəli mərasimdə çıxışı zamanı əsas vurğunu dövlət, özəl və xarici investorlar üzrə bərabər imkan yaradılmasına yönəldib”.
Günel CƏLİLOVA
