Günel Fərhadqızı: “Proses ölkələr arasında möhkəm əlaqələrin qurulması istiqamətində başlıca meyarlardan biridir”
Diasporla İş üzrə Dövlət Komitəsinin təşəbbüsü və dəvəti ilə ölkəmizdə səfərdə olan Türkiyənin Çukurova Bələdiyyələr Birliyinə üzv olan bələdiyyə rəhbərlərindən ibarət nümayəndə heyəti noyabrın 6-da Cəbrayıl rayonunun işğaldan azad olunmuş Cocuq Mərcanlı kəndinə səfər ediblər.
Qonaqlar əvvəlcə Horadiz-Cəbrayıl avtomobil yolunun kənarındakı “Aprel şəhidlərinə xatirə” abidəsini ziyarət edib, şəhidlərin ruhuna ehtiramlarını bildiriblər.
Cocuq Mərcanlıya gələn türkiyəli qonaqları kənd sakinləri məktəbin qarşısında gül-çiçəklə qarşılayıblar. Cəbrayıl Rayon İcra Hakimiyyətinin başçısı Kamal Həsənov qonaqları salamlayıb, türkiyəli bələdiyyə rəhbərlərinin səfərini Azərbaycan-Türkiyə dostluğunun və qardaşlığının bariz nümunəsi kimi qiymətləndirib.
Çukurova Bələdiyyələr Birliyinin başçısı Hüseyn Sözlü işğaldan azad edilmiş Azərbaycan torpağında olmasından qürur duyduğunu bildirərək deyib: “Bu torpaqların azad edilməsi, Cocuq Mərcanlıda evlərin yenidən tikilməsi qardaş dövlət kimi bizim üçün çox əhəmiyyətlidir. Buraya sevincinizə şərik olmaq üçün gəlmişik”.
Sonra Adana şəhər Karaisalı Bələdiyyəsi ilə Cəbrayıl Rayon İcra Hakimiyyəti arasında “Qardaş şəhər” niyyət protokolu imzalanıb.
Cəbrayıl Rayon İcra Hakimiyyətinin başçısı Kamal Həsənov Azərbaycan-Türkiyə dostluğu və qardaşlığından söz açıb. Bildirib ki, bir millət, iki dövlət olan Azərbaycanla Türkiyə arasında dostluq və qardaşlığın, strateji tərəfdaşlıq və müttəfiqliyin dərin tarixi kökləri var, xalqlarımız ortaq milli-mənəvi dəyərləri ilə bir-birinə sıx bağlıdır. Adana şəhər Karaisalı Bələdiyyəsi ilə Cəbrayıl Rayon İcra Hakimiyyəti arasında “Qardaş şəhər” niyyət protokolunun imzalanması bu münasibətləri daha da möhkəmləndirəcək.
Adana şəhər Karaisalı Bələdiyyəsi başçısının köməkçisi Rəcəb Ak jurnalistlərə müsahibəsində deyib: “Biz bir millət, iki dövlətik. Bu gün Karaisalı Bələdiyyəsi ilə Cəbrayıl rayonu qardaşlıq protokolu imzaladılar. Mədəni, sosial münasibətləri daha da inkişaf etdirmək, qarşılıqlı səfərlərlə bu qardaşlığı möhkəmləndirmək istəyirik”.
Azərbaycan şəhərlərinin başqa ölkələrin şəhərlərilə qardaşlaşması prosesi çoxdandır davam edir. Bizim bir sıra ölkələrlə belə layihələrimiz var. Xüsusilə də bu yöndə Rusiyanın şəhərləri üstünlük təşkil edir. Şəhərlərlə belə niyyət protokollarının imzalanmasının ölkəmizin tanıdılması baxımından nə kimi əhəmiyyəti var?
Ekspert Günel Fərhadqızı qəzetimizə açıqlamasında bildirdi ki, belə hallar hər iki ölkə üçün yalnız müsbət nəticə vəd edir: “Azərbaycan həqiqətlərini, mədəniyyət, incəsənət, iqtisadiyyatını, potensial imkanlarını, milli ideologiyasını və s. sahələri doğru-düzgün dünya ictimaiyyətinə çatdırmaq üçün bütün vasitələrdən istifadə olunmalıdır. Bu bir aksiomdur. Ölkəmizin tanıdılmasında atılan addımlardan biri də başqa dövlətlərin bu və ya digər şəhərlərilə qardaşlaşma prosesidir.
Müxtəlif dövlətlər arasında mehriban dostluq və əməkdaşlıq mühitinin formalaşmasında bu ölkələrin şəhərləri arasında birbaşa əlaqələrin qurulması faktı da mühüm rol oynayır. Son illər ayrı-ayrı ölkələrin şəhərləri arasında qardaşlaşma prosesi geniş vüsət alıb. Bu zaman müxtəlif şəhərlər bir-birilə iqtisadi, sosial, mədəni, elmi, təsərrüfat və digər aspektlər üzrə əlaqələr qururlar. Bir-birinin bayram tədbirlərində aktiv iştirakçıya çevrilirlər. Proses ölkələr arasında möhkəm əlaqələrin qurulması istiqamətində başlıca meyarlardan biridir. Azərbaycanda da son illər müxtəlif ölkələrin şəhərlərilə qardaşlaşma prosesi geniş vüsət alıb. Bu qardaşlaşmanın dünya ölkələri və onların əhalisi arasında ölkəmiz və onun paytaxtı barədə məlumat əldə etməsində böyük əhəmiyyəti var. Bildiyimiz kimi, hər bir həyata keçirilən fəaliyyətin geniş yayılmasında təbliğat prosesi mühüm önəm daşıyır. Bu yolla xarici vətəndaşlar Azərbaycanın tarixi, qədim zamanlardakı vəziyyəti, xalqı, onun adət-ənənələri, coğrafiyası, başına gətirilən müsibətlər, erməni təcavüzü və onun nəticələri barədə geniş və doğlun biliyə yiyələnirlər. Turizmin inkişafı baxımından da belə qardaşlaşmanın xüsusi yeri var. Bunun nəticəsində xarici ölkələrdə Azərbaycanın müxtəlif dövrünə aid tarixi abidələr, Bakı ilə bağlı olan məqamlara həsr olunan sərgilər keçirilir, ayrı-ayrı şəhərlərdə paytaxtımıza həsr olunan adibələr ucaldılır. Xüsusilə də ərazisinin bir hissəsi erməni işğalı altında olan Cəbrayılla belə niyyət protokolunun imzalanması daha təqdirəlayiqdir. Çünki belə şəhərlərlə olan dostluq erməni vəhşiliyini daha bariz formada dünyaya çatdıracaq”.
Məhəmmədəli QƏRİBLİ
