Qulu İsmayılov: “Bu baxımdan keçirilən tədbiri olduqca əhəmiyyətli sayıram”
Heydər Əliyev Mərkəzində Azərbaycanda iki milyard ton neft hasil olunması münasibətilə təntənəli mərasim keçirilib. Azərbaycan Prezidenti İlham Əliyev mərasimdə iştirak edib və nitq söyləyib.
Sonra SOCAR-ın prezidenti Rövnəq Abdullayev, “28 May” Neft-Qazçıxarma İdarəsinin 10 saylı özülünün rəisi Qədim Əliyev, BP-nin Azərbaycan, Gürcüstan və Türkiyə üzrə regional prezidenti Qəri Counz, Bakı Ali Neft Məktəbinin birinci kurs tələbəsi Mahirə Əsədova, SOCAR-ın vitse-prezidenti Xoşbəxt Yusifzadə çıxış ediblər.
Prezident İlham Əliyevin sərəncamı ilə Azərbaycan Respublikasının neft sənayesi sahəsində uzunmüddətli səmərəli fəaliyyətinə görə Xoşbəxt Yusifzadə birinci dərəcəli “Əmək” ordeni ilə təltif olunub. Dövlət başçısı ordeni Xoşbəxt Yusifzadəyə təqdim edib.
Sonda Azərbaycanın neft sənayesinin tarixinə həsr edilən videoçarx nümayiş olunub.
Tədbirin mahiyyətindən məlum olur ki, Azərbaycan indiyə kimi iki milyard ton neft hasil edib. Bu, ölkəmizə nə verib?
İqtisadçı Qulu İsmayılov qəzetimizə bildirdi ki, Azərbaycanda neft sənayəsi müstəqillikdən əvvəl də geniş təşəkkül tapıb: “Ancaq təəssüflər olsun ki, həmin vaxt biz çıxarılan neftin bütün bəhrəsini görə bilmirdik. Təkcə bir faktı qeyd edim ki, neft İkinci Dünya Müharibəsində SSRİ-nin qələbəsini şərtləndirən başlıca amillərdən biri olub. Bizim neft sənayemizin ən böyük inkişafı və ölkəmizin rifah halına təsiri müstəqillikdən sonrakı illərdə olub.
“Əsrin müqaviləsi”nin imzalanması Azərbaycanın dirçəlişinə, iqtisadi inkişafına böyük yol açdı. Bir sözlə, bu müqavilənin imzalanması müstəqil Azərbaycanın inkişafının əsasını təşkil edir. Prezident İlham Əliyev belə bir fikir söyləyib ki, bizim məqsədimiz neftdən gələn gəlirləri Azərbaycan xalqının gələcək rifahına yönəltməkdən ibarətdir.
Təbii ki, xarici şirkətlərlə neft müqaviləsinin imzalanmasının həm neft sənayesinə, həm də qeyri-neft sənayesinə böyük təsiri oldu. Ümumilikdə, neft sənayesində həm neft hasilatı üzrə inkişaf getdi, həm neft emalı və s. istiqamətlərdə irəliləyiş oldu. Əsas məqsədlərdən biri də neft sənayesində yeni texnologiyaların tətbiq edilməsi idi. Bu baxımdan da neft hasilatı ölkəmiz üçün böyük əhəmiyyət kəsb edir. Bilirsiniz ki, o zaman texnologiyalar köhnə idi və güclü elmi kadr potensialımız olsa da, texnologiya və sərmayə baxımından bu işləri təkbaşına görməyə hazır deyildik. Çünki bütün bunlara maliyyə imkanlarımız yox idi.
Bir məqamı xüsusi vurğulayaq ki, «Əsrin müqaviləsi»nin imzalanmasının ən böyük nailiyyəti bu oldu ki, biz ictimai-siyasi sabitliyə nail olduq, iqtisadi inkişaf başladı, eyni zamanda iqtisadi təhlükəsizlik yarandı ki, Azərbaycan bunun sayəsində nəinki neft sənayesində, qeyri-neft sektorunda da sərmayəçilər üçün əlverişli və cəlbedici ölkəyə çevrildi. Bu çox mühüm faktdır. Məhz bunun nəticəsidir ki, ölkə iqtisadiyyatının müxtəlif sahələrinə daxili və xarici sərmayələrin həcmi 2014-cü ildə 21 milyard dollar təşkil etdi. Bu baxımdan keçirilən tədbiri olduqca əhəmiyyətli sayıram”.
Məhəmmədəli QƏRİBLİ
