Rəsul Cahangirli: “Sözügedən fərman da bunun tərkib hissəsidir”
Xəbər verildiyi kimi, Prezident İlham Əliyev “Azərbaycan Sənaye Korporasiyası” Açıq Səhmdar Cəmiyyətinin yaradılması haqqında Fərman imzalayıb.
Belə ki, səhmləri dövlətə məxsus olan “ASK” ASC dövlət əmlakının idarə edilməsinin səmərəliliyini artırmaq, korporativ idarəetmə prinsiplərinə əsaslanan hesabatlılıq və nəzarət sistemini formalaşdırmaq, dövlətə məxsus müəssisələr arasında əlverişli kooperasiya əlaqələrinin yaradılmasına və istehsal potensialının dəyər zəncirinin həlqələri üzrə artırılmasına nail olmaq məqsədilə yaradılıb. Fərmana əsasən, “ASK” ASC-də 5 üzvdən ibarət Müşahidə Şurası yaradılıb. Qurumun strukturunun təsdiqini, işçilərinin əməkhaqlarının müəyyənləşdirilməsini və nizamnaməsi ilə Müşahidə Şurasına həvalə edilmiş digər səlahiyyətləri “ASK” ASC-nin Müşahidə Şurası həyata keçirəcək.
Qeyd edək ki, ölkədə iqtisadiyyatın tarazlı, rəqabətqabiliyyətli və dayanıqlı inkişafını təmin etmək dövlətin iqtisadi siyasətinin prioritetlərindəndir. Aparılan davamlı iqtisadi islahatlar və iqtisadiyyatın diversifikasiyası siyasəti nəticəsində, iqtisadiyyatın bütün sahələrində olduğu kimi, sənayenin inkişafında da böyük uğurlar qazanılıb. Sənaye məhsulları istehsalının həcmi xeyli artıb. Uğurlu inkişafın təmin edilməsi üçün bu kimi addımların atılması zəruridir.
Maraqlıdır, ekspertlərin buna münasibəti necədir? Məsələyə münasibət bildirən ekspert Rəsul Cahangirlinin sözlərinə görə, bu, ölkədə sənayenin, qeyri-neft sektorunun inkişafına müsbət təsir göstərəcək: “Ölkə iqtisadiyyatının yeni dövrə uyğun inkişaf etdirilməsi istiqamətində uzun müddətdən bəri həyata keçirilən islahatlar, atılan addımlar davam edir. Sözügedən fərman da bunun tərkib hissəsidir. Nəzərə alsaq ki, postneft dövründə istiqsadiyyatda əsas diqqət qeyri-neft sektoru və sənayenin inkişafına yönəldilir, o zaman Azərbaycanda bu sahədə görülən işlərin davamlı xarakter alması lazımlı bir addımdır. Bu baxımdan dövlət başçısının imzaladığı fərman əsasında yaradılan “Azərbaycan Sənaye Korporasiyası” ASC bu istiqamətdə atılan ən təqdirəlayiq addımlardan sayıla bilər. Çünki ölkədə sənayenin inkişaf etdirilməsi və müasir tələblərə uyğun qurulması son dərəcə vacibdir. Təsadüfi deyil ki, fərmanda uğurlu inkişafın təmin edilməsi üçün növbəti dövrlərdə də müasir çağırışlar və yeni təşəbbüslərin nəzərə alınması xüsusi olaraq qeyd edilir. Son illər Azərbaycanda sənaye parklarının, sənaye məhəllələrinin yaradılması istiqamətində ciddi iş gedir. Ölkədə bir neçə yerdə sənaye parkı da tikilib. Sumqayıtda , Mingəçevirdə artıq bunlar istifadəyə verilib. O cümlədən Qaradağda, Balaxanıda da tikilir. İndiki vaxtda bu həm iş yerlərinin açılmasına səbəb olur, həm də insanlar müəyyən qədər məvacib alırlar. Həmçinin iqtisadiyyatın inkişafına müəyyən qədər müsbət təsir edir. Hesab edirəm ki, “Azərbaycan Sənaye Korporasiyası” ASC-nin yaradılması bu istiqamətdə görülən işlərə öz müsbət töhfəsini verəcək. Ən başlıcası isə, ölkədə sənayenin inkişafına müsbət təsir göstərəcək”.
Vidadi ORDAHALLI
