Könül Nuriyeva: “Bakı şəhərində istehsalın həcminin artması, yeni iş yerlərinin açılması, məşğulluğun artması əhalinin gəlirlərinə təsir göstərir”
2017-ci ilin yanvar-avqust aylarında əvvəlki ilin müvafiq dövrünə nisbətən Bakı şəhərində işçilərin orta aylıq nominal əməkhaqqının səviyyəsi 8,3 % artaraq 782 manat olub.
Bakı Şəhər Statistika İdarəsinin yaydığı məlumata əsasən, ən yüksək orta aylıq əməkhaqqı sənaye, tikinti və bank, icarə və istehlakçılara xidmət göstərən təşkilatlarda çalışan işçilərdə, ən aşağı əməkhaqqı səhiyyə və sosial xidmətlər, təhsil, digər kommunal, sosial, şəxsi xidmətlərin göstərilməsi və sair sahələrdəki müəssisə və təşkilatlarda çalışan işçilərdədir.
Cari ilin yanvar-avqust aylarında paytaxt Bakı şəhərində orta aylıq əməkhaqqının artması nəyin hesabına mümkün olub? İqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, ölkə başçısı İlham Əliyevin həyata keçirdiyi strategiyanın əsas yönümü sosial amillərlə bağlıdır: “Belə olan halda, iqtisadiyyat ön plana çıxır. Prezident İlham Əliyevin imzaladığı bütün sərəncamların uğurla icra olunması sayəsində iqtisadi inkişaf sürətlənir. Son zamanlar Azərbaycanın nominal gəliri 8 faiz artıb. Bu da 36 milyarda çatıb. Təbii ki, belə olan halda, əhalinin nominal gəliri artır”.
Həmsöhbətimizin sözlərinə görə, əhalinin nominal gəlirinin artmasının müəyyən səbəbləri var: “O səbəblərdən biri sosial ödəmələrin sığortalanmasıdır. Açıqlanan statistik rəqəmlərə görə, könüllü və məcburi ödənişlər həyata keçirildikdən sonra əhalinin özünün sərəncamında olan gəlir 33 milyard təşkil edib”.
K.Nuriyeva onu da bildirdi ki, Prezidentin göstərişinə əsasən, ölkənin idxaldan asılılığının azalması məqsədilə yerli istehsalın stimullaşdırılması və qeyri-neft sektorunun inkişaf etdirilməsi yönündə tədbirlər görülür: “İxracın həcmi yüksək olarsa, gəlirimiz artmış olacaq. Beləliklə, biz dünya bazarına çıxa biləcəyik. Xüsusi olaraq qeyd edim ki, ölkə başçısının sərəncamına əsasən, “Made in Azerbaijan” brendinin tanıdılması və rəqabət qabiliyyətli məhsulların dünya bazarına çıxarılması sahibkarlara əlavə stimul verir. Belə olan halda, sahibkarlar keyfiyyətli məhsul ixrac edəcəklər. Təbii ki, bu amil əhalinin gəlirlərinə təsir edəcək”.
İqtisadçının dediyinə görə, Bakı şəhərində istehsalın həcminin artması, yeni iş yerlərinin açılması, məşğulluğun artması əhalinin gəlirlərinə təsir göstərir: “Qeyri-neft sektoruna yatırılan maliyyə kapitalı kənd təsərrüfatının tam gücü ilə inkişafına səbəb olur. Onu da vurğulamaq lazımdır ki, aqrar sahənin inkişafı əhalinin gəlirlərinə də təsir göstərir”.
Günel CƏLİLOVA
