Ülviyyə Mirqasımova: “Bakı Şopinq Festivalı alış-verişdə turistlərin payının artması üçün intensiv fəaliyyət göstərir, xüsusi turist paketləri, təbliğat işləri aparır”
Bakı şəhəri beynəlxalq festivala evsahibliyi edir. Bu il ikinci dəfə keçirilən Bakı Şopinq Festivalı alış-veriş, əyləncə, moda və mədəniyyət sahələrini əhatə edir. Festival çərçivəsində şəhərin ticarət mərkəzlərində qonaqlara xüsusi endirimlər təklif olunmaqla yanaşı, müvəqqəti ticarət məkanlarında isə Azərbaycanın və bir sıra xarici ölkələrin brend ticarət nişanları geniş miqyasda təmsil olunur.
Məlumat üçün bildirək ki, oktyabrın 15-dən başlayan İkinci Bakı Şopinq Festivalı noyabrın 15-dək davam edəcək. Xatırladaq ki, ilk Bakı Şopinq Festivalı bu ilin 10 aprel – 10 may tarixlərində uğurla keçirilib. Aprel-may aylarında keçirilən festivalda ölkə əhalisi böyük həvəslə iştirak ediblər. Həmçinin, ölkəmizə gələn şopinqsevərlər də xüsusi zövqlə ticarət bayramında iştirak ediblər.
Bəllidir ki, “Baku Shopping Festival–Tax Free” nişanı olan mağazalardan 100 manatdan çox alış-veriş edən zaman məhsulların əlavə dəyər vergisinin (ƏDV) müəyyən qismi müştərilərə geri qaytarılır. ƏDV qaytarılması yalnız “Baku Shopping Festival – Tax Free” nişanı olan mağazalarda mümkündür. Nişan olmayan mağazalarda “Tax Free” sistemi tətbiq olunmur.
Onu da bildirək ki, ötən festivaldan fərqli olaraq, bu dəfə hipermarketlər, supermarketlər şəbəkəsi də ilk dəfə olaraq tədbirə qatılıb. Hətta bir sıra apteklər də festivalda ilkin olaraq təmsil olunurlar. Festivala qoşulan ticarət və xidmət obyektlərinin sayında artım var. Tərəfdaş qismində çıxış edən müəssisələrin sayı 111-dir. Həmçinin, festivalda iştirak edən 467 müəssisənin ƏDV-ni qaytarması nəzərdə tutulur. Bu tədbirə ümumilikdə 578 müəssisə qatılıb.
Festivalda paytaxtın əsas ticarət mərkəzlərində yerləşən əksər brend mağazalar iştirak edir. Əsas ticarət mərkəzləri ilə yanaşı, paytaxtın ayrı-ayrı yerlərində də Bakı Şopinq Festivalının loqosunun olduğu obyektlərə rast gəlmək olur.
Məlum olduğu kimi, Prezident İlham Əliyevin 2016-cı il 1 sentyabr tarixli "Azərbaycan Respublikasında turizmin inkişafı ilə bağlı əlavə tədbirlər haqqında” Sərəncamına əsasən keçirilən festivalın təşkili Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib.
Ticarət Festivalının gedişatı barədə "Bakı-Xəbər"ə Azərbaycan Konqreslər Bürosu idarə heyətinin sədri Ülviyyə Mirqasımova müsahibə verdi.
- 10 gündən artıqdır İkinci Bakı Şopinq Festivalı başlayıb. İkinci Şopinq Festivalı aprel-may aylarında keçirilən ilk festivaldan nə ilə fərqlənir?
- İkinci Bakı Şopinq Festivalında, birincidən fərqli olaraq, apteklər və supermarketlər də iştirak edirlər. Ölkəyə turist cəlb etmək üçün xüsusi sərfəli turpaketlər hazırlanır və daha intensiv təbliğat aparılır. Həm də budəfəki festivalda birincidən daha çox mağaza və daha geniş çeşiddə mallar təqdim olunur.
- Festivalda yerli vətəndaşlar üstünlük təşkil edir, yoxsa xaricilər? Ümumiyyətlə, xarici turistlərin Bakı Şopinq Festivalına marağı necədir?
- İlk festivalın “Tax Free” sistemi çərçivəsində 22112 hesab-faktura verilib, onlardan 20853 ədədi təsdiqlənib. Təsdiqlənmiş fakturaların 19119-u Azərbaycan vətəndaşlarına, 1734-ü isə əcnəbilərə təqdim olunub. Təsdiqlənmiş fakturalar üzrə dövriyyə 15471805 AZN olub, banklar tərəfindən əhaliyə 1533005 AZN ƏDV məbləği qaytarılıb. Bakı Şopinq Festivalı alış-verişdə turistlərin payının artması üçün intensiv fəaliyyət göstərir, xüsusi turist paketləri, təbliğat işləri aparır.
- Aprel-may aylarında keçirilən ilk festivaldan fərqli olaraq, İkinci Şopinq Festivalında iştirak edənlərin sayında artım var?
- İkinci Şopinq Festivalına qoşulan ticarət və xidmət obyektlərinin sayında da ciddi artım var. Bu festivalda tərəfdaş qismində çıxış edən müəssisələrin sayı 33-dən 111-ə qalxıb. Birinci festivalda əlavə dəyər vergisini (ƏDV) cəmi 172 şirkət qaytarıb. Budəfəki festivalda isə 467 müəssisə ƏDV qaytarılması sisteminə qoşulub
- Ülviyyə xanım, alıcılar daha çox hansı mağazalardan alış-veriş etməyə maraq göstərirlər? Onları geyim, aksesuar, parfümeriya və ya elektrik avadanlıqları olan dükanlardan daha çox hansına müraciət edirlər? Bunlardan hansında alış-veriş səviyyəsi daha yüksəkdir?
- İlk festivalın nəticələri göstərdi ki, 2017-ci ilin aprelində premium geyim və aksesuar mağazalarında 15 faizədək, kütləvi geyim brendlərinin satışını həyata keçirən mağazalarda 46 faizədək, elektronika və məişət avadanlıqlarının satışını həyata keçirən mağazalarda 200 faizədək satış həcminin artması qeydə alınıb. Düşünürük ki, İkinci Şopinq Festivalda da oxşar nəticələr olacaq. Amma dəqiq məlumatlar festival başa çatdıqdan sonra məlum olacaq.
- Ticarət bayramında iştirak edən xarici alıcılar arasında hansı ölkənin vətəndaşları üstünlük təşkil edir?
- İlk festivalın keçirildiyi aprel ayı ərzində Azərbaycana 187577 turist daxil olub. 15 hədəf ölkə üzrə keçən ilin müvafiq dövrü ilə müqayisədə bu 32 faiz artım deməkdir. Bu il də həmin hədəf ölkələrdən turistlərin gəlişini gözləyirik. Bu hədəf ölkələr Rusiya, İran, Ukrayna, Qazaxıstan, Türkiyə, Gürcüstan, BƏƏ, Səudiyyə Ərəbistanı, Qətər, Küveyt və digərləridir.
Günel CƏLİLOVA
