Rəsul Cahangirli: “Ümumilikdə, festivalın Azərbaycanın beynəlxalq arenada tanıdılmasında rolu danılmazdır”
Bakıda Şopinq Festivalın keçirilməsi çox yaxşı ideyadır. Xəbər verildiyi kimi, bunu BMT-nin Ticarət və İnkişaf Şurasının (UNCTAD) investisiya siyasəti üzrə direktoru Jorq Veber deyib.
J.Veber qeyd edib ki, Bakı Şopinq Festivalı Azərbaycana hər baxımdan xeyir gətirəcək. Bununla yanaşı, BMT təmsilçisi hesab edir ki, festival Azərbaycana turist axınının güclənməsinə təkan verəcək. O bunu bir sıra amillərlə əlaqələndirib: “Bakı çox gözəl şəhərdir. Burada şopinq etmək üçün yaxşı imkan var. Şopinq Festival çərçivəsində mal və xidmətlərin satılması böyük fürsətdir”.
J.Veberin açıqlamasından o da məlum olub ki, Bakıda Şopinq Festivalının keçirilməsi təkcə Azərbaycan deyil, bütövlükdə region üçün xüsusi əhəmiyyət kəsb edir: “Çünki həm festival müddətində, həm də festivaldan sonra Bakıya gələn turistlərin sayı əhəmiyyətli dərəcədə arta bilər. Bakı həm öz mədəni irsini turistlərə tanıda, həm də regionda necə böyük bir potensiala sahib olduğunu göstərə bilər. Ümumilikdə, Bakıda bu cür festivalın keçirilməsini çox yüksək qiymətləndirirəm”.
Azərbaycan indiyə qədər bir sıra böyük beynəlxalq tədbirlərə ev sahibliyi edib. Müşahidələr göstərir ki, həmin tədbirlər bu və ya digər formada ölkəyə turist axınının güclənməsinə öz təsirini göstərib. Bunun nəticəsində bir sıra ölkələrdən Azərbaycana gələn turistlər əvvəlki illərə baxanda artıb. Bu baxımdan Bakı Şopinq Festivalı ölkəyə turist axınının güclənməsində necə rol oynayacaq?
Məsələyə münasibət bildirən ekspert Rəsul Cahangirlinin fikrincə, tədbirin ölkəyə turist axınının güclənməsində rol oynayacağı ilə bağlı səslənən fikirlər reallığa əsaslanır: “Məsələ ondadır ki, şopinq festivalları Azərbaycanda turizm sektorunun inkişafına hesablanmış tədbirdir. Bu nəinki bizdə, bütün dünya ölkələrində belədir. Körfəz ölkələrində, Asiya və hətta Latın Amerikası ölkələrində belə şopinq festivalları ölkəyə çoxlu turist cəlb etmək məqsədi daşıyır. İkinci Bakı Sopinq Festivalı ölkəyə daha çox turistin gəlməsinə təkan verəcək. Nəzərə almaq lazımdır ki, bu dəfə 167 turizm şirkəti və 15-dək otel festivala qoşulub. Bu paketlərə aviabilet, transfer, sığorta, oteldə qalma, festival mağazalarına şopinq turların təşkili daxildir. Noyabrın 15-dək davam edəcək festival çərçivəsində müştərilər dünya brendlərinə məxsus geyim, elektronika, məişət texnikası, mebel, ətriyyat və kosmetika, eləcə də digər məhsulları Bakıda yerləşən mağazalardan xüsusi kampaniya və endirimlərlə əldə edə biləcəklər. İlkin təəssüratlar ondan ibarətdir ki, bu istiqamətdə işlər çox yaxşı gedir. Festival çərçivəsində ölkəyə gələn turistlər gələcəkdə turizm sektorunun daha da canlanmasına öz töhfələrini vermiş olacaqlar. Adətən bu kimi tədbirlər növbəti illərdə də turist axınının artmasına öz təsirini göstərir. Ümumilikdə, festivalın Azərbaycanın beynəlxalq arenada tanıdılmasında rolu danılmazdır. Festival həm iqtisadi, həm də ölkəyə gələn turist axınının artması baxımından öz effektini yaxın zamanda göstərəcək. Festival çərçivəsində ölkəyə gələn turistlər, bir növ, canlı reklam rolunu oynayırlar. Şopinq Festivalına maraq daha çox region dövlətləri tərəfindən qeydə alınıb. Birinci Bakı Şopinq Festivalı bunu bir daha sübut etdi. Həmçinin, Şərqi Avropa və yaxın qonşu dövlətlərdən gələn turistlər də ölkəmizə xeyli maraq göstərirdilər. Hətta bəzi Şərqi Avropa ölkələrindən gələn turistlər paytaxt Bakının və Azərbaycanın bu qədər dəyişib inkişaf edəcəyini təsəvvür etmədiklərini deyirdilər. O üzdən, tədbirin ölkəyə turist axınının artmasında müstəsna rol oynayacağı istisna olunmur”.
Vidadi ORDAHALLI
