"Gömrük dərəcələrinin aşağı salınması aktual məsələlərdən biridir. Üçpilləli sistemə keçidlə bağlı təkliflər var. Müxtəlif nazirliklər kimi, biz də bu təklifləri hazırlayıb hökumətə təklif etmişik. Son qərarı hökumət verəcək". "APA-Economics" xəbər verir ki, bunu Dövlət Gömrük Komitəsinin (DGK) sədri Aydın Əliyev bildirib.
Onun sözlərinə görə, ölkəyə idxal olunan xammala tətbiq olunan rüsumlara güzəştlər tətbiq olunan bilər: "Bu xammal ölkə daxilində istehsalın artırılması üçün lazımdır. Buna görə, bu məsələyə baxıla bilər, müəyyən güzəştlər tətbiq oluna bilər".
DGK sədri əlavə edib ki, bəzi aksiz dərəcələrinin artımı də nəzərdən keçirilir, lakin bu, böyük miqdarda olmayacaq: "Aksiz dərəcələrinin artırılması spesifik mallara şamil olunur. Bu isə dəfələrlə ölçülüb-biçilir. Böyük miqdarda aksiz dərəcələrinin artımı nəzərdə tutulmur".
Trend-in məlumatına görə, A.Əliyev tütün məmulatları və spirtli içkilərin idxalına tətbiq olunan aksiz vergisinin artırılmasının yüksək bahalaşmaya gətirib çıxarmayacağını deyib. Onun sözlərinə görə, aksiz dərəcəsi qaldırılarkən vəziyyət ətraflı təhlil olunur: “Tütün və spirtli içkilər ilkin ehtiyac məhsulları deyil, həm də faiz artımı çox kəskin olmayacaq”.
Qeyd edək ki, aksiz vergisinin artırılması 2018-ci il üçün Vergi Məcəlləsinə dəyişikliklər layihəsi çərçivəsində nəzərdə tutulur.
"2017-ci ildə Azərbaycanın xarici ticarət dövriyyəsi 14 mlrd. dollar təşkil edib və sevindirici haldır ki, ticarət dövriyyəsində 2 mlrd. dollarlıq müsbət saldo yaranıb". Bunu da Aydın Əliyev bildirib.
Azərbaycanda qeyri-neft sektorunun inkişafına diqqət çəkən DGK sədri deyib ki, bunun nəticəsində ölkəmizdə istehsal olunan kənd təsərrüfatı məhsullarının ixracının həcmi kəskin artıb: "2017-ci ilin 9 ayı ərzində meyvə-tərəvəz məhsullarının ixracı 63,75% artıb. Ötən il Rusiyaya pomidor ixracı 100 min ton olubsa, bu ilin 9 ayı ərzində artıq 132 min tonu ötüb. Keçən il Rusiya ilə Türkiyə arasında məlum siyasi gərginlik baş verdi və bundan sonra Rusiyanın dövlət qurumları Azərbaycanı Türkiyədən pomidor idxalını artırmaqda ittiham edirdilər. Rəqəmlərə baxdıqda bu ittihamların əsassız olduğu məlum olur. Belə ki, ötən il Azərbaycana Türkiyədən 17 min ton pomidor idxal olunubsa, bu il 3500 tondur. Bundan başqa, kartofun ixracında da artım baş verib. Belə ki, ötən il Rusiyaya kartof ixracı 37 min ton olmuşdusa, bu il 57 min tona çatıb. Təkcə qoz və fındıq məhsullarının ixracından ölkəyə 105 mln. dollar vəsait daxil olub".
Onun sözlərinə görə, hazırda Azərbaycanda 187 ölkədən olan şirkətlər fəaliyyət göstərir: "Ümumilikdə Azərbaycanda fəaliyyət göstərən xarici şirkətlərin sayı 11880-dən çoxdur".
