Azər Əliyev: “Ticarət bayramında nə qədər çox xarici vətəndaş iştirak edərsə, bunun ölkə iqtisadiyyatına təsiri müsbət olar”
Ölkəmizdə sahibkarlığın inkişafına, eləcə də Azərbaycanın turizm gəlirlərinin artmasına xidmət edən Bakı Şopinq Festivalına bir çox ölkələrdə maraq yaranıb. Xüsusilə Rusiya, Qazaxıstan, Birləşmiş Ərəb Əmirlikləri, Səudiyyə Ərəbistanı, Qətər, Oman, Bəhreyn, İran, Türkiyə, Gürcüstan və digər ölkələrdən ölkəmizə turist və müştəri axını gözlənir. Ölkəmizdə İkinci Şopinq Festivalı keçirilir.
Festivalın təşkili Azərbaycan Respublikası Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosuna həvalə edilib. Festivalın keçirilməsində məqsəd yerli şopinq sevərlərlə yanaşı, xarici alış-veriş sevənlərin də ölkəmizə toplaşmasıdır.
Bəllidir ki, xarici turistlərin ölkəmizə cəlb olunması istiqamətində müəyyən layihələr həyata keçirilir. O layihələrdən biri də Şopinq Festivalıdır.
Mədəniyyət və turizm nazirinin müavini Nazim Səmədov media nümayəndələrinə açıqlamasında qeyd edib ki, bu il keçirilən II Bakı Şopinq Festivalında əsas diqqət xarici turistlərin gəlməsinə yönəldilir. Onun sözlərinə görə, Birinci Bakı Şopinq Festivalında yerli alıcıların aktivliyi müşahidə olunub: “Builki festivalda əsas məqsəd xarici turistlərin aktivliyinə nail olmaqdır. Bunun üçün də xüsusi turizm paketləri hazırlanıb. Hazırda Rusiya, ərəb ölkələri və digər potensial turist cəlbi mümkün olan ölkələrdə turizm paketlərinin satışına başlanıb. İnanırıq ki, bu il xarici turist aktivliyi daha çox olacaq".
Turizm sahəsi üzrə ekspert Azər Əliyev bizimlə söhbətində bildirdi ki, bir çox dünya ölkələrində ticarət festivalları keçirilir. Bu cür festivallar şopinqsevərlər tərəfindən bəyənilir: “Onlar istənilən ölkədə keçirilən ticarət festivalında iştirak etmək üçün həmin ölkəyə yollanırlar. Həmin festivallardan lazımi qaydada yararlanırlar”.
Ekspertin sözlərinə görə, festivalın keçirilməsində əsas məqsəd ölkəyə daha çox turist cəlb etməkdir. Bəllidir ki, turist axını ölkəyə daha çox valyuta gəlməsinə səbəb olur: “Bakı Şopinq Festivalının keçirilməsində məqsəd yerli vətəndaşlarla yanaşı, xarici turistləri cəlb etməkdir. Artıq gözlənilən nəticə özünü göstərir. Nəzərə almaq lazımdır ki, paytaxt ərazisində İkinci Şopinq Festivalı keçirilir. Ötən ticarət bayramında da şopinqsevərlərin Bakının ticarət mərkəzlərində, dükanlarda alış-veriş etməsinin şahidi olduq. Keçən ticarət bayramında iştirak edənlər Azərbaycandan razı qayıdıblar. Onların razılığı sosial şəbəkə vasitəsilə yazdıqları fikirlərdə görünür. Onu da qeyd etmək lazımdır ki, Birinci Şopinq Festivalı dünya turizm bazarında böyük əks-sədaya səbəb oldu”.
Həmsöhbətimiz onu da vurğuladı ki, İkinci Şopinq Festivalına xarici vətəndaşlarla yanaşı, yerli sakinlər də maraq göstərir: “Rəsmi şəxslərin qeyd etdiyi kimi, bu cür tədbirlərin keçirilməsində əsas məqsəd əcnəbi vətəndaşların festivalda iştirak etməsini təmin etməkdir. Xarici vətəndaşların sayının çox olmasını istəyiriksə, onlar üçün yaradılan şəraitə xüsusi fikir vermək lazımdır. Turistlərin qarşılanmasından tutmuş, onların əyləncəsinə qədər məsələlər buna aiddir. Ticarət bayramında nə qədər çox xarici vətəndaş iştirak edərsə, bunun ölkə iqtisadiyyatına təsiri müsbət olar”.
Günel CƏLİLOVA
