Azər Həsrət: “Avropada 1000 avroya olan malı Bakı Şopinq Festivalında 300-400 avroya almaq mümkündür”
Bir neçə gündür Bakıda İkinci Şopinq Festivalına start verilib. Noyabrın 15-dək davam edəcək İkinci Şopinq Festivalında 111 müəssisə tərəfdaş qismində çıxış edir. Festivala ümumilikdə 578 müəssisə qatılıb. Qeyd edək ki, budəfəki festivalda 467 müəssisənin əlavə dəyər vergisini qaytarması nəzərdə tutulur.
Diqqətçəkən məqamlardan biri də ondan ibarətdir ki, dünya mediası Bakı Şopinq Festivalına xüsusi maraq göstərir. Dünyanın bis sıra tanınmış mətbuat orqanlarında festivala xüsusi yer ayrılır. Misir, Livan və digər ölkələrin qəzetlərində bununla bağlı məqalələr dərc olunur.
Misirin “Şəbəb əl-Nil” qəzeti oktyabrın 15-dən start götürən İkinci Bakı Şopinq Festivalı barədə məqalə dərc edib. Yazıda bildirilir ki, Mədəniyyət və Turizm Nazirliyinin nəzdində fəaliyyət göstərən Azərbaycan Konqreslər Bürosu tərəfindən təşkil edilən festival respublikaya turist axınının gücləndirilməsi, əhalinin alıcılıq qabiliyyətinin təşviq edilməsi məqsədini güdür.
Qəzet budəfəki festivalın öz alıcılarını maraqlı tədbirlərlə, əyləncəli proqramlarla və eksklüziv təkliflərlə sevindirdiyini yazır. Qeyd edilir ki, alıcıların alış-verişdən daha çox həzz alması və qazanması üçün 500-ə yaxın ticarət obyekti, market, turizm şirkəti festivala qoşulub. Festivalda geyim, elektronika məhsulları, saatlar, ətriyyat, məişət texnikası və s. kimi seçilmiş mallara 70%-ə qədər endirimlər təklif edilir.
Bununla yanaşı, İslam Əməkdaşlıq Təşkilatı (İƏT) dövlətlərinin Xəbər Agentlikləri Birliyinin İİNA agentliyi festival haqda məqalə yayıb. Məqalədə festivalın dünyanın müxtəlif ölkələrindən olan turistlərin və yerli alıcıların marağını çəkdiyi qeyd edilir.
Livanın Milli Xəbər Agentliyi (NNA) də Bakıda keçirilən sözügedən tədbirlə bağlı yazıda turistlər, alıcılar üçün yaradılan şərait, festival ərəfəsində irəli sürülən maraqlı təkliflər barədə məlumat verib. Bu sayaq faktların sayını uzatmaq da olar.
Ümumilikdə dünya mediası Bakıda Şopinq Festivalına niyə bu qədər böyük maraq göstərir? Məsələyə münasibət bildirən media eksperti Azər Həsrət bunu bir sıra amillərlə əlaqələndirdi: “Dünyada Dubay və İstanbuldan sonra Bakı şəhərində belə bir festival keçirilir. Dubay festivalı 20 ildən çoxdur keçirilir. İstanbulda isə 10 ildir belə festival təşkil olunur. Bakıda da artıq bu il ikinci dəfədir belə bir festival keçirilir. Ona görə də dünya mediası buna maraq göstərir. Bakı Şopinq Festivalının üstünlüyü ondadır ki, ucuz qiymətə gərəkli mal və məhsulları almaq mümkündür. Ərəb dünyasında bu kimi festivallara maraq böyük olduğu üçün, ərəb dövlətləri mediası buna xüsusi yer verib. Məsələn, il ərzində Dubay festivalına 2 milyon nəfərədək xarici turist gəlir. Bura təkcə Yaxın Şərq ölkələrindən deyil, Avropa ölkələrindən də gəlirlər. Eyni zamanda, belə festivallarda milyardlarla dollar dövriyyə qeydə alınır. Azərbaycan da məhz bu cür gəlirin əldə olunması üçün bu festivala başlayıb. Bakıda yazda keçirilən Birinci Festival uğurlu oldu. İndi payız festivalı da eyni uğurla davam edir. Bakı Şopinq Festivalına maraq həm də ona görə böyükdür ki, brend məhsullar, dünyanın ən sayılıb seçilən markaları sözügedən tədbirdə yarı qiymətə alıcılara təklif olunur. Belə olduğuna görə hər zaman bu kimi tədbirlərə maraq böyük olur. Məsələn, Avropada 1000 avroya olan malı, Bakı Şopinq Festivalında 300-400 avroya almaq mümkündür. Bu o deməkdir ki, bir avropalı üçün Bakıya gəlib qayıtmaq və üstəlik də həmin malı almaq daha ucuz başa gəlir. Ona görə də bu cür festivallara maraq böyük olur. İstər əhali, istərsə də dünya mediası bu cür festivallara böyük maraq göstərir”.
Vidadi ORDAHALLI
