Aydın Hüseynov: "Minimum əməkhaqqının artırılması ölkə üzrə 700-800 min vətəndaşın əmək haqqının artmasına təsir göstərəcək"
Azərbaycan Prezidenti İlham Əliyev VII çağırış Milli Məclisin ilk iclasındakı çıxışında sosial təminatın gücləndirilməsi ilə bağlı vacib mesajları təqdim etdi.
Prezident İlham Əliyev çıxışında son illər minimum əməkhaqqı və minimum pensiyadakı artımlar və bu kontekstdən növbəti ildən etibarən minimum pensiya və minimum əməkhaqqında artımların olacağını bildirib.
"İlin sonunda orta aylıq əməkhaqqının 10 faiz artacağı proqnozlaşdırılır ki, nəticədə pensiyaların artımı eyni rəqəm üzrə təmin ediləcək"
Bu barədə fikir bildirən Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov "Bakı-Xəbər"ə açıqlamasında qeyd etdi ki, Azərbaycan dövlət büdcəsi sosialyönümlü büdcədir və hər il xərclərin tərkibində sosial sahəyə ayrılan vəsaitlər prioritetlilik təşkil edir: "2025-ci ilin büdcəsi də sosial xərclər baxımından əhəmiyyətli maliyyə sənədidir. Gələn il büdcədə sosialyönlümlü xərclərin çəkisi 40 faizə yaxın olacaq. Eləcə də büdcədə sosial müdafiə və sosial təminat xərcləri 4,3 milyard manatdan 5 milyard manat nəzərdə tutulub ki, bu da 2024-cü ilin mövcud xərcləri ilə müqayisədə 14 faiz və ya 607 milyon manat çoxdur. Bundan başqa, Dövlət Sosial Müdafiə Fondunun (DSMF) özünün yığım gəlirləri ilə birlikdə sosial müdafiə sahəsində artımların böyük bir mənbəyi formalaşacaq. Bu isə sosial təminatla bağlı xərclərin məbləğinin ən azı 900 milyon manat artırılmasına səbəb olacaq ki, nəticədə bir çox sosial sahələrdə əlavə artımların maliyyə təminatı üçün əsas mənbə olacaqdır. Pensiya, təqaüd və müavinətlərin, ünvanlı sosial yardımların, digər sosial xarakterli ödənişlərin artması mümkün olacaq".
Millət vəkilinin sözlərinə görə, cənab İlham Əliyev yeddinci çağırış Milli Məclisin ilk iclasında da bununla bağlı bildirdi və artıq sosial ödənişlərin təmin edilməsi üçün müvafiq qurumlara tapşırıqlar verdiyini bəyan etdi. Hazırda aidiyyəti qurumlar minimum əməkhaqqı üzrə artım təkliflər hazırlayır. Yeni ildən minimum əməkhaqqı artımlarına start verilməsi istisna olunmur və minimum əməkhaqqının artırılması ölkə üzrə 700-800 min vətəndaşın əmək haqqının artmasına təsir göstərəcək.
A.Hüseynov onu da əlavə etdi ki, pensiyaların artımı 2024-cü ilin yekununda ölkə üzrə orta aylıq əmək haqqının faizinə əsasən müəyyənləşəcək. Çünki orta aylıq əməkhaqqının artımı, eyni zamanda, pensiyaların artmasında da əsaslı rol oynayır və bu baxımdan 2025-ci ildə pensiyalardakı artım məbləği bu göstəriciyə əsasən müəyyənləşəcək: "İlin sonunda orta aylıq əməkhaqqının 10 faiz artacağı proqnozlaşdırılır ki, nəticədə pensiyaların artımı eyni rəqəm üzrə təmin ediləcək".
Günel CƏLİLOVA
