Vüqar Bayramov: "Bakıda beynəlxalq tədbirlərin keçirilməsi Azərbaycanın iqtisadi inkişafı baxımından önəmlidir"
Bu gün Azərbaycan idmanın inkişaf səviyyəsinə görə dünyada aparıcı ölkələrdən biri kimi tanınır. Məlumdur ki, ölkəmiz Birinci Avropa Oyunlarına, IV İslam Həmrəyliyi Oyunlarına, 42-ci Ümumdünya Şahmat Olimpiadasına və onlarla belə irimiqyası beynəlxalq tədbirlərə ev sahibliyi edib.
Həmçinin, ölkəmiz 8 ildir ki, "Formula-1" yarışlarına da uğurla ev sahibliyi edir. Təbii ki, bütün bu və ya digər idman yarışlarının ölkəmizdə təşkili Azərbaycanın idman siyasətinin uğuru, beynəlxalq federasiyaların ölkəmizdə aparılan işlərə, həmçinin, idman və bədən tərbiyəsi sahəsində nailiyyətlərimizə verilən qiymətin göstəricisidir.
Azərbaycanda sentyabrın 13-15 tarixində "Formula-1" yarışları keçirildi. Paytaxt Bakıda start götürən elit yarışmalarından olan "Formula-1"-ə Azərbaycan ev sahibliyi etməklə iqtisadi gücünü, inkişafını, qonaqpərvərliyini, multikultural dəyərlərini, sabitlik adası kimi əminamanlığın hökm sürdüyü məkan olduğunu bir daha dünyaya nümayiş etdirdi.
Bakının "Formula-1" kimi mühüm yarışı da yüksək səviyyədə təşkil etməsi bir daha Azərbaycanın idman dövləti olduğunu, bu missiyanın ölkəmizin timsalında hər zaman özünü doğrultduğunu təsdiqləyir. Dünyada yarım milyarddan artıq tamaşaçı auditoriyası olan "Formula-1" yarışının növbəti dəfə Bakıda keçirilməsi ölkəmizin beynəlxalq idman aləmində qazandığı uğurları bir daha əks etdirdi.
"Bu tip yarışlar ölkə iqtisadiyyatının təqdim edilməsi, yeni sərmayələrin cəlb edilməsi, eyni zamanda, turizm sektorunda dövriyyənin artmasına xidmət edir"
Mövzu ilə bağlı fikir bildirən millət vəkili Vüqar Bayramov "Bakı-Xəbər"ə açıqlamasında bildirdi ki, Bakıda beynəlxalq tədbirlərin keçirilməsi Azərbaycanın iqtisadi inkişafı baxımından önəmlidir. Bu tip yarışlar ölkə iqtisadiyyatının təqdim edilməsi, yeni sərmayələrin cəlb edilməsi, eyni zamanda, turizm sektorunda dövriyyənin artmasına xidmət edir: "Formula-1" yarışı qeyri-neft sektoruna daha çox sərmayənin cəlb olunması baxımından olduqca önəmlidir. Neftdən kənar sektorlara investisiyanın cəlb edilməsi əhəmiyyətlidir".
Millət vəkili hesab edir ki, bu cür yarışların keçirilməsi ilk növbədə ölkəmizin imici baxımından müsbət hadisədir. Beynəlxalq tədbirlərin keçirilməsi ölkə iqtisadiyyatına töhfə verir. Xüsusən də, paytaxtda keçirilən iqtisadi tədbirlərin sayının artması turizm sektorunda canlanmaya səbəb olur: "Məlumat üçün deyim ki, "Formula-1" yarışı keçirilən ərəfədə bütün dünyanın gözü Bakıda idi. "Formula-1" kimi böyük izləyici kütləsinə malik yarışın paytaxtımızda keçirilməsi Azərbaycanın idmana verdiyi diqqətin və bu missiyanın ölkəmizdə hər zaman özünü doğrultduğunun təsdiqidir. Bu cür əhəmiyyətli idman yarışlarına ev sahibliyi etmək hər bir dövlətin beynəlxalq nüfuzunun göstəricisidir.. Bu, dövlətin kifayət qədər tanınması, müsbət imicinin formalaşması baxımından vacib məsələlərdən biridir. Dünyada bu qədər populyarlıq qazanmış "Formula-1" kimi beynəlxalq idman yarışının Bakıda təşkil olunması, əlbəttə ki, ölkəmizə ciddi iqtisadi dividendlər qazandırır. Belə yarışlar zamanı ev sahibi olmaq turizmin inkişafı, Azərbaycan xalqının milli-mənəvi dəyərlərinin təbliği baxımından olduqca əhəmiyyətlidir və bu, qonaqpərvərliyimizi, dünya xalqları arasında yüksək inkişaf etmiş bir xalq olduğumuzu beynəlxalq ictimaiyyətə nümayiş etdirir".
Günel CƏLİLOVA
