Azərbaycanda dövriyyədə olan bank kartlarının sayı getdikcə artır. Belə ki, dövriyyədə olan ödəniş kartlarının sayı ötən aya nəzərən 224 min ədəd artaraq 18 milyon 91 min ədəd təşkil edib ki, bu da ölkə əhalisinin iki qatı deməkdir.
Qeyd edilən statistika göstərir ki, əhalinin kreditlərə marağı yenidən artmaqdadır. Bu sahədə bir müddətdir nisbətən durğunluq müşahidə edilsə də, son zamanlar istehlak kreditlərinin xüsusilə plastik kartlar vasitəsilə əldə edilməsi aktuallaşıb.
Ekspertlər hesab edir ki, kartların sayının artması prosesi yaxın gələcəkdə də davam edəcək. Milli ödəniş sistemlərinin təkmilləşdirilməsi, bankların "mobil bankçılıq" xidmətlərini inkişaf etdirməsi plastik kartlardan istifadəni daha da sürətləndirib.
Bank kartı ilə ödənişin bu qədər çox artmasının iqtisadiyyata hansı müsbət və mənfi təsirləri ola bilər? Gələcəkdə hər bir insan üçün istifadə olunan kart sayına limit qoyula bilərmi?
Əkrəm Həsənov: "Bir vətəndaş müxtəlif banklardan istədiyi qədər kart əldə etmə imkanına sahibdir"
Əkrəm Həsənov "Bakı-Xəbər"ə şərhində bildirdi ki, vətəndaşda fərqli məqsədlər üçün bir neçə kart da mövcud ola bilər: "Məsələn, depozit kartı, kredit kartı və s. Eyni zamanda, bu kartlar valyutalara görə də dəyişə bilər. Bundan başqa, əgər vətəndaş sahibkardırsa, sahibkar hesabları üzrə başqa, adi fiziki şəxs kimi isə başqa kart da istifadə edə bilər. Yəni bir vətəndaş müxtəlif banklardan istədiyi qədər kart əldə etmə imkanına sahibdir. Onu da deyim ki, nağdsız hesablaşmalar həm bankların yükünü azaldır, həm vətəndaşlar üçün prosesləri daha da asanlaşdırır. Vətəndaş üstündə nağd pul gəzdirmək məcburiyyətində qalmır və nəticədə pulun oğurlanması, itməsi, zədələnməsi kimi hallarla qarşılaşmır. Nağdsız hesablaşmaların ölkə iqtisadiyyatı üçün əsas üstünlüyü isə vergidən yayınma hallarının qarşısını almasıdır. Yeganə təhlükə bank kartlarına kiberhücumlardır. Bunun qarşısını almaq üçün isə banklar təhlükəsizlik sistemlərini daha da gücləndirməlidirlər".
Üzeyir Davudov: "Kartların bu qədər sürətlə artmasının səbəbi bankların təklif etdiyi cəzbedici imkanlardır"
Maliyyə sahəsi üzrə mütəxəssis Üzeyir Davudov "Bakı-Xəbər"ə şərhində bildirdi ki, plastik kartlardan istifadənin əsas üstünlüklərindən biri də kartla ödəniş zamanı xərclənən vəsaitləri izləmək və nəzarət etməyin asan olmasıdır. İnsanlar şəxsi və ailə büdcələrinin idarə olunmasında bundan istifadə edirlər: "Kartların bu qədər sürətlə artmasının səbəbi bankların təklif etdiyi cəzbedici imkanlardır. Bank kartlarının artmasının səbəbi bankların bir-biri ilə rəqabətə girərək, kart istifadəçiləri üçün fərqli şərtlər təqdim etməsidir. Müəyyən sferalar üzrə bir bankın kartı daha uyğundur, digər sahə üzrə başqa kart daha əlverişlidir. Ona görə də hərənin 2-3 kartı olur".
Günel CƏLİLOVA
