Son günlər Azərbaycanda devalvasiya olacağı, dolların qiymətinin ən azı 2 manata qalxacağına dair xəbərlər yayılır. İddia olunur ki, 1 sentyabr seçkisindən sonra dolların satış qiyməti daha da yüksələcək. Məlumata görə, seçkinin səhərisi günü dolların qiyməti 3 manat olacaq. Bu tip məlumatlar ölkə banklarında ABŞ valyutasına olan tələbatı daha da artırıb.
Qeyd edək ki, dünən (22 avqust-red.) günün ikinci yarısından etibarən paytaxtda fəaliyyət göstərən bankların əksəriyyəti dollar satışını məhdudlaşdırıb. Hazırda banklar müştərilərə yalnız köhnə ABŞ dolları təklif edirlər. Bu zaman isə müştərilərə gələcəkdə bu valyutadan imtina edəcəkləri təqdirdə müəyyən problemlə üzləşə biləcəkləri ilə bağlı xəbərdarlıq olunur.
Əkrəm Həsənov: "Devalvasiyanın olma ehtimalı var"
Mövzu ilə bağlı fikir bildirən bank sahəsi üzrə ekspert Əkrəm Həsənov "Bakı-Xəbər"ə şərhində bildirdi ki, devalvasiyanın olma ehtimalı var: "Ancaq yaxın müddət ərzində devalvasiyanın olması gözlənilmir. Milli valyutanın proqnozunu qısa müddətli vermək olmur. Ancaq orta müddətlik nəsə demək olur. Mən deyərdim ki, 3 il ərzində devalvasiya ola bilər. Həm neft hasilatımızın azalması, həm də xərclərin artması devalvasiyanı sürətləndirə bilər. Danılmaz faktdır ki, xərc artanda büdcəyə yük düşür".
Ekspert onu da əlavə etdi ki, köhnə və təzə dollar anlayışı son aylarda Azərbaycanda ortaya çıxıb. Belə bir şey yoxdur. Dollar dollardı: "Bunun nə iqtisadi, nə də hüquqi əsası var. Dünyanın istənilən ölkəsində köhnə və yeni dollar qəbul edilir. Bizim valyutamız da milli valyutadır, nə fərqi var, köhnədir, ya yeni? Bankların satış zamanı dolları köhnə əskinasla verməsi qanunsuz deyil".
Kamran Məmmədli: "Yaxın müddət ərzində dolların 2-3 manat olması ehtimalı çox aşağıdır, ancaq…"
Iqtisadçı Kamran Məmmədli "Bakı-Xəbər"ə açıqlamasında bildirdi ki, Azərbaycanda manat inzibati qaydada tənzimlənir ki, bu da Mərkəzi Bankın və hökümətin inzibati qərarları ilə ola bilər: "Yaxın müddət ərzində dolların 2-3 manat olması ehtimalı çox aşağıdır. Ancaq gələn ilin ortaları və ya sonuna doğru əks mənzərə müşahidə oluna bilər. Bu səbəbdən də seçkidən sonra dolların məzənnəsinin yüksələcəyi fikri real görünmür".
Günel CƏLİLOVA
