Samir Bayramov: "Müasir dövrün tələblərindən biri də ünsiyyət bacarığıdır"
Sosial şəbəkədə iş yerləri ilə bağlı elanlar günü-gündən artır. Lakin həmin elanlar heç də iş axtaranları qane etmir. Belə ki, narazılığa səbəb şərtlərlərin sərt olmasıdır.
Bu günlərdə mediada Bank Respublikanın elanı qarşımıza çıxdı. Həmin elanda diqqət çəkən bəzi məqamlar var. Elanda işə qəbul olmaq istəyən şəxsin ali təhsili (çalışacağı sahə üzrə), iş təcrübəsi, xarici dil bilməsi və komputer biliyinin olması tələb olunur. Bu tələblər başadüşüləndir. Bununla yanaşı, işə qəbul olmaq istəyən şəxsdən " Müxtəlif düşüncə və dünyagörüşə malik insanlarla yazılı və şifahi ünsiyyət qurmaq bacarığı", "Məlumatlar əsasında təhlil etmə və düzgün qərar vermə bacarığı", "Direkt marketingə açıq olmaq", "Satış qabiliyyətini özündə inkişaf etdirmək həvəsi" kimi göstəricilər də tələb olunur.
Ancaq maraqlıdır, işçidə bank bu xüsusiyyətləri necə müəyyən edir və bu yoxlanılırsa obyektiv aparıldığına təminat nə qədərdi?
"İşə düzəlmək istəyən şəxs işləmək istədiyi yerə CV göndərir, həmin şəxsin CV-si uyğundursa onu müsahibəyə dəvət edirlər"
Marketinq sahəsi üzrə mütəxəssis Samir Bayramov "Bakı-Xəbər"-ə açıqlamasında bildirdi ki, şəxsi keyfiyyət və bacarıqlar bütün iş sahələrində tələb olunandır. Şəxsi bacarıqlar bizə iş həyatımızı inkişaf etdirməyə, özümüzü düzgün şəkildə ifadə edib digərləri ilə təsirli əlaqə yaratmağımıza yardım edir: "Şəxsi bacarıqların professional bacarıqlardan fərqi odur ki, onları ölçmək və yaxud isbat etmək çətindir. Məsələn, hər-hansı uğurlu kommunikasiyanı və yaxud iş yoldaşını daha uğurlu olması üçün motivasiya etməyi bir proqramla ölçmək mümkün deyil. Buna görə də, şəxsi keyfiyyətlərini nümayiş etdirməyi də bacarmaq lazımdır. İşə götürənlər namizədlərdə müxtəlif şəxsi qabiliyyətlərə nəzər yetirirlər. Bunlardan əsas iki kateqoriya məşhurdur: şəxslərarası münasibət bacarıqları və kritik düşüncə bacarıqları. Şəxslərarası münasibətlər bacarığı başqaları ilə uğurlu ünsiyyət və qarşılıqlı əlaqə yaratmaq deməkdir. Bu cür bacarıqlar inzibati, müştəri xidmətləri və idarəetmə vəzifələrində daha çox lazım olur. İşəgötürənlərin axtardıqları ən yaxşı şəxsiyyətlərarası bacarıqlar məhz bunlardır. Kritik düşüncə isə tənqidi bacarıqlar, fərdi bacarıqların vacib kateqoriyasıdır. Yəni insanın yaradıcılıq və təhlil yolu ilə əsaslı qərarlar vermək və problemləri həll etmək bacarığını nəzərdə tutur. Çox vaxt tənqidi düşünmə bacarığı tələb edən vəzifələrə mühasiblər, vəkillər, alimlər, tədqiqatçılar və müəllimlər daxildir".
Həmsöhbətimiz onu da əlavə etdi ki, vakansiyalarda daha çox ünsiyyət bacarığı önə çəkilir. Ünsiyyət bacarıqları fərdi bacarıqlar kateqoriyasına daxil olan başqa bir bacarıq qrupudur: "Bu bacarıq işəgötürənlər üçün olduqca cəlbedicidir və iş yerində uğurlu olmaq üçün, demək olar ki, hər peşədə tələb olunur. Güclü ünsiyyət bacarıqları tələb edən işlərə müştəri xidmətləri nümayəndələri, ictimaiyyətlə əlaqələr mütəxəssisləri, müəllimlər və jurnalistlər aiddir.
Direkt marketinq isə birbaşa marketinq deməkdir. Birbaşa marketinq məhsul almaq üçün açıq təklifdir. Yəni marketoloq müştərini necə şirnikləndirmək barədə düşünmür ki, birdən bunun reklam olduğunu anlamasın. Məhsulun, xidmətin faydalarını potensial alıcıya göstərmək üçün hər cür səy göstərilir. Ümumiyyətlə, bu kimi tələblər müsahibə əsasında müəyyən olunur. İşə düzəlmək istəyən şəxs işləmək istədiyi yerə CV göndərir. Həmin şəxsin CV-si uyğundursa onu müsahibəyə dəvət edirlər. Müsahibə zamanı şəxsin ünsiyyət bacarığı, təhlil etmə düşüncəsi, kritik vəziyyətlərdən necə çıxacağı müəyyən olunur. Ümumiyyətlə, bu tip tələblər tək banklarda deyil, sığorta şirkətlərində və digər şirkətlərdə də var. Onu da nəzərə almaq lazımdır ki, müasir dövrün tələblərindən biri də ünsiyyət bacarığıdır. Ola bilər ki, bank və ya hansısa şirkətdə çalışan şəxs öz tanışını, yaxınını müsahibəsiz işə qəbul edir. Zamanla həmin şəxsin gördüyü iş, davranış, ünsiyyət bacarığının olmaması üzə çıxır və həmin sahədə problemlər yaranır".
Leyla QARAXANLI
