Vüqar Bayramov: "Xarici şirkətlərin Qarabağda çalışmaq istəyi bu bölgənin iqtisadi baxımdan imkanlarının geniş olması ilə bağlıdır"
İşğaldan azad edilmiş ərazilərdə tikinti-quruculuq və bərpa işlərinin miqyası aydan-aya genişlənir. İşğaldan azad edilmiş ərazilərdə tikinti-quruculuq işlərinin intensivləşməsi Azərbaycana investisiya axını, böyük turizm potensialına malik Qarabağda yüksək gəlirli xidmət və istehsal müəssisələrinin qurulması, yeni iş yerlərinin yaradılması baxımından da geniş imkanlar açıb.
Bu isə, öz növbəsində, Qarabağın bərpasında iştirak etmək istəyən yerli və xarci şirkətlərin marağının artmasına səbəb olub. Bu sırada xarici investisiyalı şirkətlərin aktivliyi daha çox hiss olunur. Bərpa proqramında iştirak etmək niyyətində olan xarici şirkətlər bu istəklərini əksər hallarda özləri birbaşa deyil, təmsil etdikləri dövlətin rəsmi strukurları vasitəsilə Azərbaycan hökumətinə çatdırır.
Məlumat üçün bildirək ki, Qarabağın yenidən qurulmasına, yerli şirkətlərlə yanaşı, xarici investorlar da böyük maraq göstərir. Bununla bağlı KOBİA-ya 1950-dən çox müraciət daxil olub. Müraciətlərin 1450-dən çoxu yerli, 500-dən çoxu isə xarici müraciətlərdir. Ümumi müraciətlərin 980-dən çoxu investisiya layihəsidir ki, onun da 48 faizi ticarət və xidmət, 22 faizi sənaye, 22 faizi kənd təsərrüfatı, 8 faizi isə tikinti, turizm, səhiyyə, təhsil və mədəniyyət sahələrini əhatə edir. Agentliyə müraciət edən sahibkarlara işğaldan azad edilmiş ərazilərin iqtisadi və investisiya potensialına dair ətraflı məlumat, peşəkar məsləhət xidməti, müvafiq dövlət qurumları ilə əlaqələndirmə, yerli tərəfdaşların tapılması istiqamətində dəstək və xidmətlər göstərilir.
Qeyd etdiyimiz kimi, xarici şirkətlər Qarabağın bərpasında maraqlıdır. Məlumat üçün bildirək ki, bu gün Qarabağın yenidən qurulmasında ən aktiv iştirak edən Türkiyə şirkətləridir. Hazırda Azərbaycanda 4 mindən çox Türkiyə şirkəti fəaliyyət göstərir. 20-dən çox Türkiyə şirkəti həmin ərazilərdə 50-yə yaxın layihə icra edir.
İtaliya şirkətləri də Azərbaycanın işğaldan azad olunan ərazilərində aktiv fəaliyyət göstərirlər. Hazırda Azərbaycanda İtaliyanın 140 şirkəti iqtisadiyyatın müxtəlif sahələrində fəaliyyət göstərir. İtaliya şirkətlərinin gördüyü işlər miqyasına görə Türkiyə şirkətlərindən sonra ikinci yerdədir. Azad olunmuş ərazilərin yenidən qurulmasına töhfə verən ölkələrdən biri də Macarıstandır. Belarus, Çin və digər xarici ölkələrin şirkətləri Qarabağın bərpasında fəal iştirak edir.
"Xarici şirkətlərin azad edilmiş ərazilərin yenidən qurulmasında maraqlı olması onu göstərir ki, Azərbaycan bu məqamda da xarici investorlar üçün cəlbedici bir ölkədir"
Millət vəkili Vüqar Bayramov "Bakı-Xəbər"ə şərhində bildirdi ki, Qarabağ iqtisadi baxımdan cəlbedici bölgədir: "Qarabağda çalışmaq istəyən yerli və xarici şirkətlərin sayı günü-gündən artır. Xarici şirkətlər Qarabağa investisiya qoymaq, iqtisadiyyatın formalaşmasında iştirak etmək istəyirlər. Xarici şirkətlərin Qarabağda çalışmaq istəyi bu bölgənin iqtisadi baxımdan imkanlarının geniş olması ilə bağlıdır. Eyni zamanda, Qarabağda çalışan yerli və xarici şirkətlər üçün xüsusi güzəştlərin tətbiq edilməsi bu sahəyə marağı artırır. Məlumdur ki, Azərbaycan hökuməti Qarabağda çalışan xarici şirkətlərə kifayət qədər geniş miqyaslı güzəştlər təklif edir. İşğaldan azad edilən bölgələrdə çalışan şirkətlər 10 il müddətinə vergidən azad olunub. Bu səbəbdən də xarici şirkətlər Qarabağda çalışmaq istəyir. Sözsüz ki, xarici şirkətlərin azad edilmiş ərazilərin yenidən qurulmasında maraqlı olması onu göstərir ki, Azərbaycan bu məqamda da xarici investorlar üçün cəlbedici bir ölkədir".
Günel CƏLİLOVA
