Akif Nəsirli: "Bu mesaj Şuşaya və işğaldan azad edilmiş digər ərazilərimizə sərmayə qoymağı planlaşdıran insanlara, xarici şirkətlərə stimul verir"
Bütün istiqamətlərdə çox faydalı və səmərəli olan Türk Dövlətləri Təşkilatının (TDT) qeyri-rəsmi Şuşa Zirvəsi başa çatdı. Bildiyimiz kimi, Şuşada Türk Dövlətləri Təşkilatının qeyri-rəsmi Zirvə görüşündə Qarabağ bəyannaməsi imzalanıb.
TDT-nın qeyri-rəsmi Zirvəsi Qarabağa xaricdən investisiya cəlbi prosesinə necə təsir göstərəcək?
"Bundan sonra investorlar öz maraqlarına uyğun olaraq işğaldan azad edilmiş ərazilərə yatırım qoymağa başlayacaqlar"
Liberal İqtisadçılar Mərkəzinin sədri Akif Nəsirli "Bakı-Xəbər"ə şərhində bildirdi ki, Türk Dövlətləri Təşkilatının qeyri-rəsmi Şuşa toplantısı əsasən payızda Azərbaycanda keçiriləcək COP29-a türk dövlətlərinin cəlb edilməsidir. O qeyd etdi ki, COP29 öncəsi Azərbaycanda belə bir tədbir keçirilməli idi və keçirildi. "Zirvənin keçirilməsi məkanı kimi Şuşanın seçilməsi, əlbəttə, Azərbaycanın seçimidir. Belə bir mötəbər tədbirin Şuşada keçirilməsi dünyaya bir mesajdır ki, Şuşa təhlükəsizdir, əlverişli bir iqtisadi zonada yerləşir və burada nə mina təhlükəsi, nə düşmən dövlətin təhdidi var. Yəni düşmən dövlətin təhlükəsi və mina təhdidi olsaydı bu qədər dövlət başçısı Şuşa şəhərinə toplanmağa risq etməzdi. Bu baxımdan, Şuşada o toplantının keçirilməsi, orda qəbul edilən Şuşa Bəyannaməsi, bunlar hamısı dünyaya bir mesajdır. Əlbəttə, bu mesaj Şuşaya və işğaldan azad edilmiş digər ərazilərimizə sərmayə qoymağı planlaşdıran insanlara, xarici şirkətlərə stimul verir. Hesab edirəm ki, bundan sonra Şuşada və düşmən tapdağından azad edilmiş başqa torpaqlarımızda xarici investisiyanın, ən azı türk dövlətlərinin investisiya yatırımlarının artmasını müşahidə edəcəyik. Onu da qeyd edim ki, türk dövlətləri bu vaxta kimi də müəyyən qədər azad ərazilərə investisiya qoyub. Məsələn, Özbəkistan Füzulidə təmənnasız olaraq öz vəsaiti hesabına Uluqbəy adına çox gözəl, möhtəşəm bir orta məktəb tikib. Qazaxıstan da orda mədəniyyət mərkəzi inşa edib. Bunlar dövlət səviyyəsində görülən işlərdir. Bundan sonra investorlar öz maraqlarına uyğun olaraq işğaldan azad edilmiş ərazilərə yatırım qoymağa başlayacaqlar. Bu, həm hasilat sənayesi, həm qida sənayesi ilə ola bilər. Bu ərazilərdə çox şəfalı sular var, yeraltı bulaqlardan qaynayan müalicəvi sular mövcuddur. Kəlbəcərdə məşhur İstisu, məşhur Turşsu var ki, onlardan qida sənayesində istifadə etmələri mümkündür".
A.Nəsirli qeyd etdi ki, orda zavod tikilir, amma hələ istehsal yoxdur. A.Nəsirli hesab edir ki, azad ərazilərdə keçirilən beynəlxalq toplantılarda o ərazilərin barəsində videoçarxlar, stendlər təqdim etdirməliyik, o ərazilərin əhəmiyyətini diqqətə çatdırmalıyıq. "Orada yaradılmış güzəşli iqtisadi zonanın müsbətlərini diqqətə çatdırmalıyıq. Yəni oradakı vergi güzəştlərini, yaradılan münbit şəraiti beynəlxalq tədbirlərdə, sərgilərdə təbliğ etməliyik"-deyə qeyd edən A.Nəsirli arzu edir ki, COP29-un da panel tədbirlərindən bir çoxu işğaldan azad edilmiş ərazilərdə keçirilsin. O hesab edir ki, Füzulidə buna şərait var.
İradə SARIYEVA
