92 benzinin və dizelin bahalaşması qaçılmazdır - elektrik maşınlara keçid bundan sonra sürətlənəcək...
Yaxın vaxtlarda Azərbaycanda Aİ-92 markalı benzinin və dizelin bahalaşacağı ilə bağlı məlumatlar yayılmaqdadır. Qeyd edək ki, bu məlumatlar rəsmi xarakter daşımır. Yəni sadəcə olaraq, belə demək mümkünsə, şayiə xarakteri daşıyır.
Məlumatın ilkin mənbəyi "Bakinski Burila" Teleqram kanalıdır. Həmin kanalın məlumatında bildirilir ki, qiymət artımı çox olmayacaq. Bir daha qeyd edək ki, məlumat rəsmi xarakter daşımır. Amma hesab olunur ki, perspektivdə belə bir addım olarsa, bu, zərurətdən irəli gələcək. Çünki Aİ-92 markalı benzinin keyfiyyəti yüksək deyil və nisbətən ucuzdur. Həm də Aİ-92 və dizel bir tərəfdən ciddi ekoloji problemlər yaradır, digər tərəfdən isə dünyada geniş vüsət almış elektrik mühərriklərə Azərbaycanda keçidi ləngidir. Hazırda ölkədə Aİ-92 markalı benzinin 1 litrinin pərakəndə satış qiyməti 1 manat, dizelinki isə 80 qəpikdir. Qeyd olunduğu kimi, sözügedən yanacaqların həm keyfiyyət göstəriciləri aşağıdır, həm də ekologiyaya vurduğu zərər kifayət qədər böyükdür. Ölkəyə gətirilən avtomobillərin demək olar əksəriyyəti yüksək oktanlı yanacaqla işlədiyindən, Aİ-92 markalı benzin və ya avro-5 standartlarına uyğun olmayan dizel onları sıradan çıxarır. Sürücülərin Aİ-92 markalı benzin və dizellə bağlı narazılığı bu fonda getdikcə artır. Maşın ustaları da deyir ki, onların yanına gələn sürücülərin böyük əksəriyyəti idarəetmə zamanı mühərrikdə yaranan silkələnmədən, səs-küydən şikayət edirlər. Araşdıranda isı bəlli olur ki, xarab olan detallar yoxdur, mühərrikdə yaranmış problem yanacaqdan qaynaqlanır. Bu fonda onlarla bağlı zəruri tədbirlərin görülməsi vacib xarakter daşıyır. Yanacağın keyfiyyəti ilə bağlı yaranmış vəziyyət, ortaya çıxan narazılıqlar artıq onu deməyə əsas verir ki, bu məsələyə müdaxilə olunmalıdır. Bundan başqa, nəzərə alınamalıdır ki, hökumət hibrid və elektrik mühərriki ilə işləyən avtomobillərin stimullaşdırılması istiqamətində zəruri tədbirlər həyata keçirir. Bu vəziyyətdə ölkəyə gətirilən hibrid avtomobillərin ildən-ilə sayı və dəyəri sürətlə artır. Hökumətin bu sahədə tətbiq etdiyi güzəştlər elektrik mühərriki ilə işləyən avtomobillərə marağı artırıb. Hazırda ölkəmizin bir neçə şəhər və rayonlarında sürətli enerji doldurma məntəqələri var. Elektromobil və hibrid avtomobillərin sayı artdıqca belə məntəqələrin sayının artmasına gətirib çıxaracaq. Araşdırmalara əsasən, ekologiyaya ən çox yanacaqla işləyən avtomobillər zərər vurur. Lakin hibrid və elektrik mühərriki ilə işləyən avtomobillər "ekologiyanın dostu" hesab olunur. Bu səbəbdən onların sayının artması ekologiyaya da xeyirdir. Qiymət artımı olsa, ölkədə elektrik avtomobillərinə keçid sürətlənəcək.
Tahir TAĞIYEV
