2024-cü ilin yanvar-aprel aylarında ölkə üzrə ortaaylıq əməkhaqqı əvvəlki ilin müvafiq dövrünə nisbətən 10,2 faiz artıb. Bu barədə Dövlət Statistika Komitəsinin məlumatında qeyd olunub. Bununla da, orta maaş 1007,5 manata yüksəlib.
Qeyd edək ki, əməkhaqqı neft-qaz sektorunda 4031,5 manat, qeyri-neft-qaz sektorunda 950,5 manat təşkil edib.
Dövlət müəssisələrində çalışan işçilərin ortaaylıq əməkhaqları 943,2 manat, özəl müəssisələrdə isə 1077,2 manat olub.
Maraqlıdır, orta aylıq əməkhaqqının artımına hansı amillər təsir edir? Ümumiyyətlə, əhalinin təxminən neçə faizi 1000 manat əmək haqqı alır?
Vüqar Bayramov: "Respublika üzrə orta aylıq əmək haqqı proqnozlaşdırılandan daha çox olacaq"
Millət vəkili Vüqar Bayramov "Bakı-Xəbər"ə açıqlamasında bildirdi ki, 2024-cu ildə orta aylıq əmək haqqının daha çox olacağı gözlənilirdi: "İlkin gözlənti ondan ibarətdir ki, ilin sonuna qədər orta aylıq əmək haqqı 1000 manat olacaq. Əmək haqqı artımının əsas səbəblərindən biri dövlət və özəl sektorda maaşların müqayisəli şəkildə artması ilə bağlıdır. Məlumdur ki, bir sıra sahələrdə əmək haqqı artıb. Bu da orta aylıq əmək haqqına təsir göstərir. Nəticədə respublika üzrə orta aylıq əmək haqqı proqnozlaşdırılandan daha çox olacaq".
Əkrəm Həsənov: "Orta aylıq əmək haqqı 1000 manatdırsa, minimum əmək haqqı 600 manat olmalıdı, ancaq belə deyil"
Iqtisadçı ekspert Əkrəm Həsənov "Bakı-Xəbər"ə şərhində bildirdi ki, Azərbaycanda hər kəs bərabər əmək haqqı almır: "Elə işçilər var ki, onların əmək haqqısı 10 min manatdan yuxarıdır. Məlumdur ki, özəl şirkətlərdə, bank sektorunda əmək haqqı yüksəkdir. Bəzilərinin isə maaşı minimumdur – 345 manat. Beynəlxalq qanunvericiliyə əsasən, ölkənin minimal əmək haqqı orta əmək haqqının azı 60 faizi olmalıdır. Orta aylıq əmək haqqı 1000 manatdırsa, minimum əmək haqqı 600 manat olmalıdır. Ancaq belə deyil. Yaxşı olar ki, orta aylıq əmək haqqı ilə yanaşı, nə qədər insanın minimum maaş aldığını da açıqlasınlar. Təəssüflər olsun ki, bəzi dövlət idarələri əmək haqqı tələbinə əməl etmir. Onlara minimum əmək haqqı 600-700 manat tələbi qoyulsa da işçilərə 400-500 manat maaş verir. Bu kimi idarələr araşdırılmalı və məsuliyyətə cəlb edilməlidir. Təki 1000 manat əmək haqqı alanların sayı çox olsun".
Günel CƏLİLOVA
