Azərbaycanda “Yaşıl enerji”yə 5 milyard yatırmaq istəyən şirkət özünü bəyan etdi...
Fuad İbrahimli: "Bu ilk növbədə Azərbaycanın investisiya cazibədarlığının göstəricisidir"
"Acwa Power" Azərbaycana 5 milyard dollara yaxın investisiya yatıracaq. Bu sözləri "Acwa Power" şirkətinin EVP - regional direktoru Abid Malik Bakı Enerji Forumunda "Davamlı Enerji: Xəzər regionunda Yaşıl Enerji Potensialı" mövzusunda keçirilən panel müzakirəsində çıxışı zamanı deyib.
O bildirib ki, investisiya əsasən bərpaolunan enerji sahəsinə yatırılacaq. "Acwa Power" olaraq Azərbaycanda bir müddətdir ki, fəaliyyət göstəririk. Bərpaolunan enerji ilə bağlı burada perspektiv çoxdur. Belə ki, siyasi baxımdan stabil region olmaqla yanaşı, tranzit yollar və dəhliz üstünlüklərini nəzərə alsaq Azərbaycan çox əlverişlidir və bizim üçün hədəf ölkədir. Eyni zamanda, biz SOCAR-la da əməkdaşlıq edirik. Bizim planlarımızdan biri Azərbaycan ilə əməkdaşlıq edərək yaşıl enerjini inkişaf etdirməkdir. Burada tamamlanacaq mərhələlər çoxdur", - deyə o, diqqətə çatdırıb.
"Bildiyim qədər, bu şirkət dəniz enerji stansiyasının tikintisinə maliyyə ayıracaq"
İqtisadçı ekspert Fuad İbrahimli "Bakı-Xəbər"ə bildirdi ki, "Acwa Power" şirkəti Azərbaycana 5 milyard dollar həcmində investisiya yatırmağa hazırdır. "Ümumiyyətlə, hər hansı bir xarici şirkət investisiya yatırımı barədə qərar qəbul edirsə, bu ilk növbədə Azərbaycanın investisiya cazibədarlığının göstəricisidir. Bilirsiz ki, investisiyalar hara gəldi qoyulmur. Bu gün kifayət qədər ölkələri misal gətirmək olar ki, zəngin təbii sərvətləri var, ancaq bu ölkələrə müxtəlif səbəblərə görə investisiya qoyulmur. Bu əsasən siyasi problemlərlə, münaqişələrlə, iqtisadi natarazlıqla, infrastrukturların, qanunvericilik bazasının olmaması ilə bağlı ola bilir. Yəni bir çox əmsallar var, bu göstəricilər olmalıdır ki, ora investisiya yatırılsın. İkinci göstərici ondan ibarətdir ki, burada söhbət çox spesifik bir sahədən, "yaşıl enerji"dən gedir. Bu spesifik sahədir. Eyni zamanda risqli sahə sayılır. Bu səbəbdən risqli sahədir, yatrım edilməmişdən əvvəl müəyyən təhlillər aparılmalıdır ki, bu gün burda varmı. Söhbət təbiətin gücündən gedir. Ancaq Azərbaycan qabaqlayıcı tədbirləri görür. Müəyyən dövrdür ki, ölkəmizdə alternativ enerjilərin iqtisadi dövriyyəyə cəlb edilməsi ilə bağlı müəyyən qurumlar yaranıb, güclərimizin müəyyən edilməsi istiqamətində tədqiqatlar aparılıb. Bizim hazır materialları təqdim etməyimiz əsasında görürsüz ki, bu şirkət də artıq bu sahəyə investisiya qoymağa hazır olduğunu bəyan edir. Bildiyim qədər, bu şirkət dəniz enerji stansiyasının tikintisinə maliyyə ayıracaq"-deyə bildirən F.İbrahimli qeyd etdi ki, 5 milyard dollara yaxın vəsait kifayət qədər böyük invstisiyadır.
F.İbrahimlinin sözlərinə görə, birincisi, nəzərə alaq ki, Azərbaycan dənizdə, quruda bütün alternativ enerjilərinin imkanlarını, gücünü, perspektivlərini müəyyən etmək istiqamətində işlər görüb. O, qeyd etdi ki, müəyyən etdiyimiz gücü artıq bu gün iqtisadi dövriyyəyə cəlb etməliyik və onun üçün də tək vəsait kifayət etmir, burada eyni zamanda böyük təcrübəsi olan şirkətlərin iştirakı lazımdır. " Bu baxımdan, hesab edirəm ki, "Acwa Power" şirkəti həm sərmayəçi, həm bir peşəkar qurum kimi iştirakı çox faydalı olacaq. Biz digər layihələri qısa zaman kəsiyində iqtisadi dövriyyəyə cəlb etdik. Artıq o layihələrin icra meaxnizmi mövcuddur. Burada da bu proses davam edəcək. Bunun bir xüsusi əhəmiyyətini də qeyd edək, COP29 öncəsi belə layihələrlə bağlı qərarın qəbul edilməsi, imzalanması faktiki olaraq 5 milyarda yaxın vəsaitin yönəldilməsi haqda təsdiq, o artıq əlbəttə, mühüm əhəmiyyət kəsb edən bir hadisədir. Özümü də, bütün xalqımızı da bu məsələ ilə bağlı təbrik edirəm. Çünki həqiqətən 5 miyard dollara yaxın sərmayə sıradan bir sərmayə deyil"-deyə F.İbrahimli qeyd etdi.
İradə SARIYEVA
