Elçin Bayramlı: "Xarici şirkətlər Azərbaycanın "yaşıl enerji" potensialını yüksık qiymətləndirir"
4-6 iyun tarixlərində regionun enerji sahəsində mühüm hadisə olan Bakı Enerji Həftəsi keçiriləcək. Bakı Enerji Həftəsi özündə üç mötəbər tədbiri birləşdirir: 29-cu Beynəlxalq Xəzər Neft və Qaz Sərgisi "Caspian Oil&Gas", 12-ci Xəzər Beynəlxalq Energetika və Yaşıl Enerji Sərgisi "Caspian Power" və 29-cu Bakı Enerji Forumu. "Caspian Oil&Gas" və "Caspian Power" sərgiləri Bakı Ekspo Mərkəzində, Bakı Enerji Forumu isə ekoloji konseptdə inşa edilmiş Bakı Konqres Mərkəzində təşkil ediləcək.
Hər il keçirilən və özündə üç mühüm tədbiri birləşdirən Bakı Enerji Həftəsi bütün dünyanın enerji sənayesi sahəsində mövcud olan liderlərini bir araya gətirir və bununla da diqqəti Azərbaycanın üzərinə cəmləşdirir. Azərbaycan Respublikasının Prezidenti İlham Əliyevin Bakı Enerji Həftəsinin açılış mərasimində iştirakı bu tədbirin yüksək statusunu təsdiqləyir.
Bakı Enerji Həftəsi çərçivəsində keçirilən tədbirlərə Azərbaycan Respublikasının Energetika Nazirliyi dəstək göstərir, Azərbaycan Respublikası Dövlət Neft Şirkəti (SOCAR) isə baş tərəfdaş qismində çıxış edir.
Bakı Enerji Həftəsində 37 ölkədən 300-dək şirkət iştirakını təsdiq etmişdir. Tədbirdə Azərbaycanla yanaşı, ABŞ, Almaniya, Avstraliya, Avstriya, Belarus, Belçika, Bəhreyn, Birləşmiş Ərəb Əmirlikləri, Bolqarıstan, Böyük Britaniya, Çexiya, Çin, Əlcəzair, Finlandiya, Fransa, Gürcüstan, Hindistan, İraq, İsrail, İsveç, İtaliya, Latviya, Qazaxıstan, Qətər, Macarıstan, Monako, Niderland, Norveç, Özbəkistan, Rumıniya, Rusiya Federasiyası, Səudiyyə Ərəbistanı, Sloveniya, Türkiyə, Ukrayna və Yaponiya iştirak edir. Bu ölkələr arasında İsveç, Hindistan və Sloveniyadan olan şirkətlər ilk dəfədir ki, tədbirə qatılırlar. Builki sərginin tərkibi iştirakçıların ümumi sayının 15%-ni təşkil edən yeni şirkətlər hesabına yenilənib. Onların əksəriyyəti Azərbaycanın yaşıl enerji sahəsinə yüksək maraq göstərən xarici iştirakçılardır. Sərgi sahəsinin 40%-i isə tanınmış şirkətlərə, sərgilərin daimi iştirakçılarına məxsusdur.
Bu şirkətlər Azərbaycanın yaşıl enerji sahəsinə maraq göstərirlər.
Sosial-iqtisadi sahə üzrə ekspert, araşdırmaçı Elçin Bayramlı "Bakı-Xəbər"ə açıqlamasında bildirdi ki, ənənəvi olaraq keçirilən enerji həftələri bu sahədə dünya iqtisadi dairələrində Azərbaycanın reytinqini daha da qaldırır. "Eyni zamanda ölkəmizi bir enerji mərkəzi kimi tanıdır və formalaşdırır. Çünki atom enerjisi istisna olmaqla, demək olar ki, bütün enerji növlərində Azərbaycan bir mərkəzə çevirilib. Həm istehsalçı, həm tranzit qovşağı olaraq mərkəz rolunu oynayıb. Dünyanın da energetika iqtisadiyyatının az qala birja mərkəzlərindən biridir. Bu kimi tədbirlər tez-tez keçirildikcə müxtəlif nüfuzlu dünya şirkətləri ilə bizim bu sahədə olan şirkətlərin arasında koordinasiya artır, müştərək layihələr ortaya çıxır. Həm regional, həm qlobal enerji layihələrinin əsası qoyla bilər. Məsələ təkcə ənənəvi enerji resursları ilə bağlı deyil. Məsələn, Azərbaycan əvvəllər neft ölkəsi kimi tanınırdı, sonra qaz sahəsində çox böyük irəliləyiş əldə etdik, eyni zamanda artıq dünyanın bir çox ölkələrinə elektrik enerjisi ixrac edirik. Bunlardan əlavə, son dövrlər bərpa olunan, alternativ enerji, "yaşıl enerji" istiqamətində də müxtəlif layihələr həyata keçirilir. Bu səbəbdən də Avropa iqtisadiyyatçıları, siyasətçiləri, xarici şirkətlər Azərbaycanın "yaşıl enerji" potensialını yüksık qiymətləndirirlər və yaxın gələcəkdə Azərbaycandan "yaşıl enerji" ixracının mümkün olacağını deyirlər. Bizim müxtəlif formalarda alternativ enerji imkanlarımız var. Məlumdur ki, günəş enerjisi, külək enerjisi potensialımız çox yüksəkdir. Yeni enerji növlərində "yaşıl hidrogen" deyilən enerjinin istehsalına artıq Azərbaycanda üstünlük verilməyə başlayır. Dövlət siyasəti də bu yöndədir"-deyə bildirən E.Bayramlı qeyd etdi ki, Prezident İlham Əliyev də öz çıxışlarında bununla bağlı bir çox vacib məqamlara toxunub. Onun vurğuladığına görə, çünki qlobal energetkada sistem tədricən dəyişir, ənənəvi enerjilərin yerini "yaşıl enerji", altenativ enerji tutur. O, bildirdi ki, biz qlobal statistikalara baxanda həm Avropada, həm dünyanın bir çox ölkələrində, Azərbaycanın özündə də bərpa olunan enerjinin payı artır. "Bu baxımdan, baxsaq gələcəyin enerji bazasında (iqtisadiyyatın mühərriki energetikadır) dünyanın enerji mərkəzinə çevrilmək bir ölkə üçün çox arzuolunandır"-deyə E.Bayramlı qeyd etdi.
O bildirdi ki, Bakıda hətta enerji birjasının formalaşması da mümkündür. "Bütün bunlar ölkəyə strateji planda çox böyük fayda gətirəcək, təbii ki, indi də gətirir. Amma bizim bu sahədə təcrübəmiz, təbii resurslarımız, potensialımız çoxdur, biz onun cüzi hissəsindən istifadə edirik. Getdikcə bu sahəyə üstünlük verməklə ölkənin iqtisadi gəlirlərinin və beynəlxalq nüfuzunun artması dolayısı yolla sosial vəziyyətin də yaxşılaşmasına gətirib çıxaracaq"-deyə qeyd edən müsahibimiz qeyd etdi, bu həm də qeyri-neft sektorunun inkişafına dəstək verir. O hesab edir ki, bu istər günəş panellərinin, istər hidrogen enerjisinin istehsalında özünü ifadə edəcək.
E.Bayramlı hesab edir ki, bu baxımdan xarici şirkıətlərin Enerji Həftəsinə marağı böyükdür. Onun fikrincə, bu yeni investisiyalar, iqtisadiyyatın başqa sahələrinin inkişafı deməkdir. "Böyük bazarlar var ki, biz enerji resurslarımızı rahat şəkildə ora ixrac edə bilirik. İqtisadi siyasətin əsasən bu bazar üzərində qurulması doğrudur. Bu sahədə təcrübəmiz, nüfuzumuz, reytinqimiz var"-deyə bildirən E.Bayramlı qeyd etdi ki, dünyanın yaşıl enerji sektorunda maraqlı olan şirkəıtlərinin ölkəmizin "yaşıl enerji" sektoruna maraq göstərməsi təbii qarşılanmalıdır.
Leyla QARAXANLI
