Akif Nəsirli: "Ölkənin daxilində vacib ərzaq məhsulları strateji məhsul elan edilməlidir"
Ölkəmizdə ərzaq təhlükəsizliyinin mühüm istiqamətlərindən biri də kənd təsərrüfatının aparıcı sahələrindən sayılan heyvandarlığın inkişaf etdirilməsi ilə bağlıdır. Bu isə daxili bazarda ət və ət məhsullarına olan tələbatın yerli istehsal hesabına ödənilməsi deməkdir.
Lakin gündəlik qida rasionumuzda mühüm yer tutan ətin qiymətində son illər davamlı bahalaşma müşahidə olunur.
Ətin satış qiymətinin dayanmadan artması barədə müxtəlif fikirlər səslənir. Iddia olunur ki, heyvandarlıq üçün əlverişli torpaqlar yararsız hala düşdüyü üçün bu sahə daha da pisləşməyə doğru gedir. Bu hal isə ətin satış qiymətinin daha da artmasına səbəb olacaq.
"Heyvandarlığı pambıqçılığa qurban verməklə əslində biz uduzuruq, örüşlər, fermaaltı sahələr, yem istehsalı üçün olan torpaqlar öz təyinatı üzrə istifadə edilməlidir"
Liberal İqtisadçılar Mərkəzinin sədri Akif Nəsirli "Bakı-Xəbər"ə açıqlamasında bildirdi ki, hazırda Azərbaycanın ətə olan tələbatının yarıdan çoxu idxal hesabına təmin olunur: "Bunun səbəbi heyvandarlıq sahəsi ilə məşğul olan əhalinin torpaqlarının, yem istehsalı üçün istifadə etdikləri sahələrin 2015-cu ildə əllərindən alınaraq yerində pambıq əkilməsidir. Heyvandarlıqla məşğul olan fermerlər isə ildən-ilə öz təsərrüfatlarını kiçiltməyə məcbur oldular. Heyvandarlığı pambıqçılığa qurban verməklə əslində biz uduzuruq. Örüşlər, fermaaltı sahələr, yem istehsalı üçün olan torpaqlar öz təyinatı üzrə istifadə edilməlidir. Hökumət pambıqçılığın strateji sahə elan edilməsini aradan qaldırılmalıdır. Ölkənin daxilində vacib ərzaq məhsulları strateji məhsul elan edilməlidir. Bununla da biz həm xaricdən asılılığımızı azalda bilərik, həm də ölkədən valyuta axınının qarşısını ala bilərik".
Ekspert hesab edir ki, işğaldan azad edilmiş ərazilərdə heyvandarlığın inkişafı mümkündür. Lakin həmin ərazilərdə hələ məskunlaşma minimum səviyyədədir, mina təhlükəsi aktualdır. Bu gün hökumət işğaldan azad olunmuş ərazilərin yalnız 10-15 faizini minalardan təmizləyib. Həmin ərazilərdə heyvandarlığı inkişaf etdirmək üçün tamamilə təmizlənmə işləri aparılmalıdır: "Məlumdur ki, Kəlbəcərin, Laçının geniş otlaq sahələri var, hansı ki, ora əkin üçün yararlı deyil, heç ağac da əkmək mümkün deyil. Oralarda yalnız birillik bitkilər, otlar, kollar bitir. Həmin ərazilərə heyvanların köçürülməsi, bəslənməsi üçün minalar tamam təmizlənməli, təhlükə tam aradan qalxmalıdır. Bizim fermerlərimiz, heyvandarlıqla məşğul olan əhalimiz o yaylaqlara sərbəst gedə bilməlidirlər, heyvanlarını o yaylaqlara aparmalıdırlar. İllər ötdükcə, o torpaqlardan istifadə imkanlarımız artacaq. Heyvandarlıqla məşğul olmalı olan əhali ora köç etməlidir, sərbəst gedib-gələ bilməlidir".
Günel CƏLİLOVA
