Əkrəm Həsənov: "Həmin bankın heç vaxt güclü kadrları olmayıb, indi ola bilər ki…"
"Bank BTB"nin rəhbərliyində dəyişikliklər davam edir. Bu dəfə bankın Müşahidə Şurasının üzvü İkram Hümbətov vəzifəsindən ayrılıb. Onun yerinə isə bankın audit komitəsinin üzvü Ramin Hüseynov təyin edilib.
Qeyd edək ki, ilin əvvəlində Bank BTB-nin İdarə Heyətinin sədr müavini Rauf Qurbanov bankdan ayrılmışdı. Eyni zamanda bir neçə departament rəhbəri və işçilərin də bankdan ayrıldığı haqqında məlumatlar yayılıb.
Maraqlıdır, son zamanlar "Bank BTB" ilə bağlı nə baş verir ki, rəhbər işçilər bir-bir bankdan ayrılır?
"Bankın maliyyə vəziyyəti yaxşı deyil, buna görə də rəhbər vəzifədə çalışanlar bir-bir işdən ayrılır"
Bank sahəsi üzrə ekspert Əkrəm Həsənov "Bakı-Xəbər"ə açıqlamasında bunları qeyd etdi: "Bankın rəhbər işçilərinin işdən ayrılmasının iki səbəbi ola bilər. İlk olaraq deyim ki, bankın maliyyə vəziyyəti yaxşı deyil, buna görə də rəhbər vəzifədə çalışanlar bir-bir işdən ayrılır. Həmçinin, həmin işçilər özlərinə daha yaxşı iş təklifi aldıqları üçün oranı tərk edə bilər. Zaman-zaman belə hallar baş verir. "Bank BTB"ni mən heç vaxt ciddi bank kimi qəbul etməmişəm. Ümumiyyət, həmin bankın heç vaxt güclü kadrları olmayıb. İndi ola bilər ki, ya işçiləri digər işə qəbul edilib, yaxud maaş problemi yaşanıb. Hansısa vəzifənin yerinə namizədin olmaması onu göstərir ki, kadr özü gedib. Çünki adətən çıxaranda namizədi tapıb, sonra həmin həmin şəxsi vəzifədən azad edirlər".
Həmsöhbətimizin sözlərinə görə, Azərbaycanda yüksək maaş verməyən banklar ya çox böyük, ya da çox kiçik banklardır. Ən yüksək maaş ölkədə orta səviyyəli banklardadır: "Kiçik bankların bir qayda olaraq imkanı yoxdur, hesab edirlər ki, burada elə də iş yoxdur, kadrları az, elə də yüksək səviyyəli olmurlar. Məsələn, "BTB" kimi banklar hesab edirlər ki, niyə yüksək maaş verməliyəm? Böyük bankların rəhbərləri yaxşı maaş alır, ancaq orta, kiçik səviyyəli işçilərə yüksək maaş vermirlər. Deyirlər, Allaha şükür edin ki, bizim kimi bankda çalışırsız. Həm də həmin bankların rəhbərləri ilin sonunda bonus alırlar. Bu mükafat da ilin sonunda bankın göstəricilərinə uyğun olur. Bank əgər yaxşı məbləğlə ili başa vurubsa, rəhbərlər həmin mükafatı alırlar. Ona görə də banklar daha çox maraqlıdır ki, orta səviyyəli və kiçik vəzifəlilərə yüksək maaş verməsinlər, ilin sonunda daha çox mənfəəət əldə etsinlər. Bu baxımdan yüksək maaş bir qayda olaraq orta səviyyəli banklarda olur. Onlar real özəl banklardır, inhisarçı deyillər, dövlətə bağlı deyillər. Ona görə də onlara yaxşı işçilər lazımdır ki, yaxşı xidmət göstərib müştəriləri cəlb etsinlər".
Qeyd edək ki, məsələ ilə bağlı banka sorğu göndərsək də, sorğumuza heç bir cavab verilmədi. Daha sonra bankın mövqeyi təqdim olunarsa, onu da işıqlandıra bilərik.
Günel CƏLİLOVA
