Akif Nəsirli: "Yerli istehsal soğanın zay olmasına səbəb fermerlərin soğana daha çox azot gübrəsi verməsidir"
Rayonlarda soğan əkinçiliyi ilə məşğul olan fermerlər məhsullarının anbarlarda qalaraq məhv olmasından, satıla bilməməsindən gileylənir. Buna baxmayaraq Azərbaycan xaricdən soğan idxalına davam edir.
Məsələn, bir neçə gün əvvəl Qazaxıstanın kənd təsərrüfatı naziri Aydarbek Saparov açıqlamasında bildirib ki, Azərbaycan və Gürcüstana 160 min ton soğan ixrac ediləcək.
Görəsən, daxildə soğanlar anbarlarda cücərib yararsız hala düşərkən, nə üçün sahibkarlar xaricdən soğan gətirməyə üz tutur?
"Fermerlər anbarları günahlandırsa da, məsələ burasındadır ki, onlar soğana daha çox azot gübrəsi verib, məhsulu şişiriblər"
Aqrar sahə üzrə ekspert Akif Nəsirli "Bakı-Xəbər"ə açıqlamasında bildirdi ki, Azərbaycanda soğan istehsalı 2022-ci illə müqayisədə 12 faiz artıb: "Ancaq problem ondadır ki, qışa saxlanılan soğanlar anbarlarda çürüyür. Belə olan halda həmin məhsul yararsız vəziyyətə düşdüyü üçün bazara çıxarıla bilmir. Bu səbəbdən də Rusiya, Qazaxıstan və İrandan ölkəmizə soğan idxal edilir. Yerli istehsal olan soğanın zay olmasına səbəb fermerlərin soğana daha çox azot gübrə verməsidir. Fermerlər anbarları günahlandırsa da, məsələ burasındadır ki, onlar soğana daha çox azot gübrəsi verib, məhsulu şişiriblər. Azot yemləmə məqsədilə bitkilərə verilən gübrədir. Bu gübrə bir çox tərəvəzlərə normadan artıq verildiyi zaman qidanı qəbul edən insanlarda zəhərlənmələrə səbəb ola bilir. Soğanda zəhərlənməyə səbəb olmasa da, azotu normadan artıq olan soğanın saxlanması artıq mümkün olmur. Əvvəlki illərdə, xüsusilə dekabr aylarında soğan məhsulları ölkəmizdən külli miqdarda ixrac edilirdi və soğan olmadığına görə bu sahədə ölkə üzrə qıtlıq yaşanırdı, qiymət artırdı. Amma bu il soğanın keyfiyyəti aşağı olduğuna görə bu məhsul anbarlarda çürüyüb və yararsız hala düşüb. Təbii, çox soğan istehsal etməklə deyil, bu soğanın keyfiyyəti yoxdursa, onu saxlamaq da mümkün olmayacaq və çürüyəcək. Ona görə də Azərbaycana hazırda soğan idxal edilir".
Günel CƏLİLOVA
