Fuad İbrahimov: "Qazaxıstan Azərbaycan vasitəsilə neft nəqlini artırır, Türkmənistan da bu barədə düşünür"
Gürcüstanın iqtisadiyyat naziri Levan Davitaşvili Bakı-Supsa neft kəməri ilə neft nəqlinin 2024-cü ildə bərpa olunacağına ümid edir. Bu barədə Gürcüstan KİV məlumat yayıb.
"Neft kəmərindən istifadə üzrə Azərbaycan tərəfinin mövqeyi çox vacibdir və burada biz intensiv dialoq aparırıq. Belə ki, bu boru kəməri 1999-cu ildən Azərbaycan nefti ilə fəaliyyət göstərib. Hazırda boru kəməri ilə Qazaxıstan neftinin tranziti müzakirə olunur, bu isə başqa növ neftdir. Fikrimcə, əsas məsələlərə aydınlıq gətirəcəyik və ümid edirik ki, bu il Qazaxıstan neftinin nəqli başlanacaq. Gələcəkdə ildə bir milyon tondan artıq neft aşıra biləcəyimizi düşünürük. Ümid edirəm ki, neft nəqli bu il başlayacaq", - Davitaşvili deyib.
Qeyd edək ki, Bakı-Supsa boru kəməri ildə 5 milyon tona qədər neft nəql etmək imkanına malikdir. Hazırda Bakı-Supsa boru kəməri ilə nəql dayandırılıb.
Ümumən, Bakı-Supsa boru kəməri ilə neftin yenidən nəqli perspektivini ekspertlər necə dəyərləndirir?
"Bütün bunlar həyata keçərsə, o zaman Bakı-Supsa boru kəmərinin yenidən işə salınması qaçılmazdır"
Sözügedən məsələ ilə bağlı fikirlərini "Bakı-Xəbər"lə bölüşən iqtisadçı-ekspert Fuad İbrahimov hesab edir ki, texniki baxımdan Bakı-Supsa neft kəməri 7 milyon ton neft ötürmək gücünə malikdir: "İkincisi, nəzərə almaq lazımdır ki, bu bizim müstəqillik dövründə ilk Rusiyadan kənar tranzit neft kəmərimiz olub. Uzunluğu 833 kilometr olan Qərb İxrac Boru Kəməri Səngəçal terminalından başlayaraq Gürcüstan sahilindəki Supsa terminalına qədər uzanır. Diametri 530 mm olan kəmər 1997-1998-ci illər ərzində tikilib. Supsada ilk dəfə neft 1999-cu il aprelin 8-də gəmilərə yüklənib. Ona görə də bu kəmərin bizim üçün xüsusi əhəmiyyəti var. O dövrün çətin şərtlərini nəzərə alsaq, mərhum prezident Heydər Əliyevin Bakı-Supsanın ərsəyə gəlməsində müstəsna xidmətləri olub. O cümlədən, Gürcüstanın ovaxtkı rəhbəri Eduard Şevardnadzenin də. Hesab edirəm ki, kəmər boyu texniki təmir işləri görülsə, nasoslar yenilənsə, yenidən bu kəmərlə neft nəql etmək mümkün olacaq. Çünki kəmər praktiki işlək bir kəmərdir və məsafə baxımından yaxındır. Qara dənizə nefti çıxarmaqla gəmilərlə dünyanın istənilən yerinə daşımaq mümkündür. Digər tərəfdən, Azərbaycanla Qazaxıstan arasında iqtisadi əlaqələr genişlənir. Qazaxıstan Azərbaycan vasitəsilə neft nəqlini artırır. Türkmənistanın da bununla bağlı səylərini gücləndirəcəyi gözlənilir. Gözlənilir ki, Türkmənistan da neftinin müəyyən hissəsini Azərbaycan vasitəsilə ixrac etsin. Bütün bunlar həyata keçərsə, o zaman Bakı-Supsa boru kəmərinin yenidən işə salınması qaçılmazdır".
Vidadi ORDAHALLI
