Vüqar Bayramov: "İl ərzində təxminən 100 min ailə ünvanlı sosial yardım alır"
Son illərdə ünvanlı sosial yardımla bağlı bir sıra pozitiv dəyişikliklər qeydə alınır. 2024-cü ilin fevral ayında orta hesabla bir ailəyə ödənilən Ünvanlı Dövlət Sosial Yardımının (ÜDSY) məbləği 18,6 faiz artıb. Bu barədə DSMF-nin yaydığı məlumatda qeyd edilir.
Beləliklə, ötən ilin fevral ayında orta hesabla bir ailəyə ödənilən ÜDSY-nin məbləği 410,0 manat idisə, cari ilin müvafiq dövründə bu məbləğ artaraq 486,3 manat təşkil edib.
"Ünvanlı sosial yardımın elektronlaşması, eyni zamanda, bu istiqamətdə təkmilləşmənin aparılması bu proqramdan istifadə edənlərin sayına təsir edib"
Mövzu barədə fikir bildirən millət vəkili Vüqar Bayramov "Bakı-Xəbər"ə şərhində bildirdi ki, ünvanlı sosial yardımın elektronlaşması, eyni zamanda, bu istiqamətdə təkmilləşmənin aparılması bu proqramdan istifadə edənlərin sayına təsir edib: "Statistik rəqəmlərə nəzər salsaq görərik ki, il ərzində təxminən 100 min ailə ünvanlı sosial yardım alır. Həmçinin, 2024-cu ildən etibarən ehtiyac meyarının 270 manata çatdırılması da ünvanlı sosial yardımdan istifadə edənlərin aldığı məbləğin artmasına və bu yardımdan yararlananların sayının yüksəlməsinə səbəb olub".
Millət vəkili onu da əlavə etdi ki, bu sahədə şəffaflığın artması ünvanlı sosial yardım almaq hüququ olan vətəndaşların özünə əminliyini artırıb. Beləliklə, aztəminatlı ailələr sosial təminatının yaxşılaşdırılması üçün aidiyyəti quruma müraciət edir: "Ölkəmizdə aztəminatlı ailələrin yaşayış səviyyəsinin yaxşılaşdırılması, eləcə də ailə üzvlərinin işlə təmin edilməsi istiqamətində silsilə addımlar atılır. Ümumiyyətlə, yeni qaydalar ilk və təkrar müraciətlər zamanı vətəndaşlara rahatlıq yaradır və yaradacaq. Dəyişikliklərə əsasən, bundan sonra, əvvəl olduğu kimi, sosial yardım alan ailələr yenidən müraciət etdiyi zaman, əgər ailənin tərkibi və yaşayış ünvanı dəyişməyibsə, eləcə də ailə başçısının itirilməsinə görə ailə üzvləri arasında pensiya və ya müavinət alan, I və II dərəcə əlilliyi olan iki və daha çox ailə üzvü varsa, bununla yanaşı, ailədə üç və ya daha çox uşaq varsa belə, ailələrin maddi-məişət şəraitinin müayinəsi aparılmayacaq. Dəyişikliklərdən biri də yardımın dayandırılması və məbləğin dəyişdirilməsi ilə bağlıdır. Belə ki, əvvəl ailə tərkibində ünvanlı sosial yardımın dayandırılmasına, ödənilən məbləğin dəyişdirilməsinə səbəb olacaq hansısa dəyişiklik baş verdikdə, əvvəlcə sosial yardım avtomatik olaraq dayandırılırdı. Daha sonra ailə ünvanlı sosial yardım almaq üçün yenidən müraciət edirdi və bu əsasda müraciətə yenidən baxılırdı. Lakin tətbiq edilən yeni dəyişikliklərdən sonra əgər ailədə yeni uşaq dünyaya gəlibsə, övladlığa götürülübsə, ailə üzvü vəfat edibsə, ailə üzvü hərbi xidmətə çağırılıbsa və ya ehtiyata buraxılıbsa, eləcə də əmək qabiliyyətli ailə üzvünün I dərəcə, bundan əlavə 18 yaşadək əlilliyi olan şəxsə, 8 yaşadək olan uşağa baxma müddəti başa çatıbsa və ailənin əmək qabiliyyətli 23 yaşadək üzvünün əyani təhsil müddəti başa çatdıqda sosial yardım əvvəlki kimi dayandırılmayacaq. Ödəniş davam edəcək. Bu kimi dəyişikliklər ünvanlı sosial yardıma müraciət edənlərin sayına təsir edib".
Günel CƏLİLOVA
