İlqar Hüseynli: "Bu müəssisələrlə bağlı ciddi araşdırmaların aparılmasına ehtiyac var"
Naxçıvanda son zamanlar ardıcıl olaraq bir neçə dövlət təşkilatının fəaliyyəti dayandırılıb. Onların əksəriyyətinin lüzumsüz paralel qurum olduğu məlumdur. O da məlumdur ki, bu müəssisələr illərdir dövlət büdcəsinin göbəyində oturub ondan qidalanmaqla məşğul olub, pul talamaqdan başqa işi olmayıb. Şübhəsiz ki, bu cür təşkilatların ləğv edilməsi günün tələbi idi.
Bu günlərdə Naxçıvanda yenə də bir müəssisə fəaliyyətini dayandırıb. Belə ki, Naxçıvan Neft və Qaz Məhsulları Təminatı Müəssisəsi ləğv edilib. Bununla bağlı Naxçıvan Muxtar Respublikası Ali Məclisinin sədr müavini Anar İbrahimov sərəncam imzalayıb.
Sərəncama əsasən, Naxçıvan Neft və Qaz Məhsulları Təminatı Müəssisəsi ləğv edilib. Ləğv edilmiş Müəssisənin maliyyə aktivləri Naxçıvan Muxtar Respublikasının büdcəsinə, digər əmlakları (Azərbaycan Respublikası Nazirlər Kabinetinin 2024-cü il 26 yanvar tarixli 55/S nömrəli Sərəncamında nəzərdə tutulan daşınmaz əmlak istisna olmaqla) və nəqliyyat vasitələri isə özəlləşdirilməsi məqsədilə Naxçıvan Muxtar Respublikası İqtisadiyyat Nazirliyinin sərəncamına verilib.
Bu, sayca neçənci qurumdur ki, ləğv edilir. Artıq Naxçıvanda heç bir fayda verməyən, səmərəli işləməyən belə təşkilatlar ləğv olunur. Yəni bu müəssisələr 5-10, 20 il bundan əvvəl yaradılıb. Əgər belə lüzumsuz təşkilatlar yaradılıbsa, bunlarının ləğv olunması təbiidir. Amma burada incə bir məsələni nəzərdən qaçırmamalıyıq. Bu təşkilatların vaxtilə yaradılması dövlətin büdcəsinə filan qədər israfçılıq formasında vurulan ziyan olub. Dövlət büdcəsinin israfçı şəkildə dağıdılmasına görə cinayət işi niyə qaldırılmır? Kimsə müqəssirdirsə, cinayət məsuliyyətinə cəlb olunmalıdır. Çünki burada söhbət dövlət vəsaitinin səmərəsiz xərclənməsindən, dövlət əmlakının israfçı şəkildə dağıdılmasından, onun israf olunmasına şərait yaradılmasından gedir.
Büdcə vəsaitinin mənasız, səmərəsiz sərf olunmasına, israfçılığa görə cinayət işi niyə açılmır?
"Bunlar hamısı araşdırılmalıdır, dövlətdən oğurlanan vəsait geri qaytarılmalıdır, bu işi edənlərə qarşı müvafiq addımlar atılmalıdır"
Sosial-iqtisadi sahə üzrə tanınmış ekspert İlqar Hüseynli "Bakı-Xəbər"ə şərhində bildirdi ki, bu çox aktual məsələdir və çox aktual sualdır. İ.Hüseynlinin sözlərinə görə, bizim son zamanlar ictimailəşdirdiyimiz bu problemi o, 20 ildən çoxdur ki, qaldırır. "Siz bizim 20 ildən çoxdur ki, qaldırdığımız məsələyə toxunmusunuz. Təbii ki, Azərbaycanda kifayət qədər dövlət büdcəsinin səmərəsiz xərcləmələrinə imkan yaradan qurumlar mövcuddur. Müxtəlif ikili, paralel idarəetmə sistemi var ki, biz hesab edirik, bu paralel qurumlar sıradan çıxarılmalıdır.
Sözsüz, Naxçıvanda ehtiyac olmayan kiçik təşkilatların yaradılmasında məqsəd öz yaxın çevrələri, yaxınları üçün mənasız yerə kreslolar, vəzifələr təsis etmək olub. Bu lüzumsuz, gərəksiz vəzifələri formalaşdırmaqla yanaşı, eyni zamanda dövlət büdcəsinin səmərəsiz xərclənməsi, vəsaitlərin silinməsi prosesini həyata keçiriblər" - deyə İ.Hüseynli qeyd etdi.
İ.Hüseynlinin sözlərinə görə, bu cür səmərəsiz, faydasız, dövlət büdcəsinin qənimi olan təşkilatlar ləğv edilsələr də, onların başını buraxmaq olmaz, o müəssisələrlə bağlı ətraflı araşdırmalar aparılmalıdır. "Bu müəssisələrlə bağlı ciddi araşdırmaların aparılmasına ehtiyac var. Dövlət büdcəsinin talanması ilə əlaqədar məsələlərin araşdırılması üçün dövlətin rəhbər şəxsləri tərəfindən güc strukturlarına, müvafiq qurumlara göstərişlər verilməlidir. Lazımsız yerə yaradılan, indi də ləğv edilən müəssisələrin fəaliyyəti araşdırılsın, səmərəliliyi yoxlanılsın, nədən və hansı zərurətdən yaradılması ilə bağlı hesabatlar hazırlansın. Bilinsin ki, bu müəssisələr niyə və nə üçün, kimlər tərəfindən yaradılıb, kim rəhbər təyin olunub, Dövlət büdcəsindən ora ayrılan pullar hara xərclənib. Təbii ki, bunlar hamısı araşdırılmalıdır" - deyə bildirən İ.Hüseynli hesab edir ki, bu proses təkcə Naxçıvanda deyil, Azərbaycanın hər yerində həyata keçirilməlidir. Ekspert hesab edir ki, bütün ölkədə bu cür səmərəsiz və dövlət büdcəsini talamaqla, vəsaitlərin yuyulması ilə məşğul olan kifayət qədər qurumun olması ilə əlaqədar faktlar mövcuddur.
"Bunlar hamısı araşdırılmalıdır, dövlətdən oğurlanan vəsait geri qaytarılmalıdır, bu işi edənlərə qarşı müvafiq addımlar atılmalıdır" - deyə İ.Hüseynli qeyd etdi.
İradə SARIYEVA
